Ximodo racanécabe ca ni maʼ biree de ndaaniʼ congregación

1, 2. a) ¿Ximodo ruuyaʼ Jehová ca ni maʼ biʼniʼ cometer ti pecadu ne qué naʼ gaca arrepentir? b) ¿Xi racalaʼdxiʼ Jehová?

QUÉ rudii Jehová lugar guni binni cosa malu ne laaca qué riuuláʼdxibe guni binni pecadu (Sal. 5:​4-6). Racaláʼdxibe guni respetar binni ca ley stibe ni zeeda lu Biblia ne qué racaláʼdxibe gácanu perfectu purtiʼ nánnabe nácanu binni ruchee (Sal. 130:​3, 4). Peru laaca rucaanabe «ca hombre ni qué runi respetar Dios, ca ni riquiiñeʼ guendanachaʼhuiʼ stiʼ Dios casi pretextu para gúnicaʼ cosa malu sin guituí lucaʼ» (Judas 4). Ne lu Biblia peʼ ná zunitilú Dios «ca binni ni qué runi respetar Dios» lu guerra stiʼ Armagedón (2 Ped. 3:7; Apoc. 16:16).

² Qué racalaʼdxiʼ Jehová guinitilú nin ti binni. Casi maʼ bidúʼyanu lu xcaadxi artículo ca lu Biblia riete ni racalaʼdxiʼ Jehová nga «gaca arrepentir guiráʼ binni» (2 Ped. 3:9). Naquiiñeʼ chinanda ca ancianu ejemplu stiʼ Jehová ora gacanécabe tuuxa ni maʼ biʼniʼ cometer ti pecadu grave, naquiiñeʼ gápacabe paciencia ti gaca arrepentir binni ca ne gaca xhamigu Jehová sti biaje. Peru cadi guiráʼ diʼ riuulaʼdxiʼ gacanécabe laacaʼ (Is. 6:9). Nuu tu laa qué riná diʼ guchaa neca stale biaje ruyubi ca ancianu ca gacanecaʼ laabe gaca arrepentirbe. Yanna, ¿xi naquiiñeʼ guni ca ancianu yaʼ?

«[LACUEE] BINNI MALU NI NUU LÁDETU CA»

3. a) Casi ná Biblia, ¿xi naquiiñeʼ gaca pa qué naʼ ti binni ni maʼ biʼniʼ ti pecadu grave gaca arrepentir? b) ¿Xiñee zanda guininu laapebe gulibe cueecabe laabe de ndaaniʼ congregación?

³ Pa tuuxa guni ti pecadu grave ne qué naʼ gaca arrepentir la? maʼ qué zanda diʼ guni ca ancianu ca sti cosa, ni naquiiñeʼ si gúnicabe nga chinándacabe ni zeeda lu 1 Corintios 5:​13, ni ná: «[Lacuee] binni malu ni nuu ládetu ca». Zanda guininu laapebe gucuaabe decisión ca, candísabe ni maʼ bidxiibabe (Gal. 6:7). ¿Xiñee yaʼ? Purtiʼ maʼ stale biaje gucalaʼdxiʼ ca ancianu ca gacanecaʼ laabe peru qué nabe (2 Rey. 17:​12-15). Pur ca ni maʼ bíʼnibe cusihuínnibe maʼ gudixhe íquebe maʼ qué zinándabe guiráʼ ni canabaʼ Jehová laabe gúnibe (Deut. 30:​19, 20).

4. ¿Xiñee riete ti anunciu ora ribeecabe tuuxa de ndaaniʼ congregación?

