Ti dxiiñaʼ ni nabé risaca stiʼ Jiobá nga cuí Yoo stiʼ Reinu
1. Xi iráʼ dxiiñaʼ ndiʼ huayaca ra ribí Yoo stiʼ Reinu ne xiruʼ caquiiñeʼ aca yaʼ.
1 Dede ra rugaanda ruuyaʼ Betel stiʼ Méjicu aca dxiiñaʼ la? maʼ urí 1,722 Yoo stiʼ Reinu lu ca últimu gadxe iza udiʼdiʼ ca (yanna maʼ urí 17 de laani Belice, ra biquiiñeʼ cuí Yoo stiʼ Reinu). Rudiʼnu xquíxepeʼ ca Grupu ni Rucuí Yoo stiʼ Reinu ne ca Grupu de Binnigola ni Ruuyaʼ Cuí Yoo stiʼ Reinu ne cani ucané laacabe pur dxiiñaʼ nadipaʼ ni bíʼnicabe. Peru neca stale nga ni maʼ uca, caquiiñeruʼ aca jma de 1,300 Yoo stiʼ Reinu, idxaa modo zuba 190 ne iluxe 234 ni maʼ bizulú cayaca. Yanna, ximodo zanda acanenu lu dxiiñaʼ nabé risaca stiʼ Jiobá riʼ yaʼ (Apocalipsis 7:15).
2. Ximodo zanda acanenu laapenu ra cabí Yoo stiʼ Reinu yaʼ.
2 Usihuínninu nápanu gana acanenu. Pa maʼ rucheecheluʼ diidxaʼ ne maʼ uyuunísaluʼ la? rinábadu lii uchaluʼ guiʼchiʼ Formulario sobre el trabajador voluntario en Salones del Reino, o inábaluʼ binnigola ni riganna ca binni ridagulisaa ca ti guiʼchiʼ Solicitud para el programa de voluntarios de construcción de Salones del Reino ti ganda acaneluʼ lu dxiiñaʼ nabé risaca riʼ (Sal. 110:3). Iráʼ cani chigacané ra cuí yoo stiʼ Reinu naquiiñeʼ usihuínnicabe nápacabe gana acanécabe (Sal. 133:1). Neca tuuxa qué ganna ximodo ribí yoo la? zanda acanebe para aca ca dxiiñaʼ ca jneza. Laaca zanda usiidicabe laabe ximodo ribí yoo para ganda acanebe jma.
3. Ximódoruʼ zanda usihuínninu cayacanenu aca dxiiñaʼ riʼ yaʼ.
3 Pa qué zanda acaneluʼ para cuí yoo stiʼ Reinu la? modo zanda acaneluʼ nga uguuluʼ gana cani zanda guni dxiiñaʼ ca. Zanda guiaananeluʼ dxiiñaʼ runi ca bíʼchiluʼ ra ridagulisaatu ora laacabe cayacanécabe ra cabí ti Yoo stiʼ Reinu. Ca binnigola ca naquiiñeʼ gúʼyacabe aca ca dxiiñaʼ riquiiñeʼ ra ridagulisaacabe ora chigacané ca bíchicabe ne ca bizánacabe ra cabí yoo stiʼ Reinu. Dxandíʼ, Jiobá riecheʼ ora iranu racanenu para jma iniisi xhiiñaʼ Reinu (Heb. 13:16).
4. Ximodo zanda uguʼnu gana cani racané ra ribí Yoo stiʼ Reinu yaʼ.
4 Ácanu binni riguu gana. Para aca ca yoo ra raca adorar Jiobá riquiiñeʼ ni tiempu ne stipa. Pur nga, cani raca invitar chigacané ra cabí ti Yoo stiʼ Reinu la? nuu tiru qué randa ridagulisaanécabe ca bíʼchicabe. Nga runi, ora gúʼyanu zanda la? uguʼnu gana iráʼ cani racané ra ribí yoo stiʼ Reinu pur rúnicabe stipa para acanécabe lu «dxiiña» nabé risaca riʼ (Hech. 6:3; Rom. 14:19).
5. Ximodo ndiʼ rusihuinni cani rigacané ra ribí yoo stiʼ Reinu ruuyacaʼ uná nga cani jma risaca gúnicaʼ.
5 Gúʼyanu xii nga ni jma risaca gúninu. Dxiiñaʼ ni jma risaca ora runi adorarnu Jiobá nga ucheechenu stiidxabe (Mar. 13:10). Ne pur nga la? ca Grupu ni Rucuí Yoo stiʼ Reinu ne Ca Grupu de Binnigola ni Ruuyaʼ Cuí Yoo stiʼ Reinu, rúnicabe stipa pur quixhe chaahuicabe pora aca ca dxiiñaʼ ca para cadi guiaadxaʼ cani rigacané ca, ca endaridagulisaa sticaʼ ora cadi caquiiñeʼ guiaadxacaʼ. Zacaca cani rigacané ra ribí yoo stiʼ Reinu laaca ruuyacaʼ uná nga cani jma risaca para laacaʼ ti ganda gúnicaʼ iráʼ dxiiñaʼ nápacaʼ. Ne laacabe nga ruuyacabe aca dxiiñaʼ ni rúnicabe ra ridagulisaacabe ora qué guínnicabe.
6. Xi iráʼ ndiʼ zabeendunu ora iráʼ binni ridagulisaa acanecaʼ iniisi xhiiñaʼ Jiobá jma yaʼ.
6 Apóstol Pablu uníʼ runi ca binni ridagulisaa dxiiñaʼ tobi si para ganda «uzuhuáʼ chaahui nu ne [gan]naxhii saa nu» (Efe. 4:16). Dxandíʼ, ni rucaa laanu acanenu sáʼ dxiiñaʼ de endarucheeche diidxaʼ ne acanenu ra ribí Yoo stiʼ Reinu nga purtiʼ nadxiinu Jiobá ne riuuláʼdxinu aca adorarbe jneza.