Ximodo zanda gacanenu cani rucheechenenu diidxaʼ
1. Ximodo zanda chinándanu ejemplu stiʼ Pablu ora gucheechenenu diidxaʼ.
1 Ora maʼ nuu apóstol Pablu lade xcaadxi xpinni Cristu, ruyúbibe modo gacanebe laacaʼ (Rom. 1:12). Yanna laanu yaʼ, ñee ruyúbinu gacanenu ne uguʼnu gana cani rucheechenenu diidxaʼ la? Galán gábinu laacabe xi huayacané laanu gucheechenu diidxaʼ jma jneza yaʼ.
2. Ximodo zanda gacanenu xcaadxi xpinni Cristu para cadi guidxíbicaʼ gucheechecaʼ diidxaʼ, ne xiñee risaca gúninu ni.
2 Gacanenu laacabe cadi guidxíbicabe. Caadxi de cani rucheeche diidxaʼ raca nagana para laacaʼ guiníʼnecaʼ binni, ne rihuínnica ni lucaʼ ne modo riniʼcaʼ. Pa de ladxidoʼno gábinu ni cucheechenenu diidxaʼ ca biaʼsi modo guníʼ la? zacané nga laabe cadi guidxíbibe. Peru, ximódoruʼ zanda gacanenu laabe yaʼ. Ti binnigola ni riganna ca binni ridagulisaa guníʼ laaca ridxibi ne naquiiñeʼ guni orar gatigá para gacané Jiobá laa. Sicaríʼ guníʼ sti xpinni Cristu: «Naquiiñeʼ guxidxeʼ huiineʼ para cadi guihuinni pa cadxibeʼ. Peru nuu tiru dede naquiiñeʼ guneʼ orar para ganda guxidxeʼ». Ñee nuu xiixa ni racané laanu para cadi guidxíbinu ora gucheechenu diidxaʼ la? Xiñee qué gábinu ni cani rucheechenenu diidxaʼ.
3. Xi zanda guininu para gacanenu tuuxa gucheeche diidxaʼ jma jneza.
3 Guininu xi huayacané laanu. Xi huaninu o xi huanabadiidxanu binni para guinínenu laa diidxaʼ, ñee ruzéʼtenu xiixa ni bizaaca la? Ora riquiiñenu ca ejemplu ra zeeda modo guinínenu binni para gucheechenu diidxaʼ, ñee rininu xiixa ni cadi zeeda luni para ganda gucaadiaga binni laanu la? Xiñee qué gábinu ni xpinni Cristu ni cucheechenenu diidxaʼ ca yaʼ (Prov. 27:17). Ne ora maʼ zigánnanu sti binni, zanda gábinu ni zinenu ca xi racaláʼdxinu gúninu ne ximodo cá íquenu gúninu ni. Ne despué de guidúʼndanenu tuuxa zanda gábinu laabe xiñee bizéʼtenu xiixa o xiñee bidúʼndanu xiixa versículo, o xiñee gadxé modo bisíʼdinu binni ni yegánnanu ca.
4. Xiñee naquiiñeʼ guizaaláʼdxinu gacanenu cani rucheechenenu diidxaʼ.
4 Ca xpinni Cristu ni bibani lu primé siglu que cadi gudixhe íquesicaʼ gacanecaʼ binni ni nabeza ra rucheechecaʼ diidxaʼ, sínuque laaca biyúbicaʼ uguucaʼ gana xcaadxi xpinni Cristu ne gacanecaʼ laacabe (Hech. 11:23; 15:32). Nga runi bisiidiʼ apóstol Pablu Timoteu ne gudxi laabe gusiidibe cani maʼ biziidibe (2 Tim. 2:2). Pa zacaca gúninu né xcaadxi xpinni Cristu ora maʼ zigucheechenu diidxaʼ la? zacaneni laacabe chuuláʼdxicabe gucheechecabe diidxaʼ ne zúnicabe ni jma jneza. Ne ni jma risaca nga zusiéchenu Jiobá (Heb. 13:15, 16).