Ximodo gusíʼdinu cani nacubi ca gucheechecaʼ diidxaʼ
1. Xi biʼniʼ sentirluʼ primé biaje bicheecheluʼ diidxaʼ.
1 Ñee rietenaláʼdxiluʼ primé biaje bicheecheluʼ diidxaʼ de yoo pur yoo la? Zándaca guizáʼ bidxíbiluʼ. Peru, cadi dxandíʼ gutadxí ladxidoʼloʼ purtiʼ nannuʼ nuu maestru stiluʼ o sti ni rucheeche diidxaʼ para gacané lii la? Yanna maʼ nácaluʼ ti xpinni Cristu ni maʼ xadxí de rucheeche stiidxaʼ Reinu; nga runi maʼ zanda gusiidiluʼ cani nacubi ca gucheechecaʼ diidxaʼ jneza.
2. Xi caquiiñeʼ guiziidiʼ cani nacubi.
2 Cani nacubi cucheeche diidxaʼ caquiiñeʼ guiziidicaʼ ximodo guzulú guiníʼnecaʼ binni, guiziidicaʼ iquiiñecaʼ Biblia ora maʼ zecaʼ de yoo pur yoo, gánnacaʼ xi guiniʼcaʼ ora chigánnacaʼ binni sti biaje ne guzulú gúʼndanecaʼ binni Biblia. Peru cadi ngasi, laaca naquiiñeʼ gánnacabe gunáʼ nga xcaadxi modo zanda gucheechecabe diidxaʼ, casi lu calle o ra nuu stale negocio. Ximodo zanda gacaneluʼ laacabe yaʼ. Ora guluiʼluʼ ne gábiluʼ laacabe ximodo gúnicabe ni.
3. Ximodo zanda gacanenu xcaadxi ora gúʼyacaʼ modo rucheechenu diidxaʼ.
3 Biluíʼ laacabe ximodo. Jesús biluíʼ ca discípulo stiʼ ximodo gucheechecaʼ diidxaʼ (Luc. 8:1; 1 Ped. 2:21). Ximodo zanda guʼnuʼ cásica biʼniʼ Jesús ca yaʼ. Ora maʼ gudixhe íqueluʼ guireeneluʼ tuuxa ni nacubi cucheeche diidxaʼ la? biyubi modo guzulú guiníʼneluʼ binni, peru cadi gácani nagana, ti ganda gúnibe cásica bíʼniluʼ ni, ne zanda iquiiñeluʼ cani reeda lu ca guiʼchiʼ ni ricaanu. Ora maʼ cucheechetu diidxaʼ la? zanda guiniʼluʼ ca primé yoo ca ti gucaadiágabe lii, ne laga maʼ zetu sti yoo, gunabadiidxaʼ laabe ximodo biiyabe ni guniʼluʼ, ne pa rábibe jneza modo bíʼniluʼ ni. Zacá zudii ni nacubi ca cuenta pabiáʼ risaca nga gucheechebe diidxaʼ ne xcaadxi binni ne qué zaca nagana para laabe guicaabe xiixa conseju gudiiluʼ laabe despué de guiníʼnebe tuuxa binni.
4. Ximodo zanda gacanenu tuuxa ni nacubi cucheeche diidxaʼ despué de gucaadiáganu modo riniʼbe.
4 Gudxi laacabe ximodo. Jesús laaca gudxi ca discípulo stiʼ ximodo gucheechecaʼ diidxaʼ (Mat. 10:5-14). Zanda guʼnuʼ casi bíʼnibe. Ora maʼ gaca caber ni nacubi ca guiníʼ la? bicaadiaga chaahuiʼ laabe. Guireesitu de ra yoo ra guníʼnetu ti binni la? cadi guiaandaʼ lii gábiluʼ laabe galán modo bisiénebe xiixa, neca nuuruʼ xcaadxi cosa ni caquiiñeʼ gúnibe jma jneza. Pa biiyaluʼ cadi jneza modo guniʼbe xiixa la? cadi nagueendaca gábiluʼ laabe xi gúnibe; jma galán cuézaluʼ para gúʼyaluʼ pa zacaca gúnibe ni sti yoo gaca caber laabe. Zándaca cadxíbibe óraque. Bietenalaʼdxiʼ cadi guirádinu nga nápanu ngueca gracia para gucheechenu diidxaʼ ne nuuruʼ xcaadxi modo zanda gaca ca cosa ca jneza (1 Cor. 12:4-7).
5. Xi zanda guiniʼluʼ ora quixhe íqueluʼ gudiiluʼ xiixa conseju.
5 Nuu tiru laaca ni rucheeche diidxaʼ ca nga guinabaʼ laanu xiixa conseju. Pa qué gúnibe ni la? zanda gaʼbuʼ ni laabe, peru biyubi ximodo guiniʼluʼ. Stale de ca xpinni Cristu ni maʼ xadxí de rucheeche diidxaʼ riniʼcaʼ: «Ñee zanda gabeʼ lii xiixa ni zacané lii la?», o «Ñee guyuuláʼdxiluʼ modo guníʼneluʼ binni ca la?». Laaca zanda gaʼbuʼ laabe: «Dxi bizuluáʼ bicheecheʼ diidxaʼ la? nabé guca nagana para naa..., peru ni gucané naa nga...». Ziuu biaje jma galán gúʼndatu xiná libru Razonamiento. Peru cadi gábiluʼ laabe stale cosa tobi si tiru pacaa zareebe gana; bizeeteʼ de ti cosa si ni zanda gacané laabe.
6. Ximodo zanda gacanenu xcaadxi para guiziidicaʼ gucheechecaʼ diidxaʼ jma jneza.
6 Zanda gacanenu sti binni. Neca maʼ xadxí de rucheeche Timoteu diidxaʼ la? gudxi Pablu laabe naquiiñeruʼ gusiidiʼ chaahuibe ne guiniisibe jma lu stiidxaʼ Dios (1 Tim. 4:13, 15). Nécapeʼ maʼ gudiʼdiʼ stale iza dede primé biaje bicheecheluʼ diidxaʼ la? qué riquiiñeʼ gusaana de guiziidiluʼ ximodo gúniluʼ ni jma jneza. Biziidiʼ de xcaadxi ni rucheecheneluʼ diidxaʼ, dede ne cani cadi tan xadxí de cayúnini. Ne guyuu listu para gacaneluʼ xcaadxi xpinni Cristu peru guca nachaʼhuiʼ ora guʼnuʼ ni, jmaruʼ si ne cani nacubi, ti gácacabe maestru ni ganna gusiidiʼ ca diidxaʼ nacubi ne galán ca jma jneza (Pro. 27:17).