¡Guyuu listu para gusaananeluʼ binni revista ¡Despertad! stiʼ noviembre ni zeeda guiníʼ de ti tema si!
1 Stale binni rinabadiidxaʼ pa dxandíʼ risaca Biblia. Ne riniʼcaʼ: «Pa binni bicaani, xiñee nácabe Stiidxaʼ Dios ni yaʼ. Xiñee naquiiñeʼ guneʼ ni nani. Ñee zacaneni naa pa cuee tiempu stinneʼ, ne guneʼ stipa para guundaʼ ne guieneʼ chaahueʼ ni la? Cumu gadxé gadxé clase Biblia nga nuu, gunapeʼ nga ni naquiiñeʼ guundaʼ yaʼ». Ca guendarinabadiidxaʼ riʼ nga ni cacabi revista ¡Despertad! ni chiguiree lu beeu noviembre. Tema stiʼ ni láʼ «Ñee zanda guni crenu Biblia la?».
2 Galán quixhe íquenu gudiʼnu revista riʼ guiráʼ binni nabeza neza ra rucheechenu diidxaʼ. Nga runi galán gúniluʼ pa gucheecheluʼ diidxaʼ guiráʼ sábadu stiʼ beeu noviembre. Biluíʼ revista riʼ ca binnilídxiluʼ, ca xpesínuluʼ, cani runineluʼ dxiiñaʼ, ca maestru stiluʼ, cani rineluʼ scuela ne cani biaananeluʼ chigannuʼ laacaʼ stiʼ biaje. Cadi guiaandaʼ chineluʼ ca revista ca ora chisiluʼ ne ora guireeluʼ de viaje. Ca binnigola maʼ gunábacaʼ stale revista para gudiicaʼ laanu biaʼ iquiiñenu.
3 Bizulú biindané binni: Ora tuuxa guiaanané ti revista la? ante guiluxe guiníʼneluʼ laa biyubi ximodo chuulaʼdxiʼ guiziidiʼ jma ora guibiguétaluʼ sti biaje. Zanda guiniʼluʼ sicaríʼ: «Ñee nánnaluʼ xi maca gudixhe ique Dios guni lu Guidxilayú riʼ la? Ñuuladxeʼ nidideʼ ra nuuluʼ sti biaje para nuluéʼ lii xi cacabi Biblia de laani». Ora guibiguétaluʼ ra nuube yené libru Xipeʼ ndiʼ cusiidiʼ Biblia ne biluíʼ laabe yaza 4 ne 5 stiʼ libru ca, o pacaa biluíʼ laabe párrafo 1 hasta 3 stiʼ capítulo 3. Laaca zanda gábiluʼ laabe sicaríʼ: «Ñuuladxeʼ ninieniáʼ lii ximodo cayaca ni na ca diidxaʼ ni maca cá lu Biblia ora guibiguetaʼ sti biaje». Ora guibiguétaluʼ la? zanda guluiʼluʼ laabe capítulo 9 stiʼ libru Xipeʼ ndiʼ cusiidiʼ Biblia ne gúʼndatu párrafo 1 hasta 3. O zanda guiniʼluʼ: «Nabé nagana raca para stale de laanu guiénenu Biblia. Ñuuladxeʼ nibiguetaʼ sti dxi para nuluéʼ lii ximodo zanda guiéneluʼ ni gúʼndaluʼ ndaaniʼ Biblia». Ora guibiguetaʼ chigánnaluʼ binni ca, biluíʼ laabe libru Xipeʼ ndiʼ cusiidiʼ Biblia ne gudxi laabe ximodo riuundaʼ ni.
4 Ndaaniʼ Biblia si nga zanda guidxélanu ni cayabi Dios laanu ne ni zanda gacané para guilanu (2 Tim. 3:15). Dxandipeʼ, ziuuláʼdxinu gucheechenu diidxaʼ ne stale gana ora quíʼzinu revista ¡Despertad! ni zeeda guiníʼ de ti tema si ca, ne zacané ni stale binni guni cré ni cá lu Biblia.