Lagannaxhii ne laguiá ca ni maʼ biʼniʼ ti pecadu grave

1. ¿Xi zándaca gueeda guizaaca neca maʼ biʼniʼ tuuxa ti pecadu grave?

LU ARTÍCULO ni gudiʼdiʼ ca, bidúʼyanu gudxi apóstol Pablo ca hermanu de Corinto ximodo guni tendercaʼ casu stiʼ ti hombre ni biʼniʼ ti pecadu grave. Cumu qué ñaca arrepentirbe la? gupa xidé guleecabe laabe de ndaaniʼ congregación. Peru, casi ná textu stiʼ artículo riʼ, zanda gacanenu ti binni gaca arrepentir (Rom. 2:4). ¿Ximodo riquiiñeʼ Jehová ca ancianu para ganda gacanecaʼ ti binni ni maʼ bichee gaca arrepentir?

2, 3. ¿Xi naquiiñeʼ gúninu pa gánnanu maʼ biʼniʼ cometer ti hermanu ti pecadu grave, ne xiñee?

² Laguiníʼ ique málasi gúnnanu biʼniʼ cometer ti hermanu ti pecadu grave o maʼ bíʼnibe xiixa para cueecabe laabe de ndaaniʼ congregación. ¿Xi naquiiñeʼ gúninu óraca yaʼ? Para ganda gacané ca ancianu laabe la? primeru naquiiñeʼ gánnacaʼ xi bizaaca. Nga runi galán guidxíñanu hermanu riʼ ne gábinu laabe chebe ra nuu ca ancianu ne guinábabe gacanecaʼ laabe (Is. 1:18; Hech. 20:28; 1 Ped. 5:2).

³ Peru ¿pa qué naʼ binni ca cheʼ ra nuu ca ancianu yaʼ? Cumu racaláʼdxinu gacanécabe laabe la? ziuunu ne zanínenu ca ancianu. Zacá nga cusihuínninu nadxiinu hermanu stinu, purtiʼ qué racaláʼdxinu gunítinu laabe. Peru pa qué nabe guchaabe la? maʼ qué zaca xhamígube Jehová ne zándaca guni biidibe lá congregación. Nga runi, neca gácani nagana, naquiiñeʼ gácanu nadxibalú ne guinínenu ca ancianu purtiʼ nadxiinu Jehová ne nadxiinu hermanu stinu (Sal. 27:14).

XIMODO RACANÉ CA ANCIANU TUUXA NI MAʼ BIʼNIʼ TI PECADU GRAVE

4. ¿Xii nga ni racalaʼdxiʼ ca ancianu ora raca reunirnecaʼ ti binni ni maʼ biʼniʼ ti pecadu grave?

⁴ Ora runi ti hermanu ti pecadu grave la? ribí ca ancianu chonna ancianu capacitadu para gúnicaʼ ti comitéa ne raca reunirnecaʼ hermanu riʼ. Naquiiñeʼ gaca ca ancianu ca nachaʼhuiʼ ne humilde, ne gánnacaʼ neca racaláʼdxicaʼ gacanecaʼ hermanu riʼ gaca arrepentir, cadi naquiiñeʼ guni obligárcabe laabe guchaabe (Deut. 30:19). Naquiiñeʼ ganna ca ancianu cadi guiráʼ diʼ ca ni maʼ bichee rinacaʼ guicaacaʼ conseju, cásica gucuaa rey David ni (2 Sam. 12:13). Nuu tu laa qué riná guicaa conseju ni zeeda de Jehová (Gén. 4:​6-8). Neca zacá, naquiiñeʼ guni ca ancianu stipa para gacanecaʼ binni maʼ bichee ca gaca arrepentir. ¿Xi principiu zeeda lu Biblia rinanda comité de ancianu ni raca reunirné hermanu ni maʼ bichee ca yaʼ?

5. ¿Xi naquiiñeʼ guietenalaʼdxiʼ ca ancianu ante gaca reunirnecaʼ binni ni maʼ bichee ca? (2 Timoteo 2:​24-26; (Biiyaʼ imagen ca).

