Gucané ca xiiñiluʼ para gúnicaʼ xhiiñaʼ Dios
1. Pur ni na Salmo 148:12, 13, xi rucaani cani napa xiiñiʼ guni.
1 Jiobá cayabi ca baʼduhuiiniʼ ca gusisácacaʼ laabe (Sal. 148:12, 13). Nga runi, ca xpinni Cristu rusiidicaʼ ca xiiñicaʼ ni zeeda lu Biblia ne laaca rusiidicabe laacaʼ guibánicaʼ modo riuulaʼdxiʼ Dios, peru cadi ngasi, laaca racanécabe laacaʼ gúnicaʼ xhiiñaʼ Dios. Xi zanda guni ca xpinni Cristu para cadi gusaana de gacanecaʼ ca xiiñicaʼ yaʼ.
2. Ximodo zanda gacané ejemplu stiluʼ ca xiiñiluʼ.
2 Gudixhe ti ejemplu galán. Juez Gedeón gunabaʼ 300 de ca hombre stiʼ gúnicaʼ ndiʼ: «Naquiiñeʼ guiziiditu ora gúʼyatu naa» (Jue. 7:17). Ca xiiñiʼ binni nabé nga rúnicaʼ guiráʼ ni gúʼyacaʼ guni bixhózecaʼ ne jñaacaʼ. Guzéʼtenu ejemplu stiʼ ti hombre xpinni Cristu, laabe rúnibe dxiiñaʼ huaxhinni, peru lugar de gásibe sábadu siadóʼ ora guibiguétabe de dxiiñaʼ la? laga rigucheechenebe ca xiiñibe diidxaʼ, neca maʼ bidxaga dxeʼbe. Neca qué gábibe ca xiiñibe xiixa, peru cusiidibe laacaʼ jma risaca nga gucheechecaʼ diidxaʼ (Mat. 6:33). Ñee ruuyaʼ ca xiiñiluʼ lii nuuluʼ nayecheʼ ora gúniluʼ ni naquiiñeʼ guni ca xpinni Cristu, casi guni orarluʼ, gúʼndaluʼ Biblia, guicábiluʼ lu ca guendaridagulisaa ca ne gucheecheluʼ diidxaʼ la? Dxandíʼ, ziuu biaje zucheeluʼ, peru jma ziuulaʼdxiʼ ca xiiñiluʼ guni adorarcaʼ Jiobá pa gúʼyacaʼ rúniluʼ stipa pur gúniluʼ xhiiñaʼ Dios jneza (Deu. 6:6, 7; Rom. 2:21, 22).
3. Xii nga naquiiñeʼ gucaa binni ique xiiñiʼ ugaanda ndaaniʼ xquidxi Dios ne ximodo zanda gacanecaʼ laacabe.
3 Cani zanda quixhe ique ca xiiñiluʼ ugaanda. Ca binni ni napa xiiñiʼ qué rireecaʼ gana gusiidicaʼ ca xiiñicaʼ saʼ, guiníʼ o gacuʼ lari, ne rúnicabe ni dede ora maʼ zanda guni ca xiiñicabe ni stubi. Despué de nga maʼ racanécabe laacaʼ para ugaandacaʼ xcaadxi cosa. Ne pa xpinni Cristu laacabe la? laaca racanécabe laacaʼ para quixhe íquecaʼ ugaandacaʼ xiixa guenda ndaaniʼ xquidxi Dios, ne rúnicabe ni biaʼ iza nápacaʼ ne biaʼ maʼ riénecaʼ (1 Cor. 9:26). Ñee cusiidiluʼ laacabe guicábicabe ni biénecabe ne laasicabe cueecabe libana ni chigutiidicabe lu Scuela stiʼ cani Rucheeche Diidxaʼ la? (Sal. 35:18.) Ñee cayacaneluʼ laacabe para gucheechecabe diidxaʼ xcaadxi modo la? Ñee huayacaneluʼ laacabe quixhe íquecabe chuʼnísacabe ne gácacabe precursor la? Xi cayúniluʼ para ganda guidxaagacabe xcaadxi xpinni Cristu ni nuu nayecheʼ pur cayuni xhiiñaʼ Dios né stale gana yaʼ (Pro. 13:20).
4. Xi ribeendú xiiñiʼ binni ora rusiidiʼ bixhoze ne jñaa laa dede nahuiiniʼ.
4 Ti biaje guníʼ ti salmista sicaríʼ: «Dios stinneʼ dede nahuiineʼ huasiidiluʼ naa ne dede yanna, ne qué huasaanaʼ de guiniéʼ guiráʼ ca cosa sicarú ni maʼ bíʼniluʼ» (Sal. 71:17). Gucané ca xiiñiluʼ gúnicaʼ xhiiñaʼ Dios dede ora nahuiinicaʼ. Ora gusiidiluʼ laacabe gúnicabe xhiiñaʼ Dios dede nahuiinicabe, zacaneni laacabe ora maʼ huaniisicabe (Pro. 22:6).