Guidúʼndanenu cani rusaananenu revista guiráʼ beeu
1. Xiñee galán chisaananu revista guiráʼ beeu ra nuu ca binni ni riuulaʼdxiʼ guʼndaʼ cani.
1 Stale binni qué riuuláʼdxipeʼ gúʼndanenu laacaʼ Biblia, peru riuuláʼdxicaʼ gúʼndacaʼ ca revista stinu. Nga runi, maʼ xadxí rabi xquidxi Dios laanu chisaananu revista ra nuucabe guiráʼ beeu. Ora guʼndaʼ binni ca revista ca gatigá zucaacani laacaʼ chuuláʼdxicaʼ guiziidicaʼ jma de stiidxaʼ Dios (1 Ped. 2:2). Ne zándaca ora guʼndaʼ binni xiixa tema ni zeeda lúcani zindani ndaaniʼ ladxidoʼcaʼ ne zucaani laacaʼ quixhe íquecaʼ guiziidicaʼ de Biblia.
2. Xi zanda gúninu ti chuulaʼdxiʼ cani rusaananenu revista guiziidicaʼ jma de stiidxaʼ Dios.
2 Gacanenu binni chuulaʼdxiʼ guiziidiʼ jma. Lugar de gusaananesinu tuuxa binni revista la? galán guyúbinu modo güínenu laabe diidxaʼ, ti zacá cada biaje chuunu ra nuube maʼ zabézabe güínenu laabe diidxaʼ. Zacá zánnanu ximodo nuube, xi riuuláʼdxibe, xi runi crebe, xi tema guinínenu laabe ne ximodo guzulunu (Prov. 16:23). Para ganda gúninu nga la? caquiiñeʼ guidúʼndanu dede ante. Guyúbinu xiixa ni rábinu ziuuláʼdxibe ne ti textu ni caníʼ de laani, ni ganda gusiénenu laabe nagueenda. Zacá nga casi ñaca nuzeʼnu biidxihuiiniʼ ni nuu ndaaniʼ ladxidoʼbe (1 Cor. 3:6). Cadi guiaandaʼ laanu gucaʼnu ca fecha chigánnanu laabe, ne xi bisaananenu laabe, xi tema ne xi textu bidúʼndanenu laabe.
3. Panda biaje zanda chigánnanu ti binni ni rusaananenu revista guiráʼ beeu.
3 Panda biaje zanda guibiguétanu. Ti biaje lu ti beeu nga risaananu revista ra nuu ca binni ni riuulaʼdxiʼ guʼndaʼ cani. Peru pa zanda chuunu ne riuuláʼdxicabe guiziidicabe jma la? zanda chigánnanu laacabe gatigá. Zanda guibiguétanu ti semana o chupa semana despué de yesaananu ca revista ca ra nuucabe, ne zanda guininu sicaríʼ: «Gudideʼ ra nuuluʼ para guluéʼ lii ti tema ni guyuuladxeʼ lu ca revista ni bisaananiáʼ lii que». Zacá zacanenu laacabe chuuláʼdxicabe xiixa tema. Peru pa gábicabe laanu maʼ biindacabe ni la? zanda guinabadiidxanu laacabe ximodo biiyacabe ni ne zanda güínenu laacabe diidxaʼ ti ratuhuiiniʼ de tema ca. Pa riuuláʼdxicabe gúʼndacabe intiica gusaananenu laacabe la? zanda chisaananu ra nuucabe xiixa tratadu, folletu o libru ni cusaananenu binni beeu ca.
4. Xi zanda gúninu ti guzulú gúʼndanenu tuuxa ni rusaananenu revista guiráʼ beeu.
4 Cadi cuézanu guinábacabe laanu guidúʼndanenu laacabe Biblia, sínuque laanu nga gábinu ni laacabe. Neca qué ninácabe primé biaje gúdxinu laacabe, peru pa yanna maʼ racaláʼdxicabe la? zanda gúʼndanenu laacabe gatigá ca tema ni reeda lu ndaa ni láʼ «Cani rinabadiidxaʼ binni de Biblia» ni zeeda lu revista Torre stiʼ ni rapa. Zacá zándaca guzulunu guidúʼndanenu laacabe Biblia ra puertaʼ lídxicabe. Ne pa qué ganda la? cadi gusaananu de chinenu ca revista ca ra nuucabe ne gacanenu laacabe chuuláʼdxicabe guiziidicabe jma de stiidxaʼ Dios.