⁴ Ora ribeecabe tuuxa de ndaaniʼ congregación purtiʼ qué naʼ gaca arrepentir de ti pecadu grave ni biʼniʼ, riete ti anunciu ndaaniʼ congregación ne riníʼcabe maʼ cadi naca binni ca testigu stiʼ Jehová.a Qué riete diʼ anunciu ca para gusituícabe lú binni ca, sínuque para chinanda congregación mandatu ni zeeda lu Biblia ra ná cadi guidxaagacabe laabe ne cadi lica gonécabe laabe (1 Cor. 5:​9-11). Ne galán chinándanu ni gudixhe Jehová ca. Apóstol Pablo bicaa: «Caadxi si levadura runi fermentar guidubi naca cuba pan» (1 Cor. 5:6). Pa qué cueecabe ti binni ni qué naʼ gaca arrepentir de ndaaniʼ congregación la? zándaca guiníʼ ique ca xcaadxi hermanu qué risaca peʼ gúnicaʼ stipa guibánicaʼ modo riuulaʼdxiʼ Jehová ne chinándacaʼ ca ley stibe (Prov. 13:20; 1 Cor. 15:33).

5. ¿Ximodo naquiiñeʼ guidúʼyanu tuuxa ni maʼ cadi naca testigu stiʼ Jehová, ne xiñee?

⁵ Yanna, ximodo naquiiñeʼ guidúʼyanu ti binni ni maʼ cadi naca testigu stiʼ Jehová yaʼ? Neca qué ridxaaganu laabe, qué ridúʼyanu laabe casi ti binni ni maʼ qué zuchaa, sínuque zadúʼyanu laabe casi ti dendxuhuiiniʼ ni cananiti ne zanda guibiguetaʼ ra nuu pastor stiʼ. Cadi guiaandaʼ laanu gúdxibe Jehová zabánibe modo ná. Ne triste guininu ni peru yanna maʼ cadi nabánibe casi biʼniʼ prometerbe Jehová zúnibe ni ne ni dxandíʼ la? nuube lu ti peligru (Ezeq. 18:31). Peru laga nuuruʼ tiempu ne nuu Jehová listu para gusihuinni misericordia stiʼ, náparunu esperanza guibigueta binni ca ra nuu Jehová. Nga runi, ¿xi zanda guni ca ancianu para gacanecaʼ binni ca guibiguetaʼ ndaaniʼ congregación yaʼ?

XIMODO RACANÉ CA ANCIANU CA BINNI NI MAʼ BIREE DE NDAANIʼ CONGREGACIÓN

6. ¿Xi runi ca ancianu para gacanecaʼ tuuxa ni maʼ guleecabe de ndaaniʼ congregación?

⁶ Ora ribeecabe tuuxa de ndaaniʼ congregación, ¿xi runi ca ancianu? ¿Ñee rusaanacabe laabe ne maʼ qué rúnicabe gastiʼ para gacanécabe laabe guibiguétabe ra nuu Jehová la? Coʼ, qué rúnicabe nga. Ora gabi ti comité de ancianu ti binni maʼ chiguiree de ndaaniʼ congregación, rusiénecabe laabe xi zanda gúnibe para guibiguétabe. Peru cadi ngasi, stale biaje zabi ca ancianu ca laabe nápacaʼ gana gaca reunírnecaʼ laabe sti biaje ra tidiʼ chupa chonna beeu para gúʼyacaʼ pa maʼ bichaabe modo laabe. Pa nabe zanda la? lu sti reunión ni gapanécabe laabe, zuyubi ca ancianu ca né stale guendarannaxhii gacanecaʼ laabe gaca arrepentirbe ne guibiguétabe ndaaniʼ xquidxi Jehová. Peru pa caʼruʼ guchaabe modo laabe la? zúniruʼ ca ancianu stipa gaca reunírnecaʼ laabe gatigá.

7. ¿Xi runi ca ancianu ca para gusihuínnicaʼ riacaʼ binni ni maʼ biree de ndaaniʼ congregación cásica runi Jehová ni? (Jeremías 3:12).

