Revista ¡Despertad! stiʼ beeu septiembre zaníʼ ni de ti tema si
1 Stale binni riuulaʼdxiʼ gunadiaga ora maʼ cayuundaʼ ca manihuiiniʼ, ne gúʼyacaʼ ora maʼ ziyaaziʼ gubidxa. Peru stale binni qué runi cré pa Bixhózenu ni nuu guibáʼ ne ni nadxii laanu nga bizáʼ cani. Laanu zanda gábinu laacabe Jiobá nga bizáʼ guiráʼ xixé ni nuu ora quíʼzinu revista ¡Despertad! ni zeeda guiníʼ de ti tema ca si (Isa. 40:28; 43:10). Caninu de revista ¡Despertad! stiʼ beeu septiembre, laani caníʼ ni de tema riʼ: «Nuu tu bizáʼ guiráʼ xixé ni nuu la?».
2 Neza ra rucheechenu diidxaʼ. Pa ganda la? guyuu listu para gucheecheluʼ diidxaʼ de yoo pur yoo ne cani ridagulisaaneluʼ guiráʼ sábadu. Laaca zanda gusaananeluʼ binni revista riʼ intiisi dxi ndaaniʼ semana. Zándaca cani jma ziuulaʼdxiʼ revista riʼ nga ca maestru, ne stuudxi binni runi dxiiñaʼ ra riziidicabe. Nga runi, pa tobi de ca binni riʼ nabeza neza ra rucheechenu diidxaʼ la? naquiiñeʼ guʼyaʼ chaahuinu padxí ne pora chigánnanu laacabe.
3 Pa binni ni caníʼneluʼ ca riuulaʼdxiʼ gucaadiaga la? zanda guinabadiidxaluʼ laabe xiixa para guicábiluʼ ni ora guibiguétaluʼ chigánnaluʼ laabe sti biaje. Zanda guiniʼluʼ sicaríʼ: «Pa ni bizáʼ guiráʼ xixé ni nuu riʼ nadxii laanu, xiñee cudiibe lugar tiidiʼ binni stale yuubaʼ yaʼ». De racá ora chigánnaluʼ laabe sti biaje zanda guluiʼluʼ laabe primé capítulo o capítulo 11 stiʼ libru Xipeʼ ndiʼ cusiidiʼ Biblia. O pa coʼ zanda guiniʼluʼ, xii nga nexheʼ guni ni bizáʼ guiráʼ xixé ni nuu riʼ lu Guidxilayú, ne ora guibiguétaluʼ guluiʼluʼ laabe capítulo 3.
4 Ra scuela. Pa rieluʼ scuela, xiñee qué gusigáʼdeluʼ revista ¡Despertad! ni caníʼ de ti tema riʼ si cani rineluʼ scuela ne ca maestru stiluʼ yaʼ. Ne quíxhesiluʼ tobi ni ra ribiluʼ zándaca chuʼ tu guinabadiidxaʼ lii de ni runi crenu. Ora maʼ cusiidiʼ maestru stiluʼ ne guinabadiidxabe xiixa, zándaca ni bíʼndaluʼ lu revista ca gacaneni lii guiniʼluʼ de ni runi creluʼ, ne laaca zacaneni lii ora gúniluʼ xiixa dxiiñaʼ gusaananécabe lii ra scuela. Para gacaneni lii lu cani gúniluʼ la? revista riʼ né ni ti tema ni láʼ: «Ximodo zanda guiniéʼ nuu tobi ni bizáʼ guiráʼ xixé ni nuu yaʼ» lu ndaa ra na «Ni rinabadiidxaʼ cani nahuiiniʼ...».
5 Jiobá nga naquiiñeʼ gudxíʼbanu ne gusisácanu pur guiráʼ ni maʼ biʼniʼ (Apo. 4:11). Zanda gudxíʼbanu ni bizáʼ guiráʼ xixé ni nuu ne gacanenu stuudxi binni para guni zacaca pa quíʼzinu ¡Despertad! stiʼ beeu septiembre ca ne stale guendanayecheʼ.