«Guiniʼné ca ancianu»

1. ¿Ximodo maʼ bisihuinni Jehová nadxii guiráʼ ca dendxuhuiiniʼ stiʼ?

NABÉ nadxii Jehová guiráʼ ca dendxuhuiiniʼ stiʼ. Guzíʼ Jehová ca dendxuhuiiniʼ stiʼ né rini stiʼ Jesús ne maʼ bisaanabe ca ancianu ni nuu ndaaniʼ ca congregación ca para gápacaʼ ca dendxuhuiiniʼ stibe (Hech. 20:28). Racalaʼdxiʼ Dios gannaxhii ca ancianu ca dendxuhuiiniʼ ca. Ne rinándacabe modo peʼ gudixhe Jesús gácani, purtiʼ laa nga xaíque ndaaniʼ congregación. Riguucabe gana ca dendxuhuiiniʼ ca ne rápacabe laacaʼ ora nuu xiixa ni zándaca guxheleʼ laacaʼ de Jehová (Is. 32:1, 2).

2. ¿Tuu nga ca ni jma rizaalaʼdxiʼ Jehová? (Ezequiel 34:15, 16).

² Rizaalaʼdxiʼ Jehová guiráʼ ca dendxuʼ stiʼ, peru jma rizaaláʼdxibe ca ni cayacaná. Ne riquiiñeʼ Jehová ca ancianu para ganda gacanecaʼ ca ni cayacaná o ca ni caxeleʼ de laabe (biindaʼ Ezequiel 34:15, 16). Yanna, ¿xi caquiiñeʼ gúninu pa caquiiñeʼ gacanécabe laanu yaʼ? Ni racalaʼdxiʼ Dios nga guni orarnu laabe, peru laaca racaláʼdxibe guidxíñanu ra nuu ca «pastor ne maestru» ni nuu ndaaniʼ congregación (Efes. 4:11, 12).

3. ¿Xiñee zacané artículo riʼ guiráʼ xixenu?

³ Lu artículo riʼ zadúʼyanu ximodo riquiiñeʼ Jehová ca ancianu para gacanécabe laanu cadi guixélenu de Jehová. Zacábinu ca pregunta riʼ: ¿pora nga caquiiñeʼ guinínenu ca ancianu?, ¿xiñee caquiiñeʼ gúninu ni? Ne ¿ximodo zanda gacanécabe laanu? Peru laaca zacané artículo riʼ ca ni zuhuaa dxiichiʼ lu Stiidxaʼ Dios yanna, purtiʼ zusietenalaʼdxiʼ ni laanu pabiáʼ risaca modo racané Jehová laanu ora riquiiñebe ca ancianu ca. Ne zusiidiʼ ni laanu xi caquiiñeʼ gúninu despué pa caquiiñeʼ guidxíñanu ra nuu ca ancianu.

PORA NGA CAQUIIÑEʼ GUINÍNENU CA ANCIANU

4. ¿Tuu nga binni huará ni ruzeeteʼ Santiago 5:14-16, 19, 20 ne ximodo nánnanu zácani? (Laaca zanda gúʼyaluʼ ca imagen ca).

⁴ Bisiene discípulo Santiago ximodo riquiiñeʼ Jehová ca ancianu para gacané laanu. Sicaríʼ bicaabe: «¿Nuu tuuxa huará ládetu la? Guiniʼné ca ancianu de congregación» (biindaʼ Santiago 5:14-16, 19, 20). Binni huará ni cuzeeteʼ Santiago raríʼ nga binni ni caxeleʼ o tuuxa ni maʼ bixeleʼ de Jehová. ¿Ximodo nánnanu ni yaʼ? Ora guidúʼyanu ni ná ante ne despué de ca versículo ca. Racá ridúʼyanu, cadi cayábidibe binni huará ca cheʼ ra nuu ti doctor, sínuque ra nuu ca ancianu. Laaca cusiénebe, binni huará ca la? zianda ora gaca perdonar ca pecadu stiʼ. Cásica nuu guendahuará ni runiná cuerpu stinu la? zacaca nuu guendahuará o cosa ni zanda guxheleʼ laanu de Jehová. Ora rinaaze ti guendahuará laanu la? riuunu ra nuu ti doctor, rábinu laabe xi cayácanu, ne rinándanu guiráʼ ni gábibe laanu gúninu. Zaqueca nga laanu, ora huaranu o caxélenu o maʼ bixélenu de Jehová la? caquiiñeʼ chuunu ra nu ca ancianu, caquiiñeʼ gusiénenu laacabe xi cayácanu ne chinándanu ca conseju zeeda lu Biblia ni gudiicabe laanu.

