Cadi usaananu de ininu Stiidxaʼ Dios ne endanadxibalú
1 Laanu casi xpinni Cristu ni rucheechenu diidxaʼ nánnanu cadi iráʼ diʼ binni nga zucaadiaga laanu ora maʼ caninenu laacabe (Mat. 10:14). Peru modo ricábicabe qué rucueeza diʼ nga laanu de ucheechenu ca diidxaʼ nacubi ne galán ca (Pro. 29:25). Xii nga racané laanu cadi usaananu de ininu Stiidxaʼ Dios ne endanadxibalú yaʼ.
2 Apóstol Pablu biiyabe jma risaca para laabe gunibiaʼbe Jesús, ne ngue nga ni bicaa laabe iniʼbe ne idubi ladxidoʼbe (Fili. 3:8; 1 Tes. 1:5). Neca nuu tu uníʼ ique cadi dxandíʼ ni caniʼbe que, peru para laabe caquiiñeʼ ganna binni ca diidxaʼ nacubi ne galán que para ulá Dios laacaʼ purtiʼ maʼ nápacaʼ fe (Rom. 1:16). Nga runi, dede ora uníʼnebe binni ni bicaalú laabe, qué nusaana Pablu de niníʼ purtiʼ Dios ngue bidii stipa laabe para gúnibe ni ne endanadxibalú (Hech. 14:1-7; 20:18-21, 24).
3 Ra cadá stipa stinu. Pablu qué nidxibi diʼ ora bicheeche diidxaʼ, peru qué ñúnidibe ni pur stipa si stibe. Laabe uniʼbe tuu nga bidii stipa laabe ne Silas ne ca diidxaʼ riʼ: «Neca udinde né cabe ne bininá cabe laadu ndaani guidxi Filipos peru ucané Dios laadu para gunda bidxiña du xquidxi tu ne byuí né du laatu stiidxa be sin nidxibi du, neca uyuu tu bicaa lú laadu» (1 Tes. 2:2; Hech. 16:12, 37). Despué, ora nuube ndaaniʼ lidxi guiibaʼ stiʼ guidxi Roma, unábabe guni orárcabe pur laabe para cadi usaanabe de iniʼbe ca diidxaʼ nacubi ne galán que ne iniʼbe cani sin idxíbibe, iniʼbe cani casi naquiiñeʼ ácani (Efe. 6:18-20). Pablu qué nusaana de niníʼ Stiidxaʼ Dios ne endanadxibalú purtiʼ gúpabe stale fe Jiobá ne cadi pur stipa si stibe (2 Cor. 4:7; Fili. 4:13).
4 Zacaca ni yanna riʼ. Ti bíchinu nabé uca nagana para laabe ñábibe cani runinebe dxiiñaʼ testigu stiʼ Jiobá laabe ne niníʼnebe laacaʼ de Dios, ngue runi biʼniʼ orarbe ne bizulú uníʼnebe laacaʼ de Dios. Primé la? tobi de cani runinebe dxiiñaʼ qué niná nucaadiaga laabe, peru ora gúdxibe laa ziasa cani maʼ guti ca, ngue bicaa laa guʼndaʼ Biblia. De raqué la? bíchinu que maʼ qué nusaana de niníʼ Stiidxaʼ Jiobá ora tiisi. Lu sti dxiiñaʼ gúpabe, ucanebe 34 de ca binni bíʼninebe dxiiñaʼ chúʼnisacaʼ lu catorce iza. Laanu laaca nánnanu Jiobá nga ni zuquidxi laanu para ininu stiidxabe sin idxíbinu (Hech. 4:29).