Modo gucheecheluʼ diidxaʼ jma jneza: bizaalaʼdxiʼ ca binni ni ruundaʼ ca revista stinu

Xiñee risaca gúniluʼ ni. Stale binni riuulaʼdxiʼ guʼndaʼ ca revista stinu, peru qué rinacaʼ guidúʼndanenu laacaʼ Biblia, zándaca purtiʼ galán runi sentircaʼ ndaaniʼ religión sticaʼ o qué gápacaʼ tiempu. Neca zacá, cumu gatigá ruundacabe ca revista stinu la? jma nagueenda ziuuláʼdxicabe guiziidicabe de Stiidxaʼ Dios (1 Ped. 2:2). Zándaca gúʼndacabe xiixa tema ni chindá ndaaniʼ ladxidóʼcabe o guchaa modo nabánicabe. Pa gatigá chigánnanu laacabe neca ti ratu la? zánnanu xi riuuláʼdxicabe, xi riguu xizaa laacabe ne jma zápacabe confianza laanu. Despué, zándaca guzulú guidúʼndanenu laacabe Biblia.

Ximodo zanda gúniluʼ ni:

Cada beeu guiree revista Torre stiʼ ni rapa yesaana ni ra nuu ca binni rusaananeluʼ revista. Zanda chigánnaluʼ laabe chupa chonna biaje lu beeu ca para uguuluʼ gana laabe gúʼndabe xiixa tema zeeda lu revista ca o para gudiiluʼ laabe publicación cusaananenu binni beeu ca. Bicaa guiráʼ ni caquiiñeʼ guietenaláʼdxiluʼ lu registru stiluʼ. (Biiyaʼ Xhiiñaʼ Reinu ni Rúninu enero 2014, yaza 3.)
Guyuu listu cada biaje chigánnaluʼ laabe. Ora chisaanaluʼ revista ra nuube biyubi güíneluʼ laabe diidxaʼ ne guca xhamigu laabe. Pa guʼnuʼ nga la? qué zaca nagana para lii gacaneluʼ laabe chuuláʼdxibe guiziidibe.
Cadi gunítiluʼ tiempu para guzulú gúʼndaneluʼ binni Biblia. Pa guinabadiidxaʼ tuuxa binni rusaananeluʼ revista, xi rusiidiʼ Biblia de xiixa tema la? biquiiñeʼ ti publicación ni ridúʼndanenu binni para guicábiluʼ ni gunabadiidxabe ne biindané ni laabe. Ante guireeluʼ ra nuube, gunabadiidxaʼ laabe xiixa de tema ni maca cayuiʼtu ne gudxi laabe zabiguétaluʼ para guicábiluʼ ni. Pa gatigá ruíʼneluʼ tuuxa binni de Biblia ne maca nexheʼ xi tema chiguundatu ne riquiiñetu Biblia o sti publicación ni rudíʼnenu estudiu la? maʼ cayuundaneluʼ binni ca Biblia. Ñee huasaananeluʼ laabe folletu Ca diidxaʼ sicarú ne huasiéneluʼ laabe ximodo ridúʼndanenu binni Biblia ti ratuhuiiniʼ la? Sti cosa ni zanda gúniluʼ nga guluiʼluʼ laabe ca videu Xiñee naquiiñeʼ gúʼndaluʼ Biblia ne Ximodo ridúʼndanedu binni Biblia. Neca ante qué niná binni ca ñuundaneluʼ laa Biblia, peru zándaca guchaa modo nabánibe. Xiñee qué gábiluʼ laabe sti biaje pa zuundaneluʼ laabe yaʼ.

Biʼniʼ stipa guʼnuʼ ndiʼ beeu riʼ:

Biʼniʼ ti lista ra gucaaluʼ lá guiráʼ binni ni zándaca náʼ chisaanaluʼ revista ra nuu guiráʼ beeu. Bisaanané laacabe ca revista jma nacubi ne gudxi laacabe zabiguétaluʼ ra nuucabe para gudiiluʼ laacabe xcaadxi revista guiree.