Modo gucheecheluʼ diidxaʼ jma jneza: gucané xcompañéruluʼ

Xiñee risaca gúniluʼ ni. Jesús biiyaʼ pabiáʼ risaca gucheechenenu stobi diidxaʼ, ngue runi dxi biseendabe 70 discípulo stibe chigucheechecaʼ diidxaʼ la? biseendabe laacaʼ chupa chupa (Luc. 10:1). Zanda gacaneluʼ xcompañéruluʼ pa gúʼyaluʼ qué ganda guicabi ni guinabadiidxacabe laa o guiníʼcabe xiixa ni guluíʼ qué nácabe gucaadiágacabe (Ecl. 4:9, 10). Byuiʼné laabe xi huayacané lii o zanda gaʼbuʼ laabe xi gúnibe para gucheechebe diidxaʼ jma jneza (Prov. 27:17). Zanda uguuluʼ gana ni cucheecheneluʼ diidxaʼ laga zetu sti yoo (Filip.4:8).

Ximodo zanda gúniluʼ ni:

Bicaadiaga chaahuiʼ ora maʼ caníʼ xcompañéruluʼ (Sant. 1:19). Ora maʼ cayuundabe ti textu lu Biblia la? yenanda laabe ra cayuundabe lu Biblia stiluʼ. Zacá zudiiluʼ cuenta pa caquiiñeʼ gacaneluʼ laabe.
Biiyaʼ pa caquiiñepeʼ guiniʼluʼ ne pora zanda gúniluʼ ni (Prov. 25:11). Pa chineluʼ tuuxa ora chigusiidiʼ binni de Biblia, nuu biaje ziuuláʼdxibe guiniʼluʼ xiixa ora maʼ cayuundanebe binni ca. Peru ora maʼ canagucheechetu diidxaʼ zándaca jma ziuuláʼdxibe gudiiluʼ lugar guiniʼbe yoo raca caber laabe. Yanna, pa nacubi cucheechebe diidxaʼ ne qué gánnabe ximodo guicábibe ni guinabadiidxacabe laabe o guiníʼcabe xiixa ni guluíʼ qué nácabe gucaadiágacabe, ziuuláʼdxibe gacaneluʼ laabe. Peru pa zineluʼ tuuxa ziucheechetu diidxaʼ o zigánnatu ti binni sti biaje, cadi gatigá maʼ cuchuuguluʼ lu stiidxabe, o maʼ guluíʼ lii nga cayuundaneluʼ binni ca o guchaaluʼ de tema ni caniʼbe.
Byuiʼné ni cucheecheneluʼ diidxaʼ xi huayacané lii. Pa gúʼyaluʼ caquiiñeʼ gaʼbuʼ laabe xiixa ni zanda gacané laabe gucheechebe diidxaʼ jma jneza la? gudxi ni laabe (Prov. 3:27). Nuu biaje zanda gaʼbuʼ laabe sicaríʼ: «Ximodo ruuyuʼ modo guníʼneluʼ binni ca» o «Ñee zaa gabeʼ lii xiixa ni zacané lii la?» o «Naa la? ndiʼ nga ni huayacané naa». Cadi guiaandaʼ lii, nuu biaje ziuuláʼdxibe gábiluʼ laabe xi zanda gúnibe, peru pa guiráʼ ora gaʼbuʼ laabe cadi jneza modo guniʼbe la? zareebe gana.

Biʼniʼ stipa guʼnuʼ ndiʼ beeu riʼ:

Ora maʼ biluxe bicheecheneuʼ tuuxa diidxaʼ gudxi laabe xi guniʼbe o xi bíʼnibe ni bicaa lii chuuláʼdxiluʼ gucheecheneluʼ laabe diidxaʼ.