⁷ Naquiiñeʼ guni ca ancianu ca stipa chinándacaʼ ejemplu stiʼ Jehová ne guiacaʼ binni ni maʼ biree de ndaaniʼ congregación. Guzéʼtenu ti ejemplu, dxiqué ora qué ruzuubaʼ ca israelita stiidxaʼ Jehová, qué riguiidxináʼ diʼ Jehová ne ribeza dede ora guibiguétacaʼ ra nuube, sínuque laapebe ruyúbibe modo gacanebe laacaʼ neca caʼruʼ gusihuínnicaʼ nápacaʼ gana gaca arrepentircaʼ. Casi bidúʼyanu lu guiropa artículo stiʼ serie riʼ, biquiiñeʼ Jehová ni bizaaca profeta Oseas para gusihuinni riene binni, gudxi Dios Oseas neca cucheeruʼ xheelaʼ guibiguetané laabe (Os. 3:1; Mal. 3:7). Cásica Jehová, de guidubi ladxidóʼ ca ancianu ca racaláʼdxicaʼ gaca arrepentir binni ca ne guibiguetaʼ ndaaniʼ xquidxi Jehová. Ne qué rúnicabe xiixa para gaca nagana para binni ca guibiguetaʼ (biindaʼ Jeremías 3:12).

8. ¿Ximodo racané parábola stiʼ hijo pródigo laanu guiénenu pabiáʼ nga riá Jehová binni? (Luc. 15:7).

⁸ Guietenaláʼdxinu parábola stiʼ hijo pródigo ni bizéʼtenu lu guiropa artículo stiʼ serie riʼ, casi biʼyaʼ bixhózebe laabe la? «bixooñeʼ ne gudiidxi laabe ne bidii bixiduʼ laabe» (Luc. 15:20). Raríʼ ridúʼyanu qué nibeza bixhózebe ninábabe perdón laa, sínuque laa peʼ biree ziguxooñeʼ para guidxaagalú laabe, cásica runi ti hombre ni nadxii xiiñiʼ. Ngaca nga ni runi sentir ca ancianu pur ca dendxuhuiiniʼ ni cananiti ne rúnicaʼ stipa gacanecaʼ laacabe guibiguétacabe ra nuu Jehová sti biaje (Luc. 15:​22-24, 32). Ora ribiguetaʼ ti binni ni maʼ bichee ra nuu Jehová la? riuu guendanayecheʼ guibáʼ. . . ¡ne ngaca lu Guidxilayú! (Biindaʼ Lucas 15:7).

9. ¿Xi canabaʼ Jehová ca ni maʼ biʼniʼ ti pecadu grave?

⁹ Casi maʼ bidúʼyanu, pa nuu tuuxa ni maʼ biʼniʼ ti pecadu grave ne qué náʼ gaca arrepentir la? qué zudii Jehová lugar guiaanabe ndaaniʼ xquidxi. Qué riníʼ diʼ ndiʼ rudxiideche Jehová laacabe, sínuque racaláʼdxibe guibiguétacaʼ ra nuube. Lu Oseas 14:4 ridúʼndanu ximodo ruuyaʼ Jehová ca binni ni raca arrepentir, nani: «Zusiandaʼ laacabe ne maʼ qué zucheenécabe naa ne naapiáʼ zannaxhieeʼ laacabe purtiʼ maʼ qué gapaʼ xiana». Nabé risaca guʼyaʼ ca ancianu ca ora maʼ cuchaa ti binni ne cuzulú cayaca arrepentir, ne laaca nabé risaca cadi gudii ca ni maʼ bixeleʼ de Jehová ca lugar tidiʼ stale tiempu para guibiguétacaʼ ra nuube.

10, 11. ¿Ximodo ruyubi ca ancianu ca gacanecaʼ ca binni ni maʼ xadxí de biree de ndaaniʼ congregación?

¹⁰ ¿Laga ca binni ni maʼ ziné stale iza de biree ndaaniʼ congregación yaʼ? Zándaca maʼ bisaana de gúnicabe pecadu ni bíʼnicabe para bireecabe de ndaaniʼ congregación ne zándaca maʼ qué rietenaláʼdxicabe xi pur bireecabe de ndaaniʼ congregación. Modo tiica si, naquiiñeʼ guyubi ca ancianu de guiráʼ ca binni riʼ ne chigánnacaʼ laacabe. Ne ora guidxélacabe ca binni riʼ, zanda guni orarnécabe laacaʼ ne cúʼcabe gana laacaʼ né stale guendarannaxhii para guibiguétacaʼ ndaaniʼ congregación. Peru pa maʼ napa stale iza de biree tuuxa de ndaaniʼ xquidxi Jehová la? zándaca nuube débil en sentidu espiritual. Nga runi, pa racaláʼdxibe guibiguétabe ra nuu Jehová, zabí ca ancianu ca ti hermanu o ti hermana para gudii estudiu laabe neca caʼruʼ guibiguétabe ndaaniʼ congregación. Ne ca ancianu ca nga naquiiñeʼ gúʼyacaʼ modo gacanécabe binni riʼ.

