Xi ribeendunu ora rucheechenu diidxaʼ
1. Ximodo ruuyaʼ Jiobá dxiiñaʼ cayúninu, ne ximodo ruuyaʼ binni ni.
1 Stiidxaʼ Dios cayabi laanu modo cayuni ca xpinni Cristu xhiiñaʼ Jiobá, zeeda ácani casi ora irácabe zinécabe Jiobá lu ti neza ra zécabe nayecheʼ purtiʼ laabe biʼniʼ ganarbe (2 Cor. 2:14-16, NM). Ora rireʼnu para usíʼdinu binni de Dios la? para Jiobá zeeda aca dxiiñaʼ ca casi ti xhoʼ ni rindáʼ naxhi. Nuu binni ribidxi ca diidxaʼ nacubi ne galán ca laacaʼ purtiʼ sicarú cani, peru nuu xcaadxi binni que rinacaʼ ucadiágacaʼ. Peru neca stale binni ucaanáʼ cani la? qué riníʼ diʼ nga qué iquiiñeʼ diʼ dxiiñaʼ cayúninu ca. Idúʼyanu xi ribeendunu ora rucheechenu diidxaʼ.
2. Xi rusihuínninu pur modo rucheechenu diidxaʼ.
2 Rusisácani Jiobá. Binidxabaʼ na runi binni ni na Jiobá purtiʼ si zacaacaʼ xiixa (Job 1:9-11). Peru laanu, ca xpinni Cristu, zanda usihuínninu de ladxidoʼno nga runi adorarnu Dios pur modo rúninu dxiiñaʼ bidiibe laanu. Stale de ca bíchinu ne bizánanu qué rusaanacaʼ de ucheechecaʼ diidxaʼ ne acanecaʼ binni chinanda Cristu neca cadíʼdicabe lu endanagana o neca stale binni qué riuulaʼdxiʼ ucaadiaga laacabe. ¡Nabé riecheʼ ladxidóʼ Jiobá purtiʼ qué rusaananu de gúninu xhiiñabe! (Pro. 27:11.)
3. Xiñee nabé risaca nga cadi usaananu de ininu lá Dios ne de cani naguixhe íquebe gúnibe.
3 Ora rucheechenu diidxaʼ, racanenu aca ni naguixhe ique Dios guni. Jiobá uníʼ xi zaca ora guedandá dxi initilú guidxilayú stiʼ binidxabaʼ «Ca guidxi roʼ ca nápacaʼ xidé gánnacaʼ naa nga Jiobá» (Eze. 39:7). Peru para ganna ca guidxi cani la? ca xpinni Dios nápacaʼ xidé iníʼrucaʼ labe ne cani naguixhe íquebe gúnibe nezalú «binni de irá ladu, de irá guidxi, ni riníʼ adxé adxé idioma» (Apo. 14:6, 7).
4. Ximodo racané endarucheeche diidxaʼ ca aca juzgar binni.
4 Ne laani nga riquiiñeʼ para aca juzgar binni jneza. Ora rucheechenu ca diidxaʼ nacubi ne galán ca laaca riquiiñeʼ ni para aca juzgar binni. Apóstol Pablu na zusaba «ná [Cristu] cani qué nicaa stiidxaʼ, ne qué ñunibiáʼ Dios» (2 Tes. 1:8, 9). Zaca juzgar ca binni ca pur modo icábicabe ca diidxaʼ nacubi ne galán ca. Nga runi, laanu ca xpinni Dios nápanu ti dxiiñaʼ ni nabé risaca. Pa qué racaláʼdxinu quibaʼ donda íquenu ora initilú tuuxa la? riquiiñeʼ cadi usaananu de ininu ca diidxaʼ stiʼ Reinu ni chigulá binni (Hech. 20:26, 27).
5. Ximodo rusihuinni dxiiñaʼ rúninu ca riubalaʼdxiʼ Dios binni.
5 Ora qué usaananu de gúninu stipa pur acanenu binni chuʼ galán ne Dios la? rusihuínninu riubalaʼdxiʼ Jiobá laacabe (1 Tim. 2:3, 4). Cumu nánnanu nabé ruchaa modo nabani binni la? qué rusaananu de chigánnanu laacabe para acanenu laacabe uyúbicabe Jiobá laga zándaruʼ. Ora gúninu zacá la? rusihuínninu «nadxii Dios laanu», purtiʼ «cabeza be inaba iráʼ binni perdón laabe, purti qué racalaʼdxi be initilú nin tobi» (Luc. 1:78; 2 Ped. 3:9).
6. Xi ribeendunu ora qué rusaananu de gúninu xhiiñaʼ Jiobá.
6 Racaneni laapenu. Ora qué rusaananu de gúninu xhiiñaʼ Jiobá, rápani laanu, purtiʼ racaneni laanu cadi guiaandaʼ laanu dxi stiʼ Jiobá, ne racaneni laanu ucaananu iráʼ cosa malu nuu lu guidxilayú riʼ (2 Ped. 3:11-14; Tito 2:11, 12). Nga runi, qué chuʼ dxi usaananu de gúninu «xhiiña Señor biaʼ ra ganda tiʼ» purtiʼ nánnanu cadi pur gana si nga ca stipa cayuni ca xpinni Cristu lu dxiiñaʼ ca (1 Cor. 15:58).