Guidúʼndanenu ca binni biaanané revista
1. Xiñee rusaananenu binni revista.
1 Guiráʼ sábadu rusaananenu binni revista Torre stiʼ ni rapa ne ¡Despertad! ora maʼ zigucheechenu diidxaʼ. Ndiʼ nga ni naquiiñeʼ gúninu primé ti ganda guibiguétanu ra nuu binni para gusíʼdinu laa jma de Jiobá. Lu guiʼchiʼ riʼ zadxélanu ximodo zanda gusaananenu binni libru Xipeʼ ndiʼ cusiidiʼ Biblia primé biaje chigánnanu laacaʼ ne guzulú guidúʼndanenu laacaʼ Biblia. Zanda gúninu ni modo jma ganda guiene ca binni nabeza neza ra rucheechenu diidxaʼ ne gúninu ni casi ora maʼ cayuinu diidxaʼ, o zanda iquiiñenu xcaadxi modo ni huayacané laanu.
2. Ximodo zanda iquiiñenu ca primé yaza stiʼ libru Xipeʼ ndiʼ cusiidiʼ Biblia para guzulú guidúʼndanenu binni Biblia.
2 Iquiiñenu ca yaza ruzuluneni. Ora guibiguetaʼ chigánnanu binni ca zanda guininu: «Ca revista ni bisaananiáʼ lii que la? zeeda guiníʼ cani de Biblia. Biaa guʼyuʼ pabiáʼ risaca nga guidúʼndanu ni». Guidúʼndanu Isaías 48:17, 18; Juan 17:3, o sti textu ni zanda gúʼndanu. De racá, gusaananésinu laabe libru Xipeʼ ndiʼ cusiidiʼ Biblia zanda guininu:
◼ «Biblia cayabi laanu nabé sicarú nga guiráʼ ni cabézanu gaca.» Guluinu binni ca guiráʼ dibuju zeeda lu yaza 4 ne 5, ne guinabadiidxanu laabe: «Xi tobi de cani cayuuyaluʼ raríʼ ñuuláʼdxiluʼ ñaca yaʼ». De racá guxhálenu capítulo ra zeeda ni guyuulaʼdxiʼ binni ca ne pa nabe la? guidúʼndanenu laabe tobi o chupa párrafo stini.
◼ Laaca zanda gábiluʼ laabe: «Biblia ricabi stale cosa ni rinabadiidxaʼ binni lu xquendanabani». Guxhálenu libru ca lu yaza 6 ne gábinu laabe pa huayuu dxi guinabadiidxabe laca laabe cani zeeda lu yaza ca. De racá, guyúbinu capítulo ni cacabi guendarinabadiidxaʼ ni guníʼ binni ca ne guidúʼndanenu laabe tobi o chupa párrafo stini.
◼ Laaca zanda iquiiñeluʼ guiropa yaza stiʼ libru ca para guluiʼluʼ laabe xi tema jma riuuláʼdxibe gánnabe. De racá la? guyúbinu tema ni guyuuláʼdxibe ca ne guluinu laabe ximodo ridúʼndanenu binni Biblia.
3. Ximodo zanda guzulú guidúʼndanenu binni Biblia gusaananésinu laacaʼ revista ni zeeda guiníʼ de 1) ximodo cadale guendanagana lu guidxilayú riʼ 2) familia 3) ximodo zanda guni crenu ni cá lu Biblia.
3 Guinabadiidxanu xiixa para guicábinu despué. Sti modo zanda gúninu nga guinabadiidxanu binni ca xiixa ni zanda guicábinu ora chigánnanu laa. Pa guiaananebe ca revista ca la? galán guinabadiidxanu xiixa ne gábinu laabe zabiguétanu sti biaje para guicábinu ni. Gúninu stipa pur guibiguétanu (Mat. 5:37). Ora guibiguétanu la? gusietenaláʼdxinu laabe guendarinabadiidxaʼ que, ne guidúʼndanenu laabe tobi o chupa párrafo stiʼ libru Xipeʼ ndiʼ cusiidiʼ Biblia ra zeeda ni cacabi guendarinabadiidxaʼ ca. Zanda gudiʼnu laabe ti libru ti ganda chinándabe ra cadúʼndanu. Yanna chiguidúʼyanu chupa chonna guendarinabadiidxaʼ ni zanda iquiiñenu:
◼ Pa revista ni bisaananenu binni ca zeeda guiníʼ ximodo cadale guendanagana lu guidxilayú riʼ la? zanda guiniʼluʼ: «Ñee nannuʼ xi guiráʼ chiguchaa Dios lu Guidxilayú riʼ la? Ora gueeda gannaʼ lii sti biaje, ñuuladxeʼ nicabeʼ ni ne Biblia». Ora guibiguétanu sti biaje zanda iquiiñenu ca yaza 4 ne 5. Laaca zanda guinabadiidxanu laabe: «Ñee Dios nga na guizaaca ca desgracia ca la?». Ora guibiguétaluʼ, zanda guluiʼluʼ laabe ni zeeda lu párrafo 7 ne 8 stiʼ capítulo 1.
◼ Pa revista ca zeeda guiníʼ de familia la? ante guireʼnu de ra lidxi binni ca zanda guinabadiidxanu laa: «Xi raʼbuʼ zanda guni cada tobi de ca binnilidxi binni para chuʼcaʼ nayecheʼ yaʼ». Sti biaje chigánnanu binni ca la? guidúʼndanenu laabe párrafo 4 stiʼ capítulo 14.
◼ Pa revista ca caniʼni xiñee naquiiñeʼ guni crenu ni na Biblia la? zanda guinabadiidxanu laabe ni zeeda raríʼ ne guicábinu ni ora chigánnanu laabe: «Ñee biaʼsi ni rusiidiʼ Biblia ne ni rusiidiʼ ciencia la?». Ora guibiguétanu sti biaje ra nuu binni ca guidúʼndanenu laabe ni zeeda lu párrafo 8 stiʼ capítulo 2.
4. Xi naquiiñeʼ gúninu pa qué naʼ binni guiaanané libru Xipeʼ ndiʼ cusiidiʼ Biblia yaʼ.
4 Cada chigánnanu binni zanabadiidxanu laa xiixa para guicábinu ora guibiguétanu sti biaje. Ora maʼ bíʼndanenu binni ca tema ni gulí ne riuuláʼdxiruʼ guiziidiʼ jma de lu Biblia la? zanda guzulunu dede primé capítulo stiʼ libru ca dede guiluxe ni. Yanna, xi naquiiñeʼ gúninu pa qué naʼ binni ca guiaanané libru Xipeʼ ndiʼ cusiidiʼ Biblia yaʼ. Zanda chisaanarunu revista ra nuube ne guinínenu laabe diidxaʼ de lu Biblia. Pa qué gusaananu de guinínenu laabe de Stiidxaʼ Dios la? zándaca despué chuuláʼdxibe guidúʼndanenu laabe Biblia.
5. Xiñee naquiiñeʼ gúninu stipa pur guidúʼndanenu ca binni ni guiaanané ca revista stinu.
5 Revista Torre stiʼ ni rapa ne ¡Despertad! ca zanda gucaa cani binni guiziidiʼ cani dxandíʼ cusiidiʼ Biblia. Nga runi, naquiiñeʼ gúninu stipa pur guidúʼndanenu ca binni ni guiaanané ca revista stinu. Zacá zuzúʼbanu ca diidxaʼ guníʼ Jesús de gusíʼdinu binni sananda laa ne gusíʼdinu laacaʼ gúnicaʼ ni na Dios (Mat. 28:19, 20).