¹¹ Racalaʼdxiʼ ca ancianu ca guiacaʼ binni cásica runi Jehová ni. Nga runi, rúnicabe stipa, pa ganda la? guidxélacabe guiráʼ ca binni ni maʼ biree de ndaaniʼ xquidxi Dios ne rábicabe laacaʼ zuxeleʼ puertaʼ stiʼ xquidxi Jehová pa racaláʼdxicaʼ guibiguétacaʼ. Pa gusihuinni tuuxa maʼ guca arrepentir ne maʼ bisaana de guni pecadu ca la? zanda guibiguetaʼ ndaaniʼ xquidxi Dios nagueendaca (2 Cor. 2:​6-8).

12. a) ¿Pora nga naquiiñeʼ gapa ca ancianu stale cuidadu? b) ¿Xiñee cadi jneza guiníʼ íquenu qué ziuu dxi guiá Jehová ca binni ni biʼniʼ ti pecadu grave? (Biiyaʼ nota ca).

¹² Naquiiñeʼ gapa ca ancianu ca stale cuidadu ante gábicabe tuuxa maʼ zanda guibiguetaʼ ndaaniʼ congregación, casi tuuxa ni biʼniʼ abusar de ti menor, ca ni guca apóstata o ca ni laa peʼ biyubi ximodo guilaa xquendaxheelaʼ. Lu ca casu riʼ, naquiiñeʼ guʼyaʼ ca ancianu ca pa dxandíʼ maʼ guca arrepentirbe (Mal. 2:14; 2 Tim. 3:6). Naquiiñeʼ gapaʼ ca ancianu ca dendxuhuiinuiʼ ca. Peru laaca naquiiñeʼ guiénecabe racalaʼdxiʼ Jehová guicaa sti biaje ca binni ni gaca arrepentir de guidubi ladxidóʼ ne gusaana de guni cometercaʼ pecadu grave. Dxandíʼ, neca naquiiñeʼ gapa ca ancianu ca stale cuidadu ora guiníʼnecaʼ ca binni ni biʼniʼ cosa dxabaʼ o ni biʼniʼ traicionar la? qué zaníʼ íquecabe qué ziuu dxi guiá Jehová ca binni ni biʼniʼ tipu pecadu ca (1 Ped. 2:10).b

XI ZANDA GUNI CONGREGACIÓN

13. ¿Ximodo runi tratarnu ti binni ni maʼ guca censurar, ne ximodo runi tratarnu ti binni ni maʼ guleecabe de ndaaniʼ congregación?

¹³ Casi bidúʼyanu lu artículo gudiʼdiʼ ca, nuu biaje riete ti anunciu maʼ guca censurar ti binni, ndiʼ riníʼ zanda guidxaaganu binni ca purtiʼ maʼ guca arrepentirbe ne maʼ bisaana de gúnibe pecadu ca (1 Tim. 5:20). Nácarube parte de congregación ne caquiiñebe cuʼ ca hermanu gana laabe ne gacanecaʼ laabe gúnibe ni jneza (Heb. 10:​24, 25). Peru maʼ gadxé si ni ora ribeecabe tuuxa binni de ndaaniʼ congregación, óraca la? cadi naquiiñeʼ guidxaaganu laabe ne cadi lica naquiiñeʼ guidóʼnenu laabe (1 Cor. 5:11).

14. ¿Xiñee cada xpinni Cristu naquiiñeʼ chinanda conciencia stiʼ, pur ni maʼ biziidiʼ de lu Biblia, para guni decidir pa zadxiña tuuxa ni maʼ biree de ndaaniʼ xquidxi Dios? (Biiyaʼ ca imagen ca).