5. ¿Xi zanda gúninu para guidúʼyanu pa nazaaca nuunu?

⁵ Ora guidúʼndanu capítulo 5 stiʼ Santiago riguuni gana laanu guyúbinu gacané ca ancianu laanu pa guidúʼyanu casi ora caxélenu de Jehová. Peru cadi caquiiñeʼ peʼ cuézanu dede ora maʼ bixélenu de laabe nga gúninu ni; coʼ, caquiiñeʼ guinábanu laacabe gacanécabe laanu ante guizaacani. Ne caquiiñeʼ chuʼnu cuidadu purtiʼ Biblia peʼ rabi laanu zanda quiteʼ ladxidoʼno laanu ne guiníʼ íquenu nuunu galán nezalú Jehová peru cadi zacá ni (Sant. 1:22). Ne nga peʼ nga ni bizaaca caadxi xpinni Cristu de Sardis: guníʼ íquecaʼ casi ñaca nuucaʼ nazaaca, peru gudxi Jesús laacaʼ cadi zaqué ni (Apoc. 3:1, 2). ¿Ximodo zanda guidúʼyanu pa nuunu nazaaca o nuunu gaxha de Jehová yaʼ? Zanda gúninu ni ra guidúʼyanu pa rúninu ni ná Jehová né stale gana cásica dxi guyuunísanu (Apoc. 2:4, 5). Zanda guiníʼ íquenu ndiʼ: «¿Ñee riuuladxeruaʼ guundaʼ Biblia ne guiníʼ iqueʼ ni nani casi bineʼ ni dxiqué la? ¿Ñee dede yanna riaaʼ reunión ne racaʼ preparar chaahueʼ para chaaʼ cani la? ¿Ñee dede yanna risaca para naa guneʼ predicar la? ¿Ñee jma ricá iqueʼ yanna ca cosa ni zanda guneʼ para chizayaʼ o para chuaaʼ nayecheʼ la? ¿Ñee jma maʼ ricá iqueʼ gapaʼ bueltu la?». Ora guicábinu ca pregunta ca la? zacané nga laanu guidúʼyanu pa cayaca huaranu ne pa zándaca gueeda gaca xirooni pa qué guni tendernu ni yanna. Pa stúbisinu maʼ qué zanda guni chaahuinu ni o maʼ bicaani laanu gúninu xiixa cosa ni qué riuulaʼdxiʼ Jehová la? Caquiiñeʼ guidxíñanu ra nuu ca ancianu.

6. ¿Xi caquiiñeʼ guni tuuxa pa maʼ biʼniʼ ti pecadu grave?

⁶ Ya, pa maʼ biʼniʼ cometer tuuxa ti pecadu grave ne pur laani zándaca naquiiñeʼ guiree tuuxa de ndaaniʼ congregación la? caquiiñeʼ cheʼ ne guiniʼné ti ancianu (1 Cor. 5:11-13). Caquiiñeʼ binni ni bichee ca gacanécabe laa guibiguetaʼ gaca xhamigu Jehová. Zuni perdonar Jehová laanu pa gúninu cosa ni gusihuinni dxandíʼ maʼ guca arrepentirnu (Hech. 26:20). Ne tobi de ca cosa ca nga gábinu ca ancianu ca maʼ bíninu ti pecadu grave.

7. ¿Tuu nga ca ni jma caquiiñeʼ gacané ca ancianu laacaʼ?

⁷ Cadi ca ni maʼ biʼniʼ si ti pecadu grave nga ca ni racané ca ancianu. Laaca racanécabe ca ni nuu débil o ca ni maʼ caxeleʼ de Jehová (Hech. 20:35). Guníʼ ique cayúniluʼ stipa para cadi gúniluʼ ti cosa malu ni cuquiinde lii. Ne cayuni sentirluʼ zusaba ni lii. Ne zándaca jma nadipaʼ cayácani para lii purtiʼ zándaca ante gácaluʼ xpinni Jehová guduʼbaluʼ droga, biiyaluʼ pornografía o bíʼniluʼ stale cosa yuudxuʼ lu xquendanabániluʼ. Gunna cadi nuuluʼ stúbiluʼ. Zanda guxhéleluʼ ladxidoʼloʼ nezalú ti ancianu ni nánnaluʼ zucaadiaga chaahuiʼ lii. Nanna dxíchidu zudiibe lii caadxi conseju ni zacané lii ne zusietenaláʼdxibe lii zándaruʼ gusiécheluʼ ladxidóʼ Jehová pa qué guiábaluʼ lu trampa stiʼ ca cosa malu ni ruquiinde lii gúniluʼ (Ecl. 4:12). Pa riuuluʼ triste purtiʼ runi sentirluʼ nuuruʼ cosa malu ni ruquiinde lii gúniluʼ la? nga cusihuinni qué racaláʼdxiluʼ gusaana de gaca xhamíguluʼ Jehová, cuyúbiluʼ gacanebe lii ne qué riníʼ íqueluʼ stúbiluʼ zanda gudxiiluluʼ cani (1 Cor. 10:12).

8. ¿Xiñee nuu biaje cadi caquiiñeʼ peʼ gábinu ca ancianu ca paraa bicheʼnu?

⁸ Cadi caquiiñeʼ peʼ gábinu ca ancianu cada biaje gucheʼnu. Quíxhenu ti ejemplu, guníʼ ique bininaluʼ ti hermanu pur ni gúdxiluʼ laa ne dede guizáʼ bichiichini lii. Lugar de guiníʼneluʼ ti ancianu para gábiluʼ laa xi bíʼniluʼ, zanda chinándaluʼ conseju ni bidii Jesús ora guníʼ ximodo gaca chaahuiʼ guendanagana entre chupa binni (Mat. 5:23, 24). Laaca zanda guyúbiluʼ xiixa libru o revista stinu ni cusiene ximodo gácanu binni nadóʼ, gápanu paciencia ne gucueezanu laca laanu. Peru pa neca maʼ bíʼniluʼ guiráʼ nga ne maʼ biiyaluʼ qué ganda guni chaahuiluʼ guendanagana ca la? yanna huaxa zándaca caquiiñeʼ gábiluʼ ti ancianu xi gúniluʼ para gacané lii. Lu carta ni bicaa Pablo ra nuu ca xpinni Cristu de Filipos, gudxi apóstol riʼ ti hermanu ni nuu ndaaniʼ congregación que gácané Evodia ne Síntique para guni chaahuiʼ ca gunaa riʼ xquendanagana ca. Ngaca nga ni zanda guni ca ancianu ni nuu ndaaniʼ congregación stiluʼ para gacané lii (Filip. 4:2, 3).

XIÑEE CAQUIIÑEʼ GUINÍNENU CA ANCIANU

9. Neca rituílunu guinínenu ca ancianu, ¿xiñee caquiiñeʼ gúninu ni? (Proverbios 28:13).

⁹ Pa runi sentirnu ziábanu pur ca cosa malu ni ruquiinde laanu o maʼ bíninu ti pecadu grave la? caquiiñeʼ gusihuínninu nápanu fe ne valor para guinínenu ca ancianu. Peru cadi naquiiñeʼ guituílunu chuunu ra nuucabe. ¿Xiñee yaʼ? cadi guiaandaʼ laanu maʼ bidii Jehová laanu ca ancianu ca para gacanécabe laanu guzuhuaʼnu dxiichiʼ ne cadi chuʼ ni guxheleʼ laanu de Jehová. Nga runi, ora chuunu ra nuucabe rusihuínninu nápanu confianza Jehová ne zinándanu ca instrucción ni rudii laanu. Nánnanu qué zusaana Jehová de gacané laanu (Sal. 94:18). Ne nánnanu pa cuee ruaanu diidxaʼ ne gusaana de gúninu ca pecadu ni bíninu ziá Dios laanu ne zuni perdonar laanu (biindaʼ Proverbios 28:13).

10. ¿Xi zándaca guizaaca pa gacaláʼdxinu gucáʼchinu ca pecadu stinu?

¹⁰ Maʼ bidúʼyanu, stale nga ni ribeendunu ora guinábanu gacané ca ancianu ca laanu. Peru pa gacaláʼdxinu gucáʼchinu ca pecadu stinu la? zuninanu laca laanu. Guiníʼ íquenu ni bizaaca rey David. Dxi bicaachibe guiráʼ ra bicheebe bixhéleni laabe de Jehová, biuube triste dede guca huarabe (Sal. 32:3-5). Ora huaranu ne qué chuunu para guni tender ti doctor laanu la? jma naná ziuu cuerpu stinu, zaqueca nga laani, pa maʼ bíninu ti pecadu grave peru qué nanu chuunu ra nuu ca ancianu para gacanecaʼ laanu la? jma zacananu ne dede zanda guixélenu de Jehová. Nanna Jehová zacá peʼ nga laani nga runi laapebe cayábibe laanu chuunu ra nuu ca ancianu ne «guni chaahuinu ca cosa» ca (Is. 1:5, 6, 18).

11. ¿Xiruʼ zanda guizaaca pa gucaachiʼ tuuxa ca pecadu grave ni maʼ biʼniʼ?

¹¹ Pa gucáʼchinu ca pecadu stinu, laaca zanda guninanu xcaadxi binni. Zándaca pur laani maʼ qué guni espíritu santu stiʼ Dios dxiiñaʼ ndaaniʼ congregación ne dede zándaca chuʼ guendaridinde lade ca xpinni Cristu (Efes. 4:30). Guzéʼtenu stiʼ cosa ni zándaca gueeda guizaaca, zándaca gánnanu nuu ti hermanu ndaaniʼ congregación maʼ biʼniʼ ti pecadu grave, caquiiñeʼ gábinu laabe chebe ne guiníʼnebe ca ancianu.a Cadi guiaandaʼ ndiʼ laanu pa gucáʼchinu ni la? laaca zápanu donda cásica nápabe donda (Lev. 5:1). Cumu nadxiinu Jehová de guidubi ladxidoʼno la? nga nga zucaa laanu para chuunu ne guininu ni dxandíʼ. Pa gúninu ni maʼ guninu ca la? zacanenu chuʼ congregación nayá ne zacanenu binni ca para guibiguetaʼ gaca xhamigu Dios sti biaje.

XIÑEE CAQUIIÑEʼ GUINÍNENU CA ANCIANU

12. ¿Ximodo zanda gacané ca ancianu ca ni maʼ caxeleʼ de Jehová?

¹² Biblia peʼ rabi ca ancianu gacanecaʼ ca ni maʼ caxeleʼ de Jehová o ca ni nuu débil (1 Tes. 5:14). Pa maʼ bíʼniluʼ xiixa ni cuxheleʼ lii de Jehová, zándaca zanabadiidxaʼ chaahuicabe lii caadxi cosa para gánnacabe xi riníʼ íqueluʼ ne xi runi sentirluʼ (Prov. 20:5). Gucané laacabe ora gúnicabe dxiiñaʼ stícabe, ¿ximodo gúniluʼ ni yaʼ? Gudxi laacabe guiráʼ xixé ni bíʼniluʼ, neca rábiluʼ natuiluʼ para guiniʼluʼ purtiʼ zacá binni xquídxiluʼ o zándaca cadi biaaluʼ guiníʼneluʼ stobi o catuíluluʼ pur ni bíʼniluʼ. Cadi gudiiluʼ lugar chuʼ ni gucueeza lii neca rábiluʼ qué randa rucueezaluʼ lii para guiniʼluʼ o naduxhuʼ modo riniʼluʼ (Job 6:3). Cadi casi zeʼ ca ancianu ca zundaa ruaacaʼ xiixa o zaníʼ íquecaʼ mal de lii, sínuque zúnicabe stipa gucaadiaga chaahuicabe lii para ganna chaahuicabe xi guiráʼ nga bizaaca ante gudiicabe lii ti conseju (Prov. 18:13). Laacabe maʼ nánnacabe caquiiñeʼ guiree tiempu para ganda guiaapaʼ ca dendxuhuiiniʼ stiʼ Dios ne nuu cosa qué riluxeʼ o qué raca chaahuiʼ primeca biaje guiniʼnécabe binni.

13. ¿Xiruʼ zuni ca ancianu para gacanecaʼ laanu? (Laaca zanda gúʼyaluʼ ca imagen ca).

¹³ Zuni ca ancianu ca stipa para cadi gúnicaʼ xiixa cosa ni gucaa lii guiníʼ íqueluʼ jmaruʼ si nápaluʼ donda pur ni bizaacaluʼ. Ni zúnicabe nga zuni orárcabe pur lii. Zándaca dede zadxagayaaluʼ ora gúʼyaluʼ cuʼ oración ca gana lii. Laaca zacanécabe lii ra cúʼcabe aceite íqueluʼ «de lu lá Jehová» (Sant. 5:14-16). «Aceite» ni riete raríʼ nga guiráʼ cosa dxandíʼ ni zeeda lu Stiidxaʼ Dios. Nga runi, jneza modo zaquiiñecabe Biblia para gacanécabe lii guiándaluʼ, zaguixhedxícabe ladxidoʼloʼ ne zacanécabe lii guibiguetaʼ gaca xhamíguluʼ Jehová (Is. 57:18). Zudii guiráʼ conseju stiʼ Biblia stipa lii para cadi gusaana de gúniluʼ ni jneza. Zacané ca ancianu ca lii para gunadiágaluʼ stidxi Jehová ni cayabi lii: «Ndiʼ nga neza ca. Guzá luni» (Is. 30:21).

14. Casi ná Gálatas 6:1, ¿ximodo racané ca ancianu ca tuuxa ni cuchee? (Laaca zanda gúʼyaluʼ ca imagen ca).

¹⁴ (Biindaʼ Gálatas 6:1). Lu textu riʼ riete de tuuxa ni cuchee, ni caniʼni raríʼ nga tuuxa ni biʼniʼ o cayuni xiixa ni cadi jneza casi ná ca ley stiʼ Dios. Ruzeeteʼ textu ca de ti binni ni cuchee ne cucheebe purtiʼ zándaca qué nudiibe cuenta bíʼnibe xiixa ni cadi jneza o laapebe cuyúbibe modo gucheenebe ca ley stiʼ Dios. Guendarannaxhii ca nga rucaa ca ancianu ca guyúbicaʼ modo gacanecaʼ laabe ne gúnicani «né diidxaʼ nadóʼ». Diidxaʼ griegu ni guca traducir casi «gacanetu» (o «reajustar», casi ná nota) laaca biquiiñeni para guiníʼcabe ora rudxiguétacabe dxita ladi tuuxa ora biaaxhani de lugar stini para cadi gacanani jma. Cásica runi ti buen doctor né stale cuidadu rudxiguétabe dxita ladi tuuxa ora biaaxhani de lugar stini para cadi guninabe binni ca, ngueca nga ca ancianu né stale guendanachaʼhuiʼ zuni tratárcabe ti hermanu para cadi jmaruʼ si guninácabe laa. Ne Biblia laaca rabi ca ancianu ca ora gudiicaʼ conseju stobi la? gúʼyacaʼ ximodo nuucaʼ, purtiʼ laaca binni ruchee laacaʼ ne zándaca gúnicaʼ xiixa o gucheecaʼ sin gudiicaʼ cuenta. Nga runi, lugar de tindenécabe ti hermanu ni maʼ bichee o guiníʼcabe laacabe nga jma jneza ni rúnicabe que laa la? zuni ca hermanu ca stipa pur gusihuínnicaʼ nácacaʼ humilde ne riacaʼ binni (1 Ped. 3:8).

15. ¿Xi zanda gúninu pa nápanu ti guendanagana?

¹⁵ Zanda gápanu confianza ca ancianu ni nuu ndaaniʼ congregación. Laacabe maʼ nánnacabe cadi naquiiñeʼ sácabe guiníʼcabe xi cazaaca ca hermanu ne maʼ bisiidiʼ xquidxi Dios laacabe gudiicabe conseju ni zeeda lu Stiidxaʼ Dios lugar de guiníʼcabe ni ná íquecabe ne laaca maʼ biziidicabe xi gúnicabe para gacanécabe laanu ora gápanu guendanagana (Prov. 11:13; Gál. 6:2). Dxandíʼ gadxé gadxé nga modo naca cada ancianu nuu tu laa jma maʼ xadxí de naca ancianu que xcaadxi, peru pa nápanu ti guendanagana la? zanda guinínenu tutiica si de laacabe. Ti cosa ni qué zúninu nga chuunu ra nuu cada ancianu dede ra guidxélanu tobi ni gabi laanu gúninu ni maca caníʼ íquenu gúninu. Qué racaláʼdxinu gácanu casi ca binni ni ruyubi gusiidicabe laacaʼ cosa si ni riuuláʼdxicaʼ gánnacaʼ, sínuque casi ca ni riuulaʼdxiʼ guiziidiʼ ni jneza ni zeeda lu Stiidxaʼ Dios (2 Tim. 4:3). Ora gábinu ti ancianu xi cazaacanu, zándaca guinabadiidxabe laanu pa maʼ gunínenu sti ancianu de laani ne xi conseju bidii hermanu ca laanu. Ne zándaca zaníʼnebe sti ancianu para guinabadiidxabe laa xi riníʼ ique de laani (Prov. 13:10).

XI CAQUIIÑEʼ GUNI CADA TOBI DE LAANU

16. ¿Xi caquiiñeʼ gúninu?

¹⁶ Rapa ca ancianu laanu ne rudiicaʼ laanu stale conseju peru qué ziuu dxi gábicabe laanu xi caquiiñeʼ gúninu. Cada tobi de laanu, caquiiñeʼ gusihuínninu guiráʼ dxi pur ni guininu ne pur ni rúninu dxandíʼ nadxiinu Jehová ne racaláʼdxinu gúninu ni riuuláʼdxibe (Rom. 14:12). Zacanebe laanu guicaanu decisión jneza ne cadi guchéʼnenu laabe. Nga runi riquiiñeʼ ca ancianu ca Stiidxaʼ Dios para gacanecaʼ laanu guidúʼyanu xi riníʼ ique Jehová de ni cazaacanu ne despué maʼ rudiicabe lugar laanu guicaanu decisión stinu. Zacá nga zanda guizíʼdinu iquíʼñenu guendabiaaniʼ stinu (Heb. 5:14).

17. ¿Xi caquiiñeʼ quixhe íquenu gúninu?

¹⁷ ¡Ndaayaʼ naroʼbaʼ para laanu nga gácanu de ca dendxuhuiiniʼ stiʼ Jehová! Biseendabe Jesús «pastor chaʼhuiʼ», para gulá laanu ne pur laa zanda guicaanu guendanabani ni qué zaluxe (Juan 10:11). Ne laaca maʼ guluube ancianu ndaaniʼ ca congregación ca ne zacá nga guca cumplir ca diidxaʼ ni gúdxibe laanu zazaaca: «Zudieeʼ laatu pastor ni guni ni peʼ racalaʼdxeʼ, zacanécabe laatu para gácatu binni ni maʼ biziidiʼ ne ni riene» (Jer. 3:15). Nga runi, pa maʼ caxélenu de Jehová o pa maʼ bixélenu de laabe, guyúbinu ca ancianu para guinábanu laacaʼ gacanecaʼ laanu. Quixhe íquenu guicaanu regalu sicarú riʼ purtiʼ Jehová peʼ nga bidii ni laanu.