Ximodo zanda uguu saanu gana laanu ora maʼ zigucheechenu diidxaʼ
1 Guiranu riuʼnu nayecheʼ ora gabi tuuxa laanu «ti diidxaʼ [...] ora caquiiñeʼ[nu]» ni (Pro. 25:11). Xi zanda gúninu ti guininu diidxaʼ ni uguu gana ca bíʼchinu o bizáʼnanu ora maʼ zigucheechenenu laacaʼ diidxaʼ yaʼ.
2 Guininu diidxaʼ ni uguu gana. Pa guininu de cani zeeda lu Stiidxaʼ Dios ora maʼ zigucheechenu diidxaʼ la? zaguʼnu gana cani guiréʼnenu (Sal. 37:30). Zanda gábinu laabe ximodo chiguinínenu binni o gábinu laabe xiixa bizaacanu ora yegucheechenu diidxaʼ ni nánnanu zaguu gana laabe (Hech. 15:3). Laaca zanda guinínenu laabe de xiixa ni bidúʼndanu lu Biblia, lu ca revista jma nacubi o xiixa ni bizíʼdinu lu guendaridagulisaa. Laaca zanda guzéʼtenu xiixa ni bizíʼdinu lu libana para guiráʼ binni ni bicaadiáganu ndaaniʼ Yoo stiʼ Reinu.
3 Nabé triste runi sentirnu ora chuʼ tu guinabadiidxaʼ laanu xiixa ne qué gánnanu xi guicábinu. Peru pa ni zinenu ca guizaaca zacá la? despué de guireʼnu ra yoo ca zanda iquiiñenu chupa chonna minutu para guluinu laabe ximodo zanda gúnibe ora guizaacabe zacá sti biaje ne zanda gúʼyanu xiná libru Razonamiento para gúninu ni. Ne pa guyuuláʼdxinu xiixa ni guníʼ ni zigucheechenenu diidxaʼ ca la? laaca zanda gábinu laabe guyuuláʼdxinu modo guniʼbe.
4 Biʼniʼ ni lii primé. Ñee nuu tuuxa ni ridagulisaa ra nuu grupu ni ruundaʼ libru ni caʼruʼ gucheechenenu diidxaʼ la? Pa guni invitarnu tobi de laacabe chigucheechené laanu diidxaʼ la? «zacané saa nu» (Rom. 1:12). Ca precursor regular nabé riéchecaʼ ora guiree tuuxa chigucheechené laacaʼ diidxaʼ, jmaruʼ si ora huaxiéʼ tu riree chigucheeche diidxaʼ, casi ora guireecabe siadóʼ guieʼruʼ o huadxí. Nga runi, zanda gábinu laacabe chigucheechenenu laacabe diidxaʼ. Ñee nuu tuuxa xpinni Cristu ni maʼ qué randa runi xhiiñaʼ Jiobá biaʼ biʼniʼ dxiqué purtiʼ huará la? Nabé zacanenu laabe pa guni invitarnu laabe ora chigúʼndanenu binni de Stiidxaʼ Dios (Pro. 27:17).
5 Pa guininu diidxaʼ ni gacané ca bíʼchinu ne ca bizáʼnanu la? zaguʼnu gana laacabe dede ora gúnicabe cosa ni jma nahuiiniʼ. Cadi guiaandaʼ laanu gúninu zacá ora gucheechenenu tuuxa diidxaʼ, ti zacá gacané saanu para uzuhuaa chaahuinu lu Stiidxaʼ Dios (1 Tes. 5:11).