Quixhe chaahuinu tiempu stiʼ binnilídxinu para chigucheechenenu laacaʼ Stiidxaʼ Dios
1 Riecheʼ Jiobá nga ora gúʼyabe ca hombrehuiiniʼ ne ca dxaapahuiiniʼ ca usisácacaʼ labe (Sal. 148:12, 13). Dede cani jma nahuiiniʼ ne cani cayádxiruʼ bisisácacaʼ Dios ca dxi bibani Jesús (Mat. 21:15, 16). Ngaca nga ni cayaca ca dxi stinu riʼ. Yanna, ximodo zanda acanetu ca xiiñitu usisácacaʼ Jiobá ne stale gana ora chiucheechecaʼ diidxaʼ yaʼ. Ti cosa ni risaca ni naquiiñeʼ gúnitu casi bizeeteʼ guiʼchiʼ ni caníʼ de ca endaridagulisaa ca nga, ejemplu ni udiitu laacabe. Ti hombre uníʼ casi riníʼ ique stale binni ni napa xiiñiʼ sicaríʼ: «Xiiñiʼ binni qué runi diʼ ni gábicabe laa, sínuque ni guʼyaʼ guni bixhoze ne jñaa».
2 Ti baʼdudxaapaʼ ni bisiniisi bixhoze ne jñaa laa casi modo na Dios, rietenalaʼdxiʼ: «Qué ñuu dxi ñásadu ti sábadu siadóʼ canabadiidxadu pa ziucheechedu diidxaʼ. Nannadxíchidu zareʼdu dxi que». Zacaca nga laani, zanda acanetu ca xiiñitu gúʼyacaʼ pabiáʼ risaca nga cueecabe ti tiempu para chigucheechecabe diidxaʼ ne laatu iráʼ semana. Zacá la? cadi zusiiditu laacabe ne ejemplu si stitu, sínuque laaca zuuyatu xi pur rúnicabe ni, ximodo laacabe ne xi maʼ randa rúnicabe jneza.
3 Bisiidiʼ laacabe modo ganda iniisicabe jma. Pa racaláʼdxitu chulaʼdxiʼ ca xiiñitu chiucheechecaʼ diidxaʼ la? naquiiñeʼ usiiditu laacabe ti ganda gúnicabe ni jneza. Baʼdudxaapaʼ ni maca bizéʼtenu que laaca uníʼ: «Qué ñuu dxi ninándasidu bixhózedu ne jñaadu ora maʼ ziucheechecaʼ diidxaʼ. Nápadu xidé gúnidu xiixa, casi uxhídxidu timbre o usaanadu ti tratadu. Cumu nabé bisiidicabe laadu ximodo inidu ante chuudu lu guidxi ora maʼ ziluxe semana la? ngue runi maca nánnadu xi inidu». Zanda iquiiñetu chupa chonna minutu iráʼ semana para usiiditu ca xiiñitu gánnacaʼ ucheechecaʼ diidxaʼ, zanda gúnitu ni ora maʼ cayuundanetu ca binnilídxitu o sti ora, zacá zanda acanetu laacabe chúʼcabe listu.
4 Ucheechetu diidxaʼ ne iráʼ ca binnilídxitu nga sti modo zanda acanetu chindá ni dxandíʼ ca ndaaniʼ ladxidóʼ ca xiiñitu. Ti Testigu ni nabé uzané ti xiiñidxaapaʼ ora maʼ zitiizicaʼ tratadu la? rizácabe biaʼ chii kilómetru para chécabe ne biaʼ queca para ibiguétacabe de ca guidxihuiiniʼ gaxha de ra nuucabe que. Xiiñibe que rietenalaʼdxiʼ: «Lu ca viaje uzayaniáʼ bixhozeʼ riʼ la? biquiiñeʼ ni para uluube ni dxandíʼ ca ndaaniʼ ladxiduaʼ» (Deu. 6:7). Zacaca uguu Jiobá ndaayaʼ laatu pur cueetu tiempu para chigucheechetu diidxaʼ iráʼ semana ne ca binnilídxitu.