Iquiiñenu folletu Ca diidxaʼ sicarú ni zeeda de Dios para gusíʼdinu binni
1. Ximodo guca folletu Ca diidxaʼ sicarú ni zeeda de Dios.
1 Casi bidúʼndanu lu tema stiʼ Xhiiñaʼ Reinu ni Rúninu beeu julio, herramienta ni jma riquiiñenu para gusíʼdinu xcaadxi binni ni dxandíʼ nga folletu Ca diidxaʼ sicarú ni zeeda de Dios. Nin ti versículo qué ñaca copiar lu folletu riʼ ti ganda guʼndaʼ estudiante stinu ni ndaaniʼ Biblia stiʼ. Stale de ca publicación stinu, raca cani para ganda guiene binni cani stubi si. Peru folletu riʼ maʼ gadxé ni, purtiʼ caquiiñeʼ chuʼ tu gusiidiʼ binni guiene ni. Nga runi, ora guluinu ni tuuxa, gúninu stipa gusíʼdinu laa ximodo ridúʼndanenu binni Biblia ne zacá ziuulaʼdxiʼ ganna xii nga ca diidxaʼ sicarú ni zeeda de Dios (Mat. 13:44).
2. Ximodo zanda iquiiñenu folletu Ca diidxaʼ sicarú ni zeeda de Dios primé biaje chigánnanu binni.
2 Primé biaje chigánnaluʼ binni. Zanda guiniʼluʼ: «Stale binni riuu xizaa ora gunadiágacaʼ guiráʼ ni rieeteʼ lu noticia ne riníʼ íquecaʼ xi guizaaca xa de laacaʼ despué. Ñee rábiluʼ zuchaa modo nabani binni la? [Guleza guicábibe.] Lu Biblia zeeda caadxi diidxaʼ sicarú ni cayabi laanu zaca chaahuiʼ modo nabani binni. Folletu riʼ culuíʼ ximodo ricabi Biblia caadxi guendarinabadiidxaʼ». Bidii laabe folletu ca ne gudxi laabe cuibe tobi de ca guendarinabadiidxaʼ zeeda lu últimu yaza stini. Biquiiñeʼ primé párrafo stiʼ ndaa gulibe ca para guluiʼluʼ laabe ximodo ridúʼndanenu binni Biblia. Sti cosa ni zanda gúniluʼ nga cuiluʼ xiixa guendarinabadiidxaʼ zeeda lu tobi de ca ndaa stiʼ folletu ca para guluiʼluʼ laabe ximodo ricabi Biblia ni. Pa nuu ti videu lu jw.org ni cusiene ndaa ca la? zanda iquiiñeluʼ ni lu presentación stiluʼ.
3. Bisiene ximodo iquiiñenu folletu Ca diidxaʼ sicarú ni zeeda de Dios para guidúʼndanenu binni Biblia.
3 Ximodo iquiiñeluʼ ni para gúʼndaneluʼ binni Biblia. 1) Biindaʼ guendarinabadiidxaʼ dieʼ nayaaseʼ ra zeeda ti númeru para ganna binni ca xidé chiguiziidiʼ. 2) Oracaruʼ biindaʼ párrafo ca. 3) Biindaʼ ca textu cá né letra cursiva ne para gacaneluʼ binni ca guʼyaʼ ximodo ricabi Biblia guendarinabadiidxaʼ dieʼ nayaaseʼ ca la? zanda gúniluʼ xcaadxi guendarinabadiidxaʼ. 4) Pa napa guendarinabadiidxaʼ ca chupa chonna párrafo la? biʼniʼ ni na puntu 2 ne 3. Pa nuu ti videu ni cacabi guendarinabadiidxaʼ ca ne caʼruʼ guluiʼluʼ ni laabe la? zanda gúʼyatu ni ora maʼ cayuundatu. 5) Últimu, gunabaʼ binni ca guicabi guendarinabadiidxaʼ ca, zacá zudiiluʼ cuenta pa maʼ biene ni cayuundaʼ.
4. Xi zacané laanu iquiiñenu folletu riʼ jneza.
4 Binibiáʼ chaahuiʼ folletu nabé risaca riʼ ne biquiiñeʼ ni ora tiica. Ante gúʼndaneluʼ estudiante stiluʼ, guníʼ ique laa ne ximodo zanda iquiiñeluʼ ca versículo stiʼ cada ndaa para gacaneluʼ laa guiene ni caziidiʼ (Prov. 15:28; Hech. 17:2, 3). Pa guiziidiluʼ iquiiñeluʼ folletu riʼ jneza la? jma ziuuláʼdxiluʼ iquiiñeluʼ ni para gusiidiluʼ xcaadxi binni ni dxandíʼ.