Iquiiñenu Biblia jneza
1. Ximodo zanda chuʼluʼ listu para chigucheecheluʼ diidxaʼ.
1 Intiisi libru o rebista ni acaláʼdxinu usaananenu binni ora maʼ ziucheechenu diidxaʼ la? galán nga uyúbinu ti textu ni ucaa laacabe iníʼ íquecabe ne gúʼndanenu ni cani ucaadiaga laanu (Heb. 4:12). Biyubi ndaaniʼ libru o rebista ni zineuʼ ca ti historia ni zeeda lu Biblia, nga zanda acané lii para usaananeuʼ cani binni. Nuu lugar la? cani rucheeche diidxaʼ ca nabé huayuuyacabe de que galán nga chinécabe Biblia lu nácabe ora idxíñacabe tuuxa o pacaa ora maʼ zécabe de yoo pur yoo.
2. 1) Ximodo zanda guzulú güínenu binni diidxaʼ ne ti textu yaʼ. 2) Xi tema ni zeeda lu Biblia jma riulaʼdxiʼ ca xpesínuluʼ ganna.
2 Bizuluné ti textu. Caadxi de cani rucheeche diidxaʼ ruzulú riníʼnecaʼ binni ra inabadiidxacaʼ laacabe xi riníʼ íquecabe de ni na xiixa textu ni zeeda lu Biblia, oraqueruʼ maʼ guʼndanécabe ni laacaʼ. Zacá jma nagueenda rucaacabe binni guʼyaʼ xi na lu Stiidxaʼ Dios. Ñee zanda iquiiñeʼ cani zeeda raríʼ neza ra rucheecheluʼ diidxaʼ la?
◼ «Pa ñápaluʼ poder, ñee ñúniluʼ cani zeeda raríʼ la?» Biindaʼ Apocalipsis 21:4.
◼ «Xiñee nabé nagana cabáninu ca dxi riʼ.» Biindaʼ 2 Timoteo 3:1-5.
◼ «Ñee raʼbuʼ jma galán ñuu xquídxinu pa iranu ninándanu conseju riʼ la?» Biindaʼ Mateo 7:12.
◼ «Ñee raʼbuʼ ziuu dxi ibani ca xiiñiluʼ galán casi modo na raríʼ la?» Biindaʼ Salmo 37:10, 11.
◼ «Ñee riníʼ íqueluʼ de que zadxiña dxi gueeda aca ca diidxaʼ riʼ dxandíʼ la?» Biindaʼ Isaías 33:24.
◼ «Ñee nánnaluʼ de gobiernu cubi ni cayeeteʼ raríʼ la?» Biindaʼ Daniel 2:44.
◼ «Ñee huayuu dxi iníʼ íqueluʼ inabadiidxaluʼ Dios ca diidxaʼ riʼ la?» Biindaʼ Job 21:7.
◼ «Ñee zanda nga ibiguetaʼ gúʼyanu ca binnilídxinu ni maʼ guti ibánicaʼ sti biaje la?» Biindaʼ Juan 5:28, 29.
◼ «Ñee rudii ca gueʼtuʼ ca cuenta de ni runi ca binni ni nabani ca la?» Biindaʼ Eclesiastés 9:5.
3. Ximodo zanda acanenu binni guiene ca textu ni gúʼndanenu laacaʼ.
3 Bisiene, udixhe ti ejemplu ne uníʼ ximodo iquiiñeʼ ni. Pa binni ni cayuiʼneuʼ diidxaʼ ca napa gana ucaadiaga la? cadi iluʼxuʼ nagueendaca. Jma galán nga icaaluʼ tiempu biaʼ caquiiñeʼ para usiéneluʼ, quíxheluʼ ti ejemplu ne uluiʼluʼ ximodo zanda iquiiñebe textu ni zeeda lu Biblia ca ti ganda guiénebe ni cayaʼbuʼ laabe (Neh. 8:8). Ora binni guiene ne icaa cani na Stiidxaʼ Dios la? zanda uchaani modo nabani dede zadxagayaa binni (1 Tes. 2:13).
4. Ximodo zanda iquiiñenu Biblia jneza ora ibiguetaʼ chigánnanu binni.
4 Cadi usaana de iquiiñeluʼ Biblia jneza laga cayacaneuʼ binni chulaʼdxiʼ iziidiʼ jma. Cani maʼ bizeetenu ca laaca zanda iquiiñeʼ cani ora ibigueta chigánnanu binni: 1) Biyubi ti textu para gúʼndaneuʼ laabe, 2) unabadiidxaʼ laabe xiixa ni zanda icábibe de ni zeeda lu Biblia de racá biindaneni laabe, ne 3) bisiene ni laabe, udixhe ti ejemplu ne uníʼ ximodo zanda iquiiñebe ni. Biʼniʼ stipa acaneuʼ laabe gánnabe jma de lu Stiidxaʼ Dios cada chigannuʼ laabe. Zacá la? ¡nin qué zandaa mápeca cayuundaneuʼ tuuxa de Biblia!