Ximodo racalaʼdxiʼ Jehová guni tratar congregación tuuxa ni guni ti pecadu grave

1. ¿Xi racalaʼdxiʼ Jehová?

BIZÁʼ JEHOVÁ binni para cuí xi guni. Guiráʼ dxi riquíʼñenu regalu ni bidii Jehová laanu riʼ ora ricaanu decisión naroʼbaʼ o nahuiiniʼ. Decisión jma risaca ni zanda guicaa tuuxa nga gudii laa Jehová ne chuʼ ndaaniʼ familia stibe. Ne nga peʼ nga ni racalaʼdxiʼ Jehová guni guiráʼ xixé binni. ¿Xiñee yaʼ? Purtiʼ nadxiibe binni ne racaláʼdxibe guibánicaʼ galán. Racaláʼdxibe gaca xhamígube laacaʼ ne gápacaʼ guendanabani ni qué zaluxe (Deut. 30:​19, 20; Gál. 6:​7, 8).

2. ¿Xi ribeza Jehová guni ca ni maʼ biʼniʼ ti pecadu grave ne caʼruʼ gaca arrepentircaʼ? (1 Juan 2:1).

² Qué runi obligar diʼ Jehová guirutiʼ guni ni nabe. Sínuque rudiibe lugar cada tobi cuí xi guni. Yanna, ¿xi rizaaca pa guni cometer ti xpinni Cristu ni maʼ guyuunisa ti pecadu grave yaʼ? Pa qué gaca arrepentirbe la? naquiiñeʼ cueecabe laabe de ndaaniʼ congregación (1 Cor. 5:13). Peru neca zacá, de guidubi ladxidóʼ Jehová ribeza guibiguetaʼ binni ni maʼ bichee ca ra nuu. Zanda peʼ guininu tobi de ca razón jma risaca pur bidii Jehová rescate ca nga para ganda guni perdonarbe ca binni ni gaca arrepentir de ca pecadu stiʼ (biindaʼ 1 Juan 2:1). Cumu nabé nadxii Dios stinu binni la? racaláʼdxibe gacanebe ca ni maʼ bichee ne cayábibe laacaʼ gaca arrepentircaʼ (Zac. 1:3; Rom. 2:4; Sant. 4:8).

3. ¿Xi zadúʼyanu lu artículo riʼ?

³ Racalaʼdxiʼ Jehová chinándanu ejemplu stiʼ pur modo guidúʼyanu ca pecadu ca ne ca binni ni runi ca pecadu grave ca. Zacané artículo riʼ laanu gúninu ni. Primé, guidúʼyanu ximodo biʼniʼ tratárcabe ti pecadu grave ni guyuu ndaaniʼ congregación de Corinto lu primé siglu que. Despué zadúʼyanu xi instrucción bidii apóstol Pablo ca hermanu que ora gaca arrepentir ti binni ni maʼ bichee. Ne últimu la? zaninu de modo ruuyaʼ Jehová ca binni ni runi ti pecadu grave.

MODO BIʼNIʼ TRATÁRCABE TI PECADU GRAVE LU PRIMÉ SIGLU

4. ¿Xi cazaaca ndaaniʼ congregación de Corinto? (1 Corintios 5:​1, 2).

⁴ (Biindaʼ 1 Corintios 5:​1, 2). Lu guionna viaje ni biʼniʼ Pablo casi misioneru, gúnnabe cazaaca ti cosa nabé feu ndaaniʼ congregación de Corinto, ni cadi xadxí de guca formar: gúnnabe nuuné ti hermanu madrastra stiʼ. Guníʼ Pablo nácani «ti pecadu sexual grave ni qué rihuinni nin lade ca binni ni qué runi cré». Qué nucaanáʼ diʼ congregación xpiaʼ hombre que, sínuque dede riníʼ íquecaʼ cadi malu ni cayúnibe. Zándaca nuu tu guníʼ ique rusihuinni nga pabiáʼ riá ne riene Jehová binni neca rucheecaʼ. Peru qué riuulaʼdxiʼ Jehová guni pecárcabe ndaaniʼ xquidxi. Cumu nabé feu ni cayuni hombre que la? biʼniʼ biidibe lá congregación que. Ne laaca zanda gucaabe xcaadxi xpinni Cristu de congregación que gúnicaʼ zaqueca. Yanna, ¿xi gudxi Pablo ca xpinni Cristu de Corinto naquiiñeʼ gúnicaʼ yaʼ?

