Acané saanu laanu
1 Apóstol Pablu ucanebe ca bíʼchibe biaʼ gunda para biquídxibe fe sticaʼ (Hech. 14:19-22). Laanu laaca riquiiñeʼ izaaláʼdxinu ca bíchinu ne ca bizánanu ne acanenu laacabe ora tiidicabe ra nagana. Biblia na cadi ca binnigola ca si nga naquiiñeʼ gúʼyacaʼ ca bíchinu ne ca bizánanu sínuque iranu (Rom. 15:1, 2). Idúʼyanu chupa modo zanda gúninu ni na conseju riʼ: «Lausieche saa [...] ne cada tobi uyubi uzuhuaa chaahui stobi» (1 Tes. 5:11).
2 Gúʼyanu xi caquiiñeʼ xcaadxi. Stiidxaʼ Dios na, Dorcas «nabé ucané be binni ne ora caquiiñeʼ ca pobre xiixa la? rudii be laacaʼ» (Hech. 9:36, 39). Biiyabe cani cadiʼdiʼ lu endanagana ne ucanebe laacaʼ biaʼ gunda. ¡Izáʼ sicarú ejemplu udíxhebe para laanu nja! Zándaca gánnanu de ti bíchinu ni maʼ nagola ne caquiiñebe chinécabe laabe ra ridagulisaanu. O gánnanu de tuuxa precursor ni qué gapa tu chigucheechené diidxaʼ ti huadxí ndaaniʼ semana. Pa gánnanu caquiiñeʼ tuuxa xiixa ne acanenu laabe la? dxandíʼ zaguʼnu gana laabe.
3 Ininu de stiidxaʼ Dios. Laaca zanda acanenu stuudxi pur cani rininu (Efe. 4:29). Ti binnigola ni huayuni zacá uníʼ: «Pa racaláʼdxiluʼ uguuluʼ gana stobi la? uníʼ de Stiidxaʼ Dios. Zanda uzululuʼ inabadiidxuʼ laabe: “Ximodo binibiaʼluʼ Stiidxaʼ Jiobá pue”». Usihuínninu dxandíʼ rizaaláʼdxinu ca hombrehuiiniʼ ne ca dxaapahuiiniʼ ni nuu ra ridagulisaanu. Ne zaqueca izaaláʼdxinu cani nuu triste pur xiixa endanagana cadíʼdicaʼ o pur cani natuí (Prov. 12:25). Cadi ininu de ca cosa ni ruluíʼ runi binni nayecheʼ purti zucueza ni qué risaca ucueeza cani laanu de inínenu ca bíchinu ne ca bizánanu de stiidxaʼ Dios (Rom. 1:11, 12).
4 Yanna, xi zanda ininu para uguʼnuʼ gana xcaadxi yaʼ. Ñee huadxélanu xiixa ni ucaa laanu gannaxhiinu Jiobá jma ora maʼ cayúʼndanu Biblia iráʼ dxi o pacaa ora maʼ cayúʼndanu para laasinu la? Ñee huayunadiáganu xiixa ni usiecheʼ laanu lu ti libana o ra riuundaʼ La Atalaya la? O huayunadiáganu xiixa ni bizaaca tuuxa bíchinu o bizánanu ni yendá dede ndaaniʼ ladxidoʼno ne biquidxi fe stinu la? Pa laanu usisácanu iráʼ cani zeeda de Jiobá riʼ ne gápanu cani lu xquendabiaaninu la? ora tiisi zápanu ni inínenu xcaadxi ne zaguʼnu gana laacaʼ (Pro. 2:1; Luc. 6:45).
5 Nga runi, uyúbinu acanenu cani cadiʼdiʼ ra nagana ne iquiiñenu lúdxinu jneza. Zacá zacané saanu laanu (Pro. 12:18).