Chigusaananenu binni folletu cubi
1. Xi zusaananenu binni lu beeu noviembre, ne ximodo zanda gacaneni binni.
1 Lu Guendaridagulisaa de Chonna Gubidxa ni guca lu iza 2009 ni biree lá: «¡Lagataná!», biree ti folletu nacubi. Ñee rietenaláʼdxiluʼ de laani la? Folletu que lani Cani zeeda lu Biblia. Lu beeu noviembre zaca ti dxiiñaʼ lu guidubi Guidxilayú para gusaananenu binni folletu riʼ, ne ndiʼ nga primé biaje chigusaananenu ni binni. Ximodo zanda gacaneni ca binni ni nuu neza ra rucheechenu diidxaʼ yaʼ. Cadi guiaandaʼ laanu, stale binni huaxiéʼ nanna de cani rusiidiʼ Biblia, ne jmaruʼ si cani napa ti religión ni qué runi cré Cristu. Ni zeeda lu yaza 3 stiʼ folletu riʼ, «zanda gacané lii gánnaluʼ chupa chonna de ca cosa ni jma rusiidiʼ Biblia».
2. Ximodo zanda gusaananenu binni folletu riʼ.
2 Ximodo gusaananenu ni binni. Zanda guininu sicaríʼ: «Ñuuladxeʼ ñannaʼ xi riníʼ íqueluʼ de ca diidxaʼ riʼ [biindaʼ 2 Timoteo 3:16]. Stale de ca binni ni maʼ guninedu nacaʼ jneza ni na ca diidxaʼ zeeda lu textu ca, peru xcaadxi binni ruuyacaʼ Biblia casi sti libru ni galán. Yanna lii, xi riníʼ íqueluʼ de laani [guleza guicábibe]. Nuu stale razón para guidúʼndanu Biblia neca de intiica religión laanu [biindaʼ párrafo ni cá ra ruzulú yaza 3]. Ra maʼ ziyuundaluʼ folletu riʼ zaziidiluʼ chupa chonna de ca cosa ni jma rusiidiʼ Biblia ne zuuyaluʼ de ti cosa si nga ruzeeteʼ Biblia».
3. Xi sti modo zanda guinínenu binni ni qué runi cré cristu.
3 Pa nuu binni ni qué runi cré cristu neza ra rucheechenu diidxaʼ la? ndiʼ nga sti modo zanda guinínenu laacabe: «Ñuuláʼdxidu ñánnadu xi riníʼ íqueluʼ de ca diidxaʼ ni zeeda lu Biblia riʼ (o, libru risaca riʼ) [biindaʼ Salmo 37:11]. Ximodo rábiluʼ zaca Guidxilayú riʼ ora maʼ gaca ni na ca diidxaʼ riʼ [guleza guicábibe]. Ni bidúʼndanu ca nga tobi de ca cosa ni ruzeeteʼ Biblia zanda quixhedxí ladxidóʼ binni de guirá guidxi ne ni napa gadxé gadxé religión». Biindaʼ primé párrafo stiʼ yaza 3 ne bisaanané laabe folletu ca.
4. Ximodo zanda guzulú gúʼndanenu binni Biblia ra iquiiñenu folletu ca.
4 Para guzulú gúʼndanenu binni. Ora chigánnanu binni sti biaje, zanda gusietenaláʼdxinu laabe ni guninenu laabe primé biaje, de racá iquiiñenu ca guendarinabadiidxaʼ ni cá ñee yaza stiʼ folletu ca para gúʼndanenu laabe tobi o chupa párrafo ni cuzeeteʼ de tema ni caninenu laabe. O pa maca racaláʼdxinu gusaananenu binni libru Xipeʼ ndiʼ cusiidiʼ Biblia la? zanda gúʼndanenu laabe últimu yaza stiʼ folletu ca, gusaananenu laabe libru ca, guinabadiidxanu laabe xi capítulo stini ñuuláʼdxibe ñánnabe xiná, ne gúʼndanenu laabe tobi o chupa párrafo sti capítulo ca. ¡Galán pa guiranu gúninu stipa pur gusaananenu binni folletu riʼ lu beeu noviembre!