Ximodo zanda acanenu binni
1 Ndiʼ nga ni nabé rinabadiidxaʼ ca testigu stiʼ Jiobá ora gánnacaʼ bininá nisaguié paxaraa o xu. Casi rieeteʼ lu Hechos 11:27-30, ca xpinni Cristu ni bibánicaʼ lu primé siglu que ucanécabe ca bíʼchicabe de Judea dxi guyuu ti endarindaana ra nuucaʼ.
2 Ca dxi stinu riʼ, xquidxi Dios maʼ udixhe iquiiñeʼ caadxi bueltu ni ricaacaʼ para acanecaʼ binni ni ucaná ne ni biniti stiʼ pur ti nisaguié, xu o purtiʼ guyuupeʼ tu bininá laacabe, o pur sti endanagana.
3 Casi iza udiʼdiʼ ca, stale bíchinu ne bizánanu biseendacaʼ bueltu para ca binni ni bininá tsunami guidxi Asia. Rudiʼdu xquíxepeʼ laatu purtiʼ de ladxidoʼto rudiitu bueltu para ucanetu ra izaaca xiixa desgracia. Yanna, pa bueltu useendatu riʼ cá paraapeʼ iquiiñeni la? nuu guidxi napa ti ley ra na nápacabe xidé iquiiñecabe bueltu ca ra na binni ni biseendaʼ ni ca ne cadi iquiiñecabe ni para sti cosa, ne maca nexheʼ pabiáʼ si dxi nápacabe para gúnicabe ni, neca maʼ cadi caquiiñeʼ ca bíchinu ne ca bizánanu ni o neca caquiiñerúcabe ni.
4 Nga runi, cayábidu laatu galán nga cuʼtu bueltu ca ra riuu bueltu para dxiiñaʼ raca lu idubi guidxilayú. Ca bueltu ni riuu racá la? riquiiñeʼ cani para guiaxa iráʼ ni iquiiñeʼ ra bizaaca xiixa desgracia, ne para cadi guiaadxaʼ endaró espiritual iráʼ ca bíchinu ne ca bizánanu. Pa tuuxa racalaʼdxiʼ, pur xiixa razón, udii bueltu para acanécabe cani ucaná si ne cadi para dxiiñaʼ si ni raca lu idubi guidxilayú la? zanda gúnibe ni ne naquiiñeʼ gánnabe zié bueltu ca ratiica si iquiiñeni. Peru zudiʼdu xquíxepeʼ laatu pa cadi ucaatu paraapeʼ iquiiñeʼ bueltu ca o ximodopeʼ iquiiñeʼ ni.
5 Ora cuʼtu bueltu ca para dxiiñaʼ raca lu idubi guidxilayú la? zápanu jma bueltu para iquiiñeʼ lu intiica dxiiñaʼ ni raca stiʼ Reinu, ne maʼ cadi chuʼ chaahuiʼ ni para iquiiñeni ra izaaca si xiixa desgracia. Zacá zusihuínninu zinándanu ni na Efesios 4:16, ra cayabi laanu gúninu dxiiñaʼ tobi si ti zacá ra tiidiʼ «dxi jma rusi ziuzuhuáʼ chaahui nu ne ziyanaxhii saa nu».