⁵ Ruuyaʼ ca ancianu binni ni maʼ bichee ca casi ti dendxuhuiiniʼ ni nabe risaca stiʼ Jehová ni maʼ biniti (Luc. 15:​4, 6). Ne ora gaca reunirnecaʼ laabe la? naquiiñeʼ guiníʼnecaʼ laabe né diidxaʼ nadóʼ ne guni tratárcabe laabe galán. Cadi naquiiñeʼ gácacabe naduxhuʼ ne cadi naquiiñeʼ si gúnicabe pregunta para gánnacabe xi peʼ nga ni bizaacaʼ. Sínuque ni naquiiñeʼ gúnicabe nga gusihuínnicabe ca cualidad ni riete lu 2 Timoteo 2:​24-26 (biindaʼ ni). Ne ora guiniʼnécabe hermanu riʼ, naquiiñeʼ gácacabe nachaʼhuiʼ ne guiníʼcabe né diidxaʼ nadóʼ para chindácabe ndaaniʼ ladxidoʼbe.

6. ¿Xi runi ca ancianu ante gaca reunirnecaʼ binni ni maʼ bichee ca? (Romanos 2:4).

⁶ Runi ca ancianu stipa guiníʼ íquecaʼ casi riníʼ ique Jehová. Rietenaláʼdxicabe ca diidxaʼ ni guníʼ Pablo, ni ná: «Tantu nachaʼhuiʼ Dios nga nuu gacané lii gaca arrepentirluʼ» (biindaʼ Romanos 2:4). Nga runi, rúnicabe stipa guni tratárcabe ca binni ni maʼ bichee cásica runi Jehová ni. Ne naquiiñeʼ guietenaláʼdxicabe nácacabe pastor ne naquiiñeʼ chinándacabe ca instrucción ne ejemplu stiʼ Cristu (Is. 11:​3, 4; Mat. 18:​18-20). Ante gaca reunirné comité riʼ binni ni maʼ bichee ca, runi orarcaʼ Jehová ne rinábacaʼ laabe gacanebe laacaʼ para ganda gacanecaʼ binni ca gaca arrepentir. Laaca ruyúbicabe información ni zeeda lu Biblia ne lu ca publicación stinu, ne rinábacabe Jehová gudii laacabe guendanuuxpiaaniʼ para guiénecabe binni ca ne xi pur bíʼnibe ni. Ne laaca galán guiníʼ íquecabe xi zándaca bicaa binni riʼ guni ti pecadu grave (Prov. 20:5).

7, 8. ¿Xi zanda guni ca ancianu para gápacaʼ paciencia cásica Jehová ora gaca reunirnecaʼ ti binni ni maʼ bichee?

⁷ Naquiiñeʼ gapa ca ancianu paciencia casi Jehová. Nabe risaca guietenaláʼdxicabe modo biʼniʼ tratar Jehová ca binni ni bichee ni bibani dxiqué. Guzéʼtenu ti ejemplu, gupa Jehová paciencia ora guniʼné Caín ne gúdxibe laa zanda guibiguetaʼ chuuláʼdxibe ni runi, peru laaca gúdxibe laa xi zazaaca pa qué guchaa modo laa (Gén. 4:​6, 7). Ne sti biaje, guluu jneza Jehová rey David, ne biseendaʼ profeta Natán ra nuu, ne biquiiñeʼ hombre riʼ ti ejemplu para chindá ndaaniʼ ladxidóʼ rey David (2 Sam. 12:​1-7). Laaca stale biaje biseendaʼ Jehová ca profeta stiʼ guidxi Israel para guchaacaʼ modo laacaʼ (Jer. 7:​24, 25). Que nibeza diʼ Jehová primeru ñaca arrepentir ca xpinni para gacanebe laacaʼ, sínuque laapebe biyúbibe modo gacanebe laacaʼ ne gunábabe laacaʼ gaca arrepentircaʼ neca cucheerucaʼ.

