Ucheechenu diidxaʼ, ti dxiiñaʼ ni rusihuinni rianu binni
1 Jesús bidii cuenta ximodo nuu ca binni ni cucaadiaga laabe que purtiʼ «qué ganna ca xi guni ca ne iruti cayaca né laacaʼ. Nuu ca casi dendxu ni qué gapa pastor» (Mat. 9:36). Ngue runi, ne endanachaʼhuiʼ ne endarannaxhii bisiidiʼ Jesús laacaʼ ca ley stiʼ Jiobá ne laaca udixhedxibe ladxidoʼcaʼ ne ucanebe laacaʼ idxíñacaʼ Jiobá. Pa iníʼ íquenu de ni biʼniʼ Jesús la? zusiidiʼ ni laanu iníʼ íquenu casi laabe, guni sentirnu casi biʼniʼ sentirbe ne zusihuínninu rianu binni ora maʼ ziucheechenu diidxaʼ.