5. ¿Xi bicaa Pablo ra nuu congregación que, ne xii ngue nuube gábibe laacaʼ? (1 Corintios 5:13; biiyaʼ imagen ca).

⁵ (Biindaʼ 1 Corintios 5:13). Biquiiñeʼ espíritu santo Pablo para bicaa naquiiñeʼ cueecabe hombre ni bichee que de ndaaniʼ congregación pa qué ná gaca arrepentir. ¿Ximodo naquiiñeʼ guni tratar ca xpinni Cristu ni ruzuubaʼ diidxaʼ laabe yaʼ? Gudxi Pablo laacabe cadi naquiiñeʼ guidxaagacabe laabe ne cadi lica naquiiñeʼ gonécabe laabe (1 Cor. 5:11). Ora ridóʼnenu ti binni, jma xadxí riúʼnenu laa ne ruínenu laa diidxaʼ. Nga runi, ni cayabi Pablo ca hermanu de congregación que nga cadi naquiiñeʼ guidxaagacabe hombre ni bichee ca. Ne nga zacané para cadi guicá xpiaʼbe ca hermanu de congregación de Corinto (1 Cor. 5:​5-7). Ndiʼ zándaca gucaani hombre que guʼyaʼ bininá ladxidóʼ Jehová, guituí lú pur ni biʼniʼ ne gucaani laa gaca arrepentir.

6. ¿Ximodo gucuaa congregación ne binni ni bichee que carta ni bicaa Pablo?

⁶ Biseendaʼ si Pablo carta que ra nuu congregación de Corinto, bizulú guníʼ íquebe ximodo guicaa ca hermanu que ni. Qué nindaa bidii Tito laabe ti noticia galán: guyuulaʼdxiʼ ca hermanu ni bicaabe ne yenándacaʼ ca instrucción ni bidiibe laacaʼ (2 Cor. 7:​6, 7). Ne cadi xadxí de biseendaʼ Pablo carta riʼ, guca arrepentir hombre que. Bichaabe xpiaʼbe, bisaanabe ca ni cayúnibe que ne bizulú yenándabe ca ley stiʼ Jehová (2 Cor. 7:​8-11). ¿Xiruʼ instrucción chigudii Pablo congregación que yaʼ?

XIMODO NAQUIIÑEʼ GUNI TRATAR CONGREGACIÓN HOMBRE NI MAʼ GUCA ARREPENTIR QUE

7. ¿Xi bizaaca pur guleecabe hombre ni bichee que de ndaaniʼ congregación? (2 Corintios 2:​5-8).

⁷ (Biindaʼ 2 Corintios 2:​5-8). Sicaríʼ guníʼ Pablo: «Maʼ biaʼca si de guni disciplinartu hombre ni biʼniʼ pecar ca». Zanda peʼ guininu maʼ gucané disciplina hombre que gaca arrepentir (Heb. 12:11).

8. ¿Xi gudxi Pablo congregación que despué?

⁸ Despué gudxi Pablo laacabe xi naquiiñeʼ gúnicabe né hermanu ni biʼniʼ cometer pecadu que: «Lagaca nachaʼhuiʼ ra guni perdonartu laabe ne laquixhedxí ladxidoʼbe». Ne laaca guniʼbe: «Canabaʼ laatu gusihuínnitu dxandíʼ nadxiitu laabe». Raríʼ ridúʼyanu cadi gucalaʼdxiʼ si Pablo nudiicabe lugar nibiguetaʼ hombre que ndaaniʼ congregación, sínuque naquiiñeʼ gusihuínnicabe pur ni guiníʼcabe ne pur ni gúnicabe dxandíʼ maʼ biʼniʼ perdonárcabe ne nadxiicabe laabe. Zacá zuni sentir hombre ni maʼ guca arrepentir que cayecheʼ congregación pur biguetaʼ.

9. ¿Xiñee zándaca guca nagana para caadxi hermanu guni perdonarcaʼ hombre ni guca arrepentir que?

