Riuu binni nayecheʼ ora guni huantar guendanagana ni guidxaagalú
1 Ca xpinni Cristu gadxé gadxé guendanagana ridxaagalunu. Raca huaranu, nuu tiru qué gápanu bueltu para tiidinu dxi, rizánanda binni laanu ne naquiiñeʼ gápanu laanu para cadi guchéʼnenu Dios (2 Tim. 3:12). Binidxabaʼ riquiiñeʼ ca cosa riʼ para cadi gúnipenu xhiiñaʼ Dios, guireʼnu gana gucheechenu diidxaʼ ne gusaananu de gúninu ni na Jiobá (Job 1:9-11). Peru, xiñee rininu riuʼnu nayecheʼ ora runi huantarnu guiráʼ ca guendanagana riʼ yaʼ (2 Ped. 2:9).
2 Chuʼnu listu para guni huantarnu. Jiobá caquiiñeʼ Stiidxaʼ para gusiidiʼ laanu ni dxandíʼ, ne luni cá guiráʼ ni bisiidiʼ Jesús ne guiráʼ ni biʼniʼ dxi guyuu lu Guidxilayú riʼ. Pa gúʼndanu guiráʼ ni guníʼ Jesús ne gúninu cani la? zacané cani laanu gudxíʼlunu ca guendanagana ni guidxaagalunu (Luc. 6:47-49). Laaca nuuruʼ xcaadxi cosa ni zanda gacané laanu guni huantarnu: ca bíʼchinu ni ridagulisaanenu, ca guendaridagulisaa ca ne ca libru ne revista ni rudii mozo ni nuu xpiaaniʼ ne ni runi jneza laanu. Ne ora tiica si zanda guinínenu Jiobá lu oración (Mat. 6:13).
3 Jiobá laaca maʼ bisiidiʼ laanu zabee guiráʼ guendanagana ni nápanu. Cumu runi crenu zabee Jiobá guiráʼ cani la? fe stinu racaneni laanu guzuhuaa dxiichinu, «casi rinaaze ancla barcu para qué iniibi» (Heb. 6:19). Dxiqué ora guireené binni barcu stiʼ naquiiñeʼ chiné ancla, neca gastiʼ bi. Pa málasi guiaba ti nisaguié naroʼbaʼ ne ti bi yooxhoʼ la? zanda gusábacabe ancla que ti cadi guidxelasaacabe cueʼ xiixa guié. Zacaca rizaaca ora málasi guidxaagalunu xiixa guendanagana, qué runiibi diʼ cani laanu purtiʼ nánnanu maʼ cadi zandaa diʼ zabee Jiobá cani. Zacá bizaaca ndaaniʼ guidxi Listra. Dxi bicheeche Pablu ne Bernabé diidxaʼ raqué, stale binni bicaadiaga laacabe, peru maʼ qué nucaadiágacaʼ ora bedandá ca judíu ni bicaalú dxiiñaʼ stícabe (Hech. 14:8-19).
4 Riuʼnu nayecheʼ ora runi huantarnu. Ratadxí ladxidoʼno ora qué rusaananu de gucheechenu diidxaʼ neca nuu tu cucaalú laanu. Ne riéchenu ora chuʼ tu guiníʼ mal de laanu pur nácanu xpinni Cristu (Hech. 5:40, 41). Ora runi huantarnu ca guendanagana ni ridxaagalunu rusiidiʼ cani laanu guzúʼbanu diidxaʼ, cadi gudxíʼbanu laca laanu, ne cadi guireʼnu gana (Deu. 8:16; Heb. 5:8; Sant. 1:2, 3). Ne laaca rizíʼdinu guni crenu zuni Jiobá guiráʼ ni maʼ guníʼ ne zanda gulá laanu (Pro. 18:10).
5 Nánnanu tobi zidiʼdiʼ si ca guendanagana ni cadxaagalunu (2 Cor. 4:17, 18). Biaʼ tiempu tiidinu lu cani, zacanécani laanu gusihuínninu pabiáʼ nadxiinu Jiobá. Pa guni huantarnu la? zanda gusihuínninu cadi dxandíʼ guiráʼ ni guníʼ Binidxabaʼ. Nga runi, cadi guireʼnu gana ne cadi guidxáganu, purtiʼ «zieche ladxidóʼ cani tidi ni naná sin ixhacalaʼdxiʼ, purti pa qué ixhacalaʼdxi cabe la? zudii Dios laacabe enda nabani ni qué zaluxe» (Sant. 1:12).