Gúʼndanenu binni modo ganda iniisi jma lu Stiidxaʼ Dios
10 ndaa: Ximodo acanenu cani rúʼndanenu Biblia ti ucheechecaʼ diidxaʼ de yoo pur yoo
1 Ora ca binnigola iniʼcaʼ maʼ cayuni binni ni cayúʼndanenu ca ni na Jiobá la? maʼ zanda ácabe tobi ni rucheeche diidxaʼ ni caʼruʼ chúʼnisa (biiyaʼ Organizados para hacer la voluntad de Jehová, yaza 79-81). Ximodo zanda acanenu laabe ti ganda ireebe de yoo pur yoo yaʼ.
2 Laguundaʼ irópatu. Gástiruʼ ni jma risaca que guʼndaʼ chaahuitu. Biluíʼ ni caziidiʼ ca paraa zanda idxélabe modo iníʼnebe binni lu Xhiiñaʼ Reinu ni Rúninu ne ndaaniʼ libru Razonamiento, ne ucané laabe cuibe tobi ni qué iganna ne ácani modo ganda iquiiñeʼ neza ra rucheechetu diidxaʼ. Gudxi laabe galán nga iquiiñebe Biblia ora chigucheechebe diidxaʼ (2 Tim. 4:2).
3 Nabé risaca nga gápaluʼ ti ora para usiidiluʼ laabe ximodo gúnibe ni purtiʼ nacúbibe. Laga caniʼtu ximodo ucheechetu diidxaʼ la? bisiidiʼ laabe icábibe binni sin uchiichibe laacaʼ cada inabadiidxacaʼ laabe xiixa (Col. 4:6). Gudxi laabe qué zanda diʼ icabi cani rucheeche stiidxaʼ Cristu iráʼ ni inabadiidxaʼ binni laacaʼ oraqueca. Ni jma galán nga gaʼbuʼ ni nacubi ca gúʼndabe jma de ni unabadiidxacabe laabe ne iniʼbe zabiguétabe sti biaje para icábibe ni (Pro. 15:28).
4 Lagucheeche diidxaʼ irópatu. Ora ni caziidiʼ ca uzulú ucheeche diidxaʼ la? bizulú lii para gúʼyabe ximodo iquiiñeluʼ cani bíʼndatu, ne óraque bidii lugar gúnibe ni. Galán nga pa ni caziidiʼ ca guʼndaʼ ti textu ne iniʼbe de laani ora maʼ canagucheechetu diidxaʼ. Cadi guiaandaʼ lii de que nacúbibe ne biiyaʼ xi maʼ zanda gúnibe (Fili. 4:5). Gudxi laabe galán cayúnibe ni cada gúʼndatu para ucheechetu diidxaʼ gadxé gadxé modo.
5 Naquiiñepeʼ nga acaneluʼ ni nacubi rucheeche diidxaʼ ca gapa ti ora iree lu guidxi, ne pa ganda la? gúnibe ni iráʼ semana (Fili. 3:16). Gudixhe ti ora ireeneluʼ laabe lu guidxi, ne gudxi laabe ireenebe stobi de cani rucheeche diidxaʼ ni rúnicaʼ ni ne stale gana. Ejemplu stiʼ ca bíchinu ne ca bizánanu riʼ zacaneni ni caziidiʼ ca gúnini jma jneza ne zacá ziuláʼdxibe ireebe de yoo pur yoo.