Gúninu ni jneza ne udiʼnu ni nápanu
1 Dorcas «nabé ucané be binni ne ora caquiiñe ca pobre xiixa la? rudii be laacaʼ» (Hech. 9:36, 39). Pur modo laabe nabé gunaxhii iráʼ binni laabe ne laaca gunaxhii Jiobá laabe. Zeeda ácani casi na Hebreos 13:16: «Cadi usiaanda tu aca tu nachaʼhui ne binni, ne udii tu tindaa de ni napa tu cani qué gapa, purti casi ñaca nusigaʼde tu ni Dios ne nga nga ni riulaʼdxiʼ». Yanna riʼ, ximodo zanda gúninu ni jneza ne udiʼnu ni nápanu yaʼ.
2 Ti modo zanda acanenu stobi nga udiʼnu ca «cosa risaca» ni nápanu (Pro. 3:9). Ca bueltu rudiʼnu para dxiiñaʼ raca idubi Guidxilayú riquiiñecabe ni para ucuícabe jma Yoo stiʼ Reinu, Yoo ra raca Guendaridagulisaa roʼ (Salón de Asambleas) ne cuí xcaadxi yoo Betel. Cumu nabé riuláʼdxinu udiʼnu la? millón de binni ribeendú stale de cani rusiidiʼ Jiobá laanu, ne laaca ribeendúcabe ni galán ora ridxaagacabe ca bíchinu ne ca bizánanu ni nuu ndaaniʼ xquidxi Dios.
3 Quixhedxinu ladxidóʼ binni. Ora rizaaca xiixa ni runiná binni la? xquidxi Jiobá nuuca listu para acané ca Testigu ne cani cadi Testigu (Gál. 6:10). Despué de ucuagui ti fábrica ndaaniʼ guidxi Francia, ti endaxheelaʼ nabeza gaxha de raqué uníʼ: «Ca bíchinu ne ca bizánanu Testigu nagueendaca beeda acanecaʼ laadu, uleecabe iráʼ cani bixiá stiʼ ca yoo que ne laaca ucanécabe biá xcaadxi yoo nuu raqué. Ca vecinu que nabé bidxagayaacaʼ pabiáʼ stale tu beeda acané». Sti bizánanu uníʼ: «Ca binnigola uyecaʼ ra nuudu ne nabé uluucaʼ gana laadu ne nguepeʼ nga ni jma caquiiñedu que bueltu».
4 Neca nuu stale modo zanda acanenu binni, ni jma galán nga usíʼdinu laacabe ni dxandíʼ ca, luni zeeda ni maʼ bizabiruaa Jiobá de ti «enda nabani ni qué zaluxe» (Tito 1:1, 2). Ca diidxaʼ sicarú zeeda lu Biblia nabé riguixhedxí ni ladxidóʼ cani cayacaná pur ca endanagana ni nuu lu Guidxilayú riʼ ne pur endaruchee sticaʼ (Mat. 5:4). Pur nga runi, cadi usaana de gúninu ni jneza ne udiʼnu ni nápanu laga zanda gúninu ni (Pro. 3:27).