Ñee maʼ biluiʼluʼ binni ximodo ridúʼndanenu tuuxa de Biblia primeca biaje chigánnanu laa la?

Ora rábinu binni pa zadúʼndanenu laacaʼ Biblia, caadxi de laacaʼ riniʼcaʼ qué riuuláʼdxicaʼ o maʼ cayuundanécabe laacaʼ ra yuʼduʼ sticaʼ. Cumu huaxiéʼ nánnacabe ximodo nga ridúʼndanenu binni Biblia la? qué ruxuiʼlúcabe xi guiráʼ zaziidicabe ne pabiáʼ galán ni. Nga runi, ora gábiluʼ tuuxa pa zuundaneluʼ laa Biblia la? cadi ngasi nga ni naquiiñeʼ guʼnuʼ, sínuque biquiiñeʼ chupa chonna minutu para guluiʼluʼ laabe ximodo rácani primeca biaje chigannuʼ laabe. Zeeda gácani casi ora ñábiluʼ ti binni nanixe ruʼnuʼ guendaró ne zabiguétaluʼ para gudiiluʼ laabe ti bladu guendaró; ñee cadi jma galán nudiiluʼ laabe caadxi oraqueca para gúʼyabe dxandíʼ nanixe ni la? Raríʼ zeeda ximodo zanda guʼnuʼ ni bizéʼtenu ca lu chupa chonna minutu si, ra iquiiñeluʼ ni beeda lu yaza 6 stiʼ Xhiiñaʼ Reinu ni Rúninu enero 2006:

«Ñee raʼbuʼ ziuu ti dxi gaca ni na ca diidxaʼ zeeda raríʼ la? [Biindaʼ Isaías 33:24, ne guleza guicábibe.] Ñuuladxeʼ nulueeʼ lii xiixa nabé risaca de tema ni caninu riʼ.» Bidii laabe ti libru Xipeʼ ndiʼ cusiidiʼ Biblia ne gudxi laabe guyúbibe párrafo 22 ni zeeda lu yaza 36. Biindaʼ guendarinabadiidxaʼ ni cá ñee yaza ca ne gudxi laabe gúnibe stipa pur guidxélabe ni guicábibe laga cayuundaluʼ párrafo ca. De racá gunabadiidxaʼ laabe ni cá ñee yaza ca sti biaje ne bicaadiaga xi guicábibe. Biindané laabe stobi de ca textu ca. Gunabadiidxaʼ laabe xiixa ni guicábiluʼ sti biaje chigannuʼ laabe, ne gudíxheca padxí guibiguétaluʼ. Pa guʼnuʼ zacá la? ¡mápeca bizulú cayuundaneluʼ ti binni de Biblia!