¹⁴ ¿Ñee riníʼ ndiʼ ora ribeecabe tuuxa de ndaaniʼ congregación, maʼ cadi naquiiñeʼ gulábinu laa la? Coʼ, cadi nga diʼ nga caniʼni. Dxandíʼ nga qué zadxaaganu laabe, peru cada xpinni Cristu naquiiñeʼ guʼyaʼ, pur ni maʼ biziidiʼ de lu Biblia, pa zudii conciencia stiʼ lugar laa guni invitar tuuxa ni maʼ biree de ndaaniʼ congregación cheʼ reunión, zándaca ti familia stiʼ o tuuxa ni guca xhamigu. Yanna, ¿ximodo naquiiñeʼ guni tratarnu binni ca pa cheʼ reunión yaʼ? Dxiqué la? qué rugapadiúxinu laacabe, peru yanna, maʼ cada xpinni Cristu naquiiñeʼ guʼyaʼ pa zinanda ni ná conciencia stiʼ pur ni maʼ biziidiʼ de lu Biblia. Purtiʼ nuu tu laa zuni sentir galán gudiináʼ laabe o guidxaagalú laabe. Peru ni qué zúninu nga, guinínenu laabe xadxí o gúninu xiixa ne guni invitarnu laabe chebe.

15. ¿Tudé nga riete lu 2 Juan 9-11? (Biiyaʼ cuadru ni láʼ «¿Ñee ngueca nga pecadu ni caníʼ Juan ne Pablo la?»).

¹⁵ Zándaca guinabadiidxanu: «¿Peru cadi Biblia peʼ ruzeeteʼ pa ugapadiúxinu ti binni zeeda gácani casi ñaca cayacanenu laa “lu ca cosa malu” ni cayuni la?» (biindaʼ 2 Juan 9-11). Lu ca versículo riʼ caniʼni de ca apóstata ne ca binni ni rucaa stobi guni cosa malu (Apoc. 2:20). Nga runi, pa ti binni rucaa xcaadxi chinanda ni ná ca apóstata o runi xcaadxi pecadu la? qué ziganna ca ancianu laabe. Qué riníʼ diʼ nga qué ziuu dxi guchaabe. Peru laga caʼruʼ guchaabe, qué zugapadiúxinu laabe ne qué zuni invitarnu laabe chebe reunión.

GUIÉNENU NE GUIANU BINNI CÁSICA RUNI JEHOVÁ

16, 17. a) ¿Xi racalaʼdxiʼ Jehová guni ca ni maʼ bichee? (Ezequiel 18:32). b) ¿Xi zanda guni ca ancianu para gacanecaʼ Jehová?

¹⁶ ¿Xi guiráʼ maʼ bizíʼdinu lu gaayuʼ artículo riʼ? Qué racalaʼdxiʼ Jehová guinitilú nin ti binni (Biindaʼ Ezequiel 18:32). Ni racaláʼdxibe nga guibiguetaʼ guiráʼ ca ni maʼ bichee ra nuube (2 Cor. 5:20). Nga runi, maca dede dxiqué stale biaje gunabaʼ Jehová ca ni bixeleʼ de laa gaca arrepentircaʼ ne guibiguétacaʼ ra nuube. Ne ti privilegiu naroʼbaʼ nga napa ca ancianu ra gacanecaʼ Jehová ne rúnicabe ni ora racanécabe ti binni ni biʼniʼ ti pecadu grave gaca arrepentir (Rom. 2:4; 1 Cor. 3:9).

¹⁷ ¡Nabé galán nga guxuíʼlunu pabiáʼ riéchecabe guibáʼ ora raca arrepentir ti binni ni maʼ bichee! Bixhózenu ni nuu guibáʼ, Jehová, guizáʼ riéchebe ora ruuyabe ribiguetaʼ ti dendxuhuiiniʼ stibe ndaaniʼ congregación. Cadi gusaana de guiníʼ íquenu pabiáʼ riene, riá ne nachaʼhuiʼ Jehová né binni. Pa gúninu ni la? zannaxhiinu laabe jma (Luc. 1:78).