Ñee racané ca testigu stiʼ Jehová ora guizaaca xiixa desastre la?

Racanedu. Laadu, ca testigu stiʼ Jehová, gatigá racanedu binni ora guizaaca xiixa desastre natural. Racanedu ca Testigu ne xcaadxi binni. Ne zacá rihuinni zinándadu ni na Biblia lu Gálatas 6:10 ra na: «Ora tiica ganda acané nu binni la? guni nu ni, peru jma pe naquiiñe guni nu ni lade ca hermanu». Laaca riguixhedxidu ladxidóʼcabe ne riguʼdu gana laacabe para guni huantárcabe ora maʼ cadíʼdicabe ra nagana (2 Corintios 1:3, 4).

Ximodo racanedu ora guizaaca xiixa desastre

Despué de gaca ti desastre, ruyubi ca binnigola guiráʼ cani nuu ndaaniʼ neza binni ridagulisaa sticaʼ para gúʼyacaʼ ximodo nuucabe ne xi caquiiñecabe. Oracaruʼ rábicabe sucursal ximodo nuu ca binni riʼ ne xi maʼ bíʼnicabe para gacanécabe laacaʼ.

Pa qué ganda gudii ca binni ridagulisaa ni nuu ra guca desastre ca guiráʼ ni caquiiñeʼ cani gucaná la? maʼ Grupu ni Zaniruʼ stiʼ ca Testigu stiʼ Jehová riguixhe xi gaca para gudii nácabe ca binni riʼ. Riguixhe sucursal riʼ chuʼ comité ni guʼyaʼ gaca dxiiñaʼ riʼ ne stale Testigu de sti lugar ribeecaʼ tiempu para chigacanecaʼ ne rudiicaʼ bueltu (Proverbios 17:17). Zacaca bíʼnicabe lu primé siglu, dxi bininá ti gubiña ca xpinni Cristu (1 Corintios 16:1-4).

Bueltu nagúʼchaahuidu

Caadxi de ca bueltu ruseendacabe ra nuu sucursal stiʼ ca testigu stiʼ Jehová riquiiñeni para gacanécabe ca binni ni gucaná lu xiixa desastre natural (Hech. 11:27-30; 2 Corintios 8:13-15). Ne cumu qué riaxa cani rigacané la? randa riquiiñecabe bueltu ca para si gacanécabe binni. Ne laaca ruyúbicabe modo iquiiñecabe bueltu ca jma jneza (2 Corintios 8:20).