⁹ ¿Ñee guca nagana para ca hermanu que guidxaagalucaʼ hombre ni maʼ guca arrepentir que la? Qué ruzeeteʼ diʼ Biblia ni, peru zándaca bizaaca ni. Purtiʼ zándaca bininá ni biʼniʼ hombre riʼ congregación ne zándaca jma bininá ni chupa chonna hermanu. Ne zándaca guyuu tu qué ñuulaʼdxiʼ modo bidxaagalúcabe hombre riʼ neca maʼ biʼniʼ stale cosa ni cadi jneza, jmaruʼ si purtiʼ laacaʼ rúnicaʼ stipa pur chinándacaʼ ca mandatu stiʼ Jehová (bichaaga ni né Lucas 15:​28-30). Peru ¿xiñee nabé risaca gusihuínnicabe dxandíʼ nadxiicabe hermanu ni biguetaʼ ndaaniʼ congregación que yaʼ?

10, 11. ¿Xi nizaaca pa qué ñuni perdonar ca ancianu hombre ni guca arrepentir que?

¹⁰ ¿Xi nizaaca pa qué nudii ca ancianu lugar nibiguetaʼ hombre que ndaaniʼ congregación neca maʼ guca arrepentir o pa qué nusihuinni ca hermanu cariñu laabe yaʼ? Zándaca nireebe «gana purtiʼ nuube triste». Zándaca niníʼ íquebe maʼ qué gápabe remediu o zándaca dede nusaana de ñúnibe stipa pur ñaca xhamígube Jehová sti biaje.

¹¹ Peru nuu sti cosa jma feu. Pa qué ñuni perdonar ca hermanu de congregación hombre ni guca arrepentir que, zándaca nuníticabe amistad ni napanécabe Dios. ¿Xiñee yaʼ? Purtiʼ pa qué ñuni perdonárcabe laabe la? qué nusihuínnicabe nácacabe casi Jehová, purtiʼ laa siempre nuu listu para guni perdonar ca binni ni gaca arrepentir, sínuque nusihuínnicabe nácacabe casi Binidxabaʼ, purtiʼ laa naguidxi ladxidóʼ ne malu laa. Ñanda niquiiñeʼ Binidxabaʼ laacabe para nunduuxecabe fe ni napa hombre que (2 Cor. 2:​10, 11; Efes. 4:27).

12. ¿Ximodo zanda chinanda congregación de Corinto ejemplu stiʼ Jehová?

¹² Yanna, ¿ximodo zanda chinanda congregación de Corinto que ejemplu stiʼ Jehová ne cadi stiʼ Binidxabaʼ yaʼ? Ra guni tratárcabe ca binni ni maʼ guca arrepentir casi modo runi tratar Jehová laacaʼ. Guidúʼyanu xi guníʼ chupa chonna binni ni bicaa Biblia de Jehová. David guníʼ: «Nacháʼhuiluʼ ne nuuluʼ listu para guni perdonarluʼ» (Sal. 86:5). Miqueas bicaa: «¿Tuu ndiʼ ti Dios casi lii ni runi perdonar ora ruchee tuuxa ne qué rulabi donda stibe [ . . . ]?» (Miq. 7:18). Ne Isaías guníʼ: «Gusaana binni malu neza stiʼ ne gusaana binni qué iquiiñeʼ cani riníʼ ique; guibiguetaʼ ra nuu Jehová laa ziá laabe, guibiguétabe ra nuu Dios stinu purtiʼ laa zuni perdonar guiráʼ donda stibe» (Is. 55:7).

13. ¿Xiñee jneza ngue biʼniʼ ca ancianu gucanecaʼ hombre que guibiguetaʼ ndaaniʼ congregación? (Biiyaʼ cuadru ni láʼ «¿Padxí bibiguetaʼ hombre de Corinto que ndaaniʼ congregación?»).

¹³ Para gusihuinni congregación de Corinto zinanda ejemplu stiʼ Jehová, caquiiñeʼ guidxagalúcabe hombre ni guca arrepentir que galán ne gusihuínnicabe guizáʼ nadxiicabe laa. Pablo guníʼ pa guni perdonárcabe hombre ni maʼ guca arrepentir que zusihuínnicabe ruzuubacabe diidxaʼ lu guiráʼ cosa (2 Cor. 2:9). Dxandíʼ, neca maʼ gudiʼdiʼ caadxi beeu de guleecabe hombre que de ndaaniʼ congregación peru gucané disciplina que laabe gaca arrepentirbe. Nga runi cadi naquiiñeʼ guindaa ca ancianu para gacanecaʼ laabe guibiguétabe ndaaniʼ congregación sti biaje.

