Cani zanda acané laanu nagueendaca
1. Ximodo rixeleʼ tuuxa de Dios.
1 Ti bizánanu ni láʼ Anna la? qué ruundaʼ diʼ xheelabe Biblia ne rúnibe dxiiñaʼ idubi dxi, ngue runi uca nagana para laabe chebe iráʼ ca endaridagulisaa rápanu, chigucheechebe diidxaʼ ne gúʼndabe Stiidxaʼ Dios. Neca nadxiibe Jiobá, maʼ qué ñanda nucheecherube diidxaʼ. Galanpeʼ nga nuu ca binnigola ca para ucanecaʼ laabe bizuhuaa dxiichibe lu Stiidxaʼ Dios sti biaje.
2. Ximodo zanda acané iráʼ ca xpinni Cristu nagueendaca cani caquiiñeʼ acanécabe laa.
2 Ni riná acané ca binni ridagulisaa laa la? rusihuinni dxandíʼ runi cré Jiobá de idubi ladxidóʼ. Ca binnigola stiʼ ca binni ridagulisaa, cumu nabé nadxiicabe ca bíʼchicabe ne ca bizáʼnacabe casi biʼniʼ Jesús la? ruyúbicabe ximodo uguucabe gana ne acanécabe cani cadiʼdiʼ lu xiixa endanagana ni rucueeza laacaʼ de gúnicaʼ ni na Dios (1 Tes. 5:14). Stale biaje ni caquiiñeʼ si nga guʼndané binni laacabe chupa chonna textu ni zeeda lu Biblia para quixhedxí ladxidóʼcabe. Cadi ca binnigola si nga naquiiñeʼ uyúbicaʼ ximodo acanecaʼ cani maʼ cadi zuhuaa dxiichiʼ lu Stiidxaʼ Dios, sínuque dxiiñaʼ stiʼ iráʼ ca xpinni Cristu ni. Iranu nga maʼ huayuni sentirnu pabiáʼ nga racané «ti diidxaʼ iníʼcabe ora caquiiñeʼ» gábicabe ni laanu (Pro. 25:11; Isa. 35:3, 4).
3, 4. Xi iráʼ ndiʼ zanda gúninu para acanenu stuudxi binni, ne ximodo zanda gúninu cani.
3 Biyubi ximodo acaneluʼ. Usihuínninu dxandíʼ rizaláʼdxinu cani caquiiñeʼ xiixa nga uyúbinu ximodo acanenu, uluinu riénenu laacabe ne gúninu ni. Ora gunna Jonatán pabiáʼ nagana ra cadiʼdiʼ David xhamigu la? «biásabe ne guyebe Hores, ra nuu David, para acanebe laa cadi gusaana Dios» (1 Sam. 23:15, 16). Ucané ca bíʼchiluʼ ne ca bizáʼnaluʼ ne diidxaʼ ni uguu gana laacabe purtiʼ dxandíʼ nadxiiluʼ laacabe, zacá zabeenduluʼ stale cosa galán. Ora bisiidiʼ Jesús bisihuinni riquiiñeʼ gúninu stale stipa ne dxandíʼ usihuínninu racaláʼdxinu acanenu ibiguetaʼ ti bíʼchinu o ti bizáʼnanu ndaaniʼ xquidxi Jiobá (Luc. 15:4). Cumu dxandíʼ racaláʼdxinu acanenu laacabe la? nga runi qué zusaananu de gúninu ni neca qué gúnicabe ni gábinu laacabe nagueendaca.
4 ¡Izáʼ galán nga uyúbinu ximodo acanenu ca bíʼchinu ne ca bizáʼnanu para chigucheechenecaʼ laanu diidxaʼ, casi cani rié lade grupu ni ruundaʼ libru ra riuunu! Ora maʼ canagucheechenu diidxaʼ ne tuuxa la? laaca zanda iquiiñenu tiempu ca para uguʼnu gana laabe ti gúnibe jma lu xhiiñaʼ Dios. Ora gúninu zacá la? rusiecheʼ ni laacabe stale, ne racaneni cani cayuni stipa para ganda uzuhuaacaʼ dxiichiʼ lu Stiidxaʼ Dios sti biaje.
5. Xi zanda guni ca binnigola para acanecaʼ ora caquiiñeʼ.
5 Ni iquiiñenu para acanenu. Zándaca cani maʼ xadxí qué rucheeche diidxaʼ o cani qué huayé ca endaridagulisaa rápanu, caquiiñeʼ chuʼ tu acané laacaʼ para iguidxi fe sticaʼ. Zándaca ni caquiiñesícabe nga gúʼndanenu laacabe sti libru casi Adoremos al único Dios verdadero o Acerquémonos a Jehová o Xipeʼ ndiʼ cusiidiʼ Biblia. Cumu maʼ uyuunísacabe la? ora gúʼndanenu laacabe maʼ qué zaquiiñenu stale tiempu. Grupu ni Ruuyaʼ Dxiiñaʼ stiʼ ca Binni Ridagulisaa naquiiñeʼ gúʼyacaʼ tu zanda acanécabe sicaríʼ (laguuyaʼ «Ndaa ra rinabadiidxaʼ» stiʼ Nuestro Ministerio del Reino noviembre 1998 ne noviembre 2000).
6. Ximodo gunda ucanécabe ti bizánanu para bizuhuaa dxiichiʼ lu Stiidxaʼ Dios.
6 Bizánanu Anna, ni bizéʼtenu que, biéchebe stale purtiʼ biseendaʼ ca binnigola sti bizánanu ni jma zuhuaa dxiichiʼ lu Stiidxaʼ Dios para chiguundané laabe de Biblia. Tapa si biaje yeguundanécabe laabe para bidxíñabe jma gaxha de Jiobá. Bizulú uyebe ca endaridagulisaa ne maʼ gúpabe gana usisácabe Jiobá ra ucheechebe diidxaʼ. Bizánanu que laaca ucané laabe ora yeguundanécabe xcaadxi binni de Biblia ne zaqué bíʼnibe ni dede ora maʼ biʼniʼ sentir Anna maʼ zanda chigucheeche diidxaʼ stubi. Ni biquiiñeʼ si Anna para bibiguetaʼ sti biaje nga acané tuuxa laa.
7. Xi ribeendunu ora acanenu iguidxi fe stiʼ xcaadxi.
7 Iranu ribeendunu ni galán ora acanenu iguidxi fe stiʼ tuuxa. Ni acanécabe ca riuu nayecheʼ purtiʼ ridxiña jma gaxha de Jiobá ne ribiguetaʼ runi ca dxiiñaʼ ni runi ca binni ridagulisaa. Ca binnigola riéchecaʼ ora gúʼyacaʼ tuuxa iniisi jma lu Stiidxaʼ Dios (Luc. 15:5, 6). Ne ca binni ridagulisaa rácacaʼ tobi si purtiʼ dxandíʼ rizaláʼdxicaʼ xi caquiiñeʼ cada tobi de laacaʼ (Col. 3:12-14). Dxandíʼ nga nápanu stale razón para ácanu casi Jiobá, ne zacá acanenu cani caquiiñeʼ ni nagueendaca (Efe. 5:1).