Ndaa 11: Ximodo usíʼdinu ni cayúʼndanenu ganna xi iníʼ ora ibigueta chiganna binni
Gúʼndanenu binni modo ganda iniisi jma lu Stiidxaʼ Dios
1 Ora ni cayúʼndanenu ca uzulú ucheeche diidxaʼ, zadxélabe binni ni ziuulaʼdxiʼ ca diidxaʼ nacubi ne galán ni zinebe. Ximodo zanda acanenu ni nacubi cucheeche diidxaʼ ca para gúnibe ni jneza ne ucaabe binni chulaʼdxiʼ iziidiʼ jma yaʼ.
2 Dede primé chigánnatu tuuxa riquiiñeʼ gánnatu xi iniʼtu ti ganda ibiguétatu sti biaje. Gudxi ni caziidiʼ ca usihuinni dxandíʼ riulaʼdxiʼ acané ca binni ni iniʼné (Fili. 2:4). Bisiidiʼ laabe gánnabe ximodo ucaabe binni iníʼ ne ucaadiágabe ora maʼ caniʼcaʼ, ti gúʼyabe xi riguu xizaa laacaʼ. Ora tuuxa ruluíʼ riulaʼdxiʼ iziidiʼ jma la? gudxi ni nacubi cucheeche diidxaʼ ca ucaabe lá binni ca, pa ladu ra lidxi, xidé uníʼcabe ne biquiiñeʼ cani para acaneluʼ laabe gánnabe xi iniʼbe sti biaje chebe.
3 Iziidibe ximodo iniʼbe. Gúʼndasitu ni bicaabe primé biaje yegánnabe binni ca la? bisiidiʼ laabe cuibe xiixa de ca diidxaʼ nacubi ne galán stiʼ Reinu ni jma chulaʼdxiʼ binni ca ucaadiaga (1 Cor. 9:19-23). Irópatu naquiiñeʼ quixhe chaahuitu modo iníʼnetu ni cusiiditu ca, ne ganda gúʼndatu ti textu ne ti párrafo stiʼ libru o folletu ni ca íquetu iquiiñetu para gúʼndanetu laabe Biblia. Laaca riquiiñeʼ inabadiidxatu xiixa ora maʼ biluxe uníʼnetu laabe ne maʼ nga icábitu ora ibiguétatu sti biaje. Biluíʼ ni nacubi cucheeche diidxaʼ ca xi zanda gúnibe ti iniʼbe xiixa ni acané binni ca ganna jma de lu Stiidxaʼ Dios iráʼ biaje chigánnabe laa.
4 Laaca galán nga usíʼdinu ni cayúʼndanenu ca ximodo zanda uzulú iniʼné binni ne iniʼbe modo guiénecabe laabe. Despué de ugapadiúxibe la? zanda gábibe binni: «Galanpeʼ nga unieniáʼ lii nase que, yanna maʼ bibiguetaʼ sti biaje para uluéʼ lii xcaadxi ni bidxelaʼ ndaaniʼ Biblia casi [bizeeteʼ xidé racaláʼdxiluʼ iniʼluʼ]». Laaca riquiiñeʼ gábiluʼ laabe xi gúnibe pa iree gadxé binni.
5 Bisiidiʼ laabe gúnibe ni nagueenda. Uluu gana laabe ibiguétabe nagueendaca ra nuu ca binni ni uyuulaʼdxiʼ iziidiʼ jma de lu Stiidxaʼ Dios zacá zácabe ti ejemplu. Cadi naquiiñeʼ ireebe gana chiyúbibe laacaʼ ra lídxicaʼ. Bisiidiʼ laabe ximodo guiaananebe ca binni ca xi dxi ne xi hora para ibiguétabe ra nuucaʼ ne ucané laabe guiénebe pabiáʼ risaca chebe hora biaananebe binni (Mat. 5:37). Ucané ni nacubi rucheeche diidxaʼ ca iziidiʼ aca nachaʼhuiʼ, nadóʼ ne gápabe respetu ora maʼ canayúbibe ca dendxuhuiiniʼ para ganda chuláʼdxicaʼ iziidicaʼ jma de Stiidxaʼ Dios (Tito 3:2).