XI RIZÍʼDINU DE JUSTICIA NE GUENDARIÁʼ STIʼ JEHOVÁ

14, 15. ¿Xi rizíʼdinu de modo guca tratar casu stiʼ ti hombre de congregación de Corinto ni biʼniʼ ti pecadu grave? (2 Pedro 3:9; biiyaʼ imagen ca).

¹⁴ Jehová peʼ biʼniʼ guicá relatu riʼ para gusiidiʼ laanu ximodo guca tratar casu riʼ ndaaniʼ congregación de Corinto (Rom. 15:4). Ndiʼ rusiidiʼ laanu qué riuulaʼdxiʼ Jehová guni ca xpinni pecadu grave. Nuu tu ná cumu nácabe ti Dios ni riá binni la? rudiibe lugar guiaana ti binni ni caʼruʼ gaca arrepentir ndaaniʼ congregación. Peru cadi dxandíʼ nga. Neca naca Jehová ti Dios ni riá la? qué rudiibe lugar guni binni ni racalaʼdxiʼ ne laaca qué ruchaabe ca ley stibe (Jud. 4). Ne cumu nácabe ti Dios ni riá la? qué zudiibe lugar guiaana ti binni ni maʼ bichee ne qué naʼ gaca arrepentir ndaaniʼ xquídxibe purtiʼ zanda cuʼ ni interu congregación lu peligru (Prov. 13:20; 1 Cor. 15:33).

¹⁵ Relatu riʼ rusiidiʼ ni laanu qué racalaʼdxiʼ Jehová guinitilú nin ti binni, sínuque ni racaláʼdxibe nga guilá de guiracaʼ. Riabe ca ni ruchaa modo laa ne runi stipa chuʼ gaxha de laabe (Ezeq. 33:11; biindaʼ 2 Pedro 3:9). Nga runi, ora guca arrepentir hombre de Corinto que ne bisaana de guni cosa ni cadi jneza que la? biquiiñeʼ Jehová apóstol Pablo para gabi interu congregación que guni perdonarcaʼ hombre que ne guidxaagalucaʼ laabe galán.

16. ¿Xi runi sentirluʼ pur Jehová ora riníʼ íqueluʼ modo guca tratar casu stiʼ hombre ni biʼniʼ ti pecadu grave ndaaniʼ congregación ni guyuu Corinto?

¹⁶ Ra bidúʼndanu ni bizaaca ndaaniʼ congregación ni guyuu Corinto maʼ gucaneni laanu guidúʼyanu ximodo rusihuinni Jehová guendarannaxhii, justicia ne guendaruni jneza (Sal. 33:5). ¿Cadi dxandíʼ racané ca cualidad ni rusihuinni Dios riʼ laanu chuuláʼdxinu gusisácanu laabe la? Ne cadi guiaandaʼ laanu, de guiranu nácanu binni ruchee ne caquiiñenu guni perdonarbe laanu. Rudiʼnu xquixe peʼ laabe pur maʼ bidiibe gatiʼ Jesús pur laanu para guixiá ca pecadu stinu. Ne nga racané laanu gatadxí ladxidoʼno purtiʼ nánnanu dxandíʼ nadxiibe ca xpínnibe ne racaláʼdxibe guibánicaʼ galán.

17. ¿Xi zazíʼdinu lu xcaadxi artículo ca?

¹⁷ Yanna, ca dxi stinu riʼ pa guni cometer tuuxa ti pecadu grave, ¿ximodo zanda gusihuinni ca ancianu guendarannaxhii stiʼ Jehová ne gacanecaʼ binni ca gaca arrepentir? ¿Ne xi zanda gúninu pa guiníʼ ca ancianu ca naquiiñeʼ guiree ti binni de ndaaniʼ congregación o guibiguetaʼ yaʼ? Zacábinu ca pregunta riʼ lu ca xcaadxi artículo ca.