⁸ ¿Xi runi ca ancianu para chinándacaʼ ejemplu stiʼ Jehová ora gacanecaʼ tuuxa ni maʼ biʼniʼ ti pecadu grave? Casi ná 2 Timoteo 4:​2, nabé risaca guni tratárcabe binni riʼ né stale paciencia. Naquiiñeʼ gucueezacabe laacabe ne guiníʼcabe né diidxaʼ nadóʼ para gacanécabe binni riʼ guni ni jneza. Purtiʼ pa guidxiichi ne guiree ca ancianu gana la? zándaca maʼ qué zaná binni ca gucaadiaga laacabe ne dede qué zaná gaca arrepentir.

9, 10. ¿Xi zanda guni ca ancianu para gacanecaʼ hermanu ni bichee ca guiene xiñee cadi jneza ni biʼniʼ?

⁹ Runi ca ancianu stipa gánnacaʼ xi bicaa hermanu ca guchee. Zanda guiníʼ íquecabe, ¿ñee nuu hermanu riʼ zacá purtiʼ maʼ huaxiéʼ runi estudiar o runi predicar la? ¿Ñee maʼ qué runi orarbe casi rúnibe ni dxiqué la? ¿Ñee huadiibe lugar guicaa xcu ca deseu malu ca ndaaniʼ ladxidoʼbe la? ¿Ñee ridxaagabe binni ni cadi naca xpinni Cristu o huadiibe lugar guxheleʼ ca entretenimientu ni cadi jneza ca laabe de Jehová la? ¿Ñee riénebe cayúninabe ladxidóʼ bixhózebe Jehová pur ca decisión ne pur ca cosa ni cayúnibe la?

¹⁰ Zuni ca ancianu ca laabe pregunta peru qué zanábacaʼ laabe gudiibe laacaʼ detalle de guiráʼ ni bizaaca. Naquiiñeʼ gácacabe nachaʼhuiʼ né laabe ne gudiicabe lugar guiniʼbe ne gacanécabe laabe gudiibe cuenta xi bicaa laabe gucheebe (Prov. 20:5). Ne cásica gucané Natán David, zanda iquiiñecabe ejemplu para gacanécabe hermanu riʼ gudii cuenta xiñee cadi jneza ni biʼniʼ. Ne zándaca primé biaje gaca reunírnecabe laabe la? gudiibe cuenta cadi jneza ni bíʼnibe o dede gaca arrepentirbe.

11. ¿Ximodo biʼniʼ tratar Jesús ca binni ni maʼ bichee?

¹¹ Naquiiñeʼ guni ca ancianu stipa chinándacaʼ ejemplu stiʼ Jesús. Ti biaje gunabadiidxaʼ Jesús Saulo de Tarso: «Saulo, Saulo, ¿xiñee canazananduʼ naa pue?». Biʼniʼ Jesús laabe pregunta riʼ ti guiénebe cadi jneza ni cayúnibe (Hech. 9:​3-6). Ne lu Apocalipsis 2:​20, 21 bizeeteʼ Jesús de ti gunaa lá «Jezabel» ne guniʼbe: «Bidieeʼ tiempu laabe para ñaca arrepentirbe».

12, 13. ¿Xi zanda guni ca ancianu para gudiicaʼ tiempu binni ca gaca arrepentir? (Biiyaʼ ca imagen ca).

¹² Cásica biʼniʼ Jesús, ca ancianu laaca cadi naquiiñeʼ guiníʼ íquecaʼ qué naʼ diʼ binni ca gaca arrepentir. Nuu tu laa raca arrepentir primé biaje gaca reunirné comité ca laa, peru xcaadxi la? napa xidé tidiʼ jma tiempu. Nga runi zanda gaca reunirné ca ancianu binni ca jma de ti biaje. Zándaca despué de guiniʼné ca ancianu ca laabe primé biaje, guiníʼ íquebe cadi jneza ni bíʼnibe, gácabe humilde ne guinábabe perdón Jehová lu ti oración (Sal. 32:5; 38:18). Ne zándaca sti biaje gaca reunirnécabe laabe maʼ bichaabe modo riníʼ íquebe.

¹³ Para ganda gacané ca ancianu binni ca gaca arrepentir la? naquiiñeʼ chuʼcaʼ lugar stibe ne gácacaʼ nachaʼhuiʼ. Laaca rinábacabe Jehová cuʼ ndaayaʼ stipa ni cayúnicabe para gacanécabe binni ca guiene cadi jneza ni biʼniʼ ne gaca arrepentir (2 Tim. 2:​25, 26).

14. ¿Tu laa si nga zanda gacané ti binni ni maʼ bichee para gaca arrepentir, ne xiñee?

¹⁴ Pa gaca arrepentir tuuxa ni maʼ bichee la? de guiranu riéchenu (Luc. 15:​7, 10). Peru ¿tu gucané binni riʼ gaca arrepentir yaʼ? ¿Ñee ca ancianu la? Cadi gusiaandanu guníʼ Pablo «zándaca gacané Dios ca ni qué ruzuubaʼ diidxaʼ riʼ gaca arrepentircaʼ» (2 Tim. 2:25). Nin ti binni qué zanda gacané tuuxa guchaa modo riníʼ ique o xpiaʼ, sínuque Jehová si zanda gúnini, laasibe zanda gacanebe ti xpinni Cristu ni maʼ bichee guchaa modo laa. Ne laaca bizeeteʼ Pablo xi ribeendú binni ora raca arrepentir: rucaani binni ni maʼ bichee ca guiziidiʼ chaahuiʼ ni dxandíʼ zeeda lu Biblia, laaca racaneni laa gudii cuenta cadi jneza ni biʼniʼ ne laaca racaneni laa guiree «de lu trampa stiʼ Binidxabaʼ» (2 Tim. 2:26).

15. ¿Xiruʼ zanda guni ca ancianu para gacanecaʼ tuuxa ni maʼ guca arrepentir?

¹⁵ Pa gaca arrepentir tuuxa la? zúniruʼ ca ancianu ca laabe visita de pastoreu para iguidxi fe stibe, ganda gucaanabe ca tentación stiʼ Binidxabaʼ ne sabe lu neza stiʼ Jehová (Heb. 12:​12, 13). Ne cadi naquiiñeʼ gabi ca ancianu ca guirutiʼ xipeʼ nga ni biʼniʼ hermanu ca. Peru ¿xi zanda gabi ca ancianu ca congregación yaʼ?

«PA CUCHEE TUUXA LA? BIʼNIʼ CENSURAR LAA NEZALÚ GUIRÁʼ BINNI»

16. Ora guníʼ Pablo guiráʼ binni lu 1 Timoteo 5:​20, ¿tudé ngue caniʼbe?

¹⁶ (Biindaʼ 1 Timoteo 5:​20, nota). Gudxi Pablo Timoteo, ni laaca naca ancianu, guni censurar ca ni maʼ bichee ne gúnini «nezalú guiráʼ binni». Peru ¿tuu nga ca binni riʼ yaʼ? Raríʼ cadi caníʼdini interu congregación, sínuque ca hermanu si ni nanna ni biʼniʼ binni ca, zándaca purtiʼ biiyacaʼ laabe o purtiʼ laapebe gúdxibe ni laacaʼ. Nga runi zabi ca ancianu ca laacabe maʼ guca tender binni ni bichee ca ne maʼ guluu jnézacaʼ laabe.

17. Ora interu congregación nanna maʼ bichee tuuxa, ¿xi anunciu zudii ti ancianu, ne xi para?

¹⁷ Nuu biaje la? stale hermanu de congregación o zándaca de guirácabe nánnacabe maʼ bichee tuuxa. Óraca la? «guiráʼ binni» ca zeeda gácacabe interu congregación. Nga runi zudii ti ancianu ti anunciu ndaaniʼ congregación ne zaníʼ maʼ guca censurar ti hermanu o ti hermana. ¿Xiñee yaʼ? Pablo bisiene: «Ti guidxibi xcaadxi» ne cadi guni cometercaʼ ti pecadu grave.

18. ¿Xi runi ca ancianu ora runi cometer ti joven ni maʼ guyuunisa ne napa menu de 18 iza ti pecadu grave? (Biiyaʼ imagen ca).

¹⁸ ¿Xi zazaaca pa guni cometer ti joven ni maʼ guyuunisa ti pecadu grave peru nápabe menu de 18 iza yaʼ? Zabí cuerpu de ancianu ca chupa ancianu para gaca reunircaʼ né jovenhuiiniʼ riʼ ne bixhózebe ne jñaabe ni naca Testigu.b Zanabadiidxaʼ ca ancianu riʼ hermanu riʼ ne hermana ca xi maʼ bíʼnicaʼ para gacanecaʼ xiiñicaʼ guchaa modo laa ne gaca arrepentir. Pa guihuinni maʼ bichaa jovenhuiiniʼ riʼ xpiaʼ ne racalaʼdxiʼ gacané bixhoze ne jñaa laa la? guiropaʼ ancianu ca zanda guicaacaʼ decisión ne guiniʼcaʼ cadi caquiiñeʼ gaca reunirné ti comité laacabe. Ne cadi guiaandaʼ laanu, maʼ gulí Jehová bixhoze ne jñaa binni para cuʼ jnézacaʼ xiiñicaʼ né stale guendarannaxhii (Deut. 6:​6, 7; Prov. 6:20; 22:6; Efes. 6:​2-4). Despué, zaníʼneruʼ ca ancianu riʼ bixhózebe ne jñaabe para gánnacaʼ ximodo cayacanécabe jovenhuiiniʼ riʼ. Peru ¿pa qué naʼ joven ni maʼ guyuunisa riʼ gaca arrepentir ne qué naʼ guchaa yaʼ? Óraca la? zaca reunirné ti comité de ancianu laabe ne bixhózebe ne jñaabe ni naca Testigu.

NABÉ NADXII NE RIÁ JEHOVÁ BINNI

19. ¿Ximodo rinanda ca ancianu ejemplu stiʼ Jehová ora riníʼnecaʼ tuuxa ni maʼ biʼniʼ ti pecadu grave?

¹⁹ Ca ancianu ni chuʼ lu ti comité la? rúnicaʼ stipa chuʼ congregación ca nayá, purtiʼ nga nga responsabilidad ni maʼ bidii Jehová laacabe (1 Cor. 5:7). Peru laaca rúnicabe guiráʼ ni nuu lu nácabe para gacanécabe binni ni maʼ bichee ca gaca arrepentir ne naquiiñeʼ gácacabe nachaʼhuiʼ ne guiníʼ íquecabe zándaruʼ guchaa binni ca. Pa gúnicabe ni la? zusihuínnicabe zinándacabe ejemplu stiʼ Jehová purtiʼ laa nabé nadxii binni ne riá laacaʼ (Sant. 5:11). Ne nabé galán guietenaláʼdxinu ca diidxaʼ ni bicaa apóstol Juan dxi maʼ huaniisi, laa guníʼ: «Xiiñehuiineʼ caʼ, cucaaʼ guiráʼ ndiʼ ra nuutu para cadi gucheetu. Peru, pa guchee tuuxa la? nápanu ti ayudante ra nuu Bixhózenu, laa nga Jesucristu, tobi ni runi ni jneza» (1 Juan 2:1).

20. ¿Xi zadúʼyanu lu últimu artículo ni caníʼ de tema riʼ?

²⁰ Triste guininu ni, peru nuu biaje qué riná diʼ ti xpinni Cristu ni maʼ biʼniʼ ti pecadu grave gaca arrepentir. Pa guizaaca ndiʼ la? naquiiñeʼ cueecabe laabe de ndaaniʼ congregación. ¿Xi runi ca ancianu ora rizaaca ndiʼ yaʼ? Zadúʼyanu ni lu sti artículo ca.