Tu guni huantar zacaa ti premiu
1 «Pa [...] [“guni huantar”, NM] tu la? zalá tu.» (Luc. 21:19.) Cani maʼ bieeteʼ riʼ, zeeda cani lade ca diidxaʼ ni maca guníʼ Jesús aca ora iluxe cani cayaca yanna riʼ, ne rusihuinni cani de que pa racaláʼdxinu gúninu ni na Dios sin ucheenu la? naquiiñeʼ chuʼnu listu para udxiilunu ca guendanagana gápanu. Peru, ne stipa ni rudii Jiobá la? iranu zanda guni huantarnu ne ilanu ora gueeda dxi stibe (Mat. 24:3, 13; Fili. 4:13).
2 Ca ndiʼ nga caadxi guendanagana ridídinu guiráʼ dxi, sanándacabe laanu, aca huaranu, qué ugaanda xpuéltunu ne chuʼnu xizaa. Ne cadi chuʼ dxi guiaandaʼ laanu de que Binidxabaʼ laaca racalaʼdxiʼ usabanaʼ laanu para usaananu Jiobá. Guiráʼ dxi tiidi ne cadi cucheenenu Dios la? cayacanenu udxiilunu Ni cucaalú laabe. ¡Guizáʼ nayecheʼ nga riuʼnu ora gánnanu de que Jiobá qué rusiaandaʼ diʼ ca «nisa riete lunu» ora tiidinu lu guendanagana! Para laabe nabé risaca cani, ne ora qué rucheenenu laabe la? rusiéchenu ladxidoʼbe (Sal. 56:8; Pro. 27:11).
3 Ca guendanagana ca runichaahuiʼ cani laanu. Zándaca xiixa guendanagana usihuinni paraa nadá fe stinu o paraa nadanu, casi uguunu naróʼ stinu o acalúgunu pur xiixa. Lugar de uyúbinu modo ireecueʼnu de ca guendanagana ca o cadi gúninu ni na Biblia la? naquiiñeʼ ucaadiagachaahuinu ca conseju cudii Stiidxaʼ Dios laanu ne usaananu gunichaahuiʼ guendaruni huantar riʼ laanu. Xiñee yaʼ. Purtiʼ pa guni huantarnu sin ucheenu la? «zaniisi [n]u lu stiidxa Dios» (Sant. 1:2-4). Guni huantarnu ca zacané ni laanu udxiibanu stale guenda ni risaca, casi chuʼnu xlugar tuuxa ora acaná, guiubaláʼdxinu binni ne iziidinu icaanu diidxaʼ (Rom. 12:15).
4 Rihuinni pa dxandíʼ fe stinu. Ora runi huantarnu ca guendanagana ca la? rusihuínninu pabiáʼ risaca fe stinu, ti fe ni para Dios laaca nabé risaca (1 Ped. 1:6, 7). Fe riʼ zacané laanu guzuhuaanu dxiichi para udxiilunu ca guendanagana ni gueeda ca. Ne laaca rúʼyanu de que riulaʼdxiʼ Dios cani rúninu, zacá riuʼnu jma naguidxi lu ni cabézanu ne rácani jma dxandíʼ para laanu (Rom. 5:3-5).
5 Premiu ni jma naroʼbaʼ ni zacaanu pur guni huantarnu nga ni zeeda lu Santiago 1: 12, ra na «Zieche ladxidóʼ cani tidi ni naná [“ne guni huantar”, NM] purti pa [“guni huantárcabe”] [...] la? zudii Dios laacabe enda nabani ni qué zaluxe». Nga runi, cadi usaananu de chuʼnu dxiichi ora runi adorarnu Jiobá, ne gannadxíchinu de que laabe zudiibe ti premiu irá cani nadxii laabe.