Acanenu ca binni ni risaananu revista ra nuu ti chuláʼdxicaʼ iziidicaʼ jma
1. Ximodo zanda iquiiñenu lista ra cá lá iráʼ ca binni ni risaananu revista ra nuu ti acanenu laacaʼ chuláʼdxicaʼ iziidicaʼ jma.
1 Ora maʼ ziucheechenu diidxaʼ nabé ridxaaganu binni ni riulaʼdxiʼ ucaadiaga laanu ne riná icaa xiixa revista o libru ni usaananenu laa, peru qué rinacaʼ gúʼndanenu laacaʼ Biblia iráʼ semana. Zanda acanenu laacabe chuláʼdxicabe iziidicabe jma ra gápanu ti lista ra icá lá iráʼ binni ni chisaananu revista ra nuu. Ora usaanaluʼ revista la? bicaa lá binni uníʼneluʼ ca ne pa neza ra lídxibe, dxi udíʼdiluʼ, fecha stiʼ ca revista ni ucuaabe ne xi textu bíʼndatu, ne bicaa intiisi cosa ni usihuinni dxandíʼ riuláʼdxibe iziidibe jma. Cada revista cubi gueeda biyubi xi tema ni zándaca chulaʼdxiʼ ca binni ni nápaluʼ lu lista ca ne biluíʼ cani ora chigannuʼ laacabe (1 Cor. 9:19-23). Zándaca gúʼndacabe xiixa lu cani ni ucaa laacabe chuláʼdxicabe iziidicabe jma.
2. Xiñee caquiiñeʼ uyubi binni Jiobá yanna, ne xi zanda gúninu ti acanenu laacabe yaʼ.
2 Peru riquiiñeʼ gánnanu ndiʼ, cadi iráʼ diʼ binni nga zaca xpinni Jiobá purtiʼ si guʼndaʼ ca revista ni rusaananenu laacaʼ. Cumu izáʼ caquiiñeʼ uyúbicabe Jiobá yanna la? xi zándaruʼ gúninu ti acanenu laacabe yaʼ. (Sof. 2:2, 3; Apo. 14:6, 7.) Zanda acanenu laacabe chuláʼdxicabe iziidicabe jma, ra gúʼndanenu laacabe ti textu ni maca ulinu dede ante iráʼ biaje chinenu revista ra nuucabe.
3. 1) Ximodo zanda iquiiñenu ti textu de lu Biblia para gápanu stale modo inínenu binni. 2) Xi jma riulaʼdxiʼ binni ganna neza ra rucheechetu diidxaʼ.
3 Iquiiñenu ti textu ni zeeda lu Biblia para inínenu laacabe. Uníʼ ique xipeʼ nga caquiiñeʼ ganna ca binni ni risaanu revista ra nuu, ne naquiiñeʼ gápaluʼ gadxé gadxé modo ganda iquiiñeluʼ ti textu de lu Biblia para iníʼneluʼ laacabe de ni caquiiñeʼ gánnacabe (Fili. 2:4). Pa tobi de laacabe cadi xadxí de guti ti binnilidxi la? zanda chigannuʼ laabe chupa chonna biaje para usiéneluʼ laabe xi rusiidiʼ Biblia casi xi raca binni ora maʼ guti ne laaca gaʼbuʼ laabe rusiidiʼ Biblia de que zanda ibiguetaʼ ibani ca gueʼtuʼ ca sti biaje. Lu libru Razonamiento ra caníʼ de endaguti ne modo guiasa binni lade ca gueʼtuʼ ca, zándaruʼ idxélaluʼ stale modo para ganda iníʼneluʼ laacabe de laani. Cani zeeda lu libru riʼ zanda iquiiñeluʼ cani ti ganda iníʼneluʼ laacabe de xcaadxi tema casi, ximodo zaree ca endahuará ca, endayooxhoʼ ne endaguti. Galán uyúbiluʼ ti tema ni riulaʼdxiʼ binni chigannuʼ ca ne usiéneluʼ laabe chaahuiʼ chaahuiʼ xi riníʼ Biblia de laani.
4. Xiñee risaca acanenu binni guiene ca textu ni iquiiñenu, ne ximodo zanda gúninu ni.
4 Ucané laacabe guiénecabe. Neca huaxiéʼ ni inínenu laacabe ne guiénecabe ni la? riquiiñeʼ usiene chaahuinu laacabe textu ni maca ulinu para gúʼndanu ca. Binidxabaʼ maʼ bisicahui endabiaaniʼ stiʼ stale binni ti cadi guiénecaʼ ca diidxaʼ nacubi ne galán stiʼ Dios (2 Cor. 4:3, 4). Dede cani maca ruundaʼ Biblia caquiiñeʼ chuʼ tu acané laacaʼ ti guiénecaʼ ni (Hech. 8:30, 31). Nga runi, ulee tiempu para usiéneluʼ ti textu ne quíxheluʼ ejemplu, casi rúniluʼ ora chigudiiluʼ ti libana ra Scuela stiʼ cani Rucheeche Diidxaʼ (Hech. 17:3). Biiyaʼ guiene chaahuibe pabiáʼ nga risaca gúnibe ni na Stiidxaʼ Dios lu endanabani stibe.
5. Ximodo zanda uzulú gúʼndanenu Biblia iráʼ semana tobi de ca binni ni maca risaananu revista ra nuu.
5 Pa riuláʼdxibe ni caziidibe la? uníʼneruʼ laabe jma dede ra ganda gúʼndaneluʼ laabe chupa o chonna textu iráʼ biaje chigannuʼ laabe. Biyubi ximodo ganda iquiiñeluʼ xiixa ni na folletu Xi canabaʼ Dios lii guʼnuʼ o libru Conocimiento ora maʼ caníʼneluʼ laabe. Zacá la? zándaca tobi de laacabe chuʼ dxi uzulú gúʼndaneluʼ laa Biblia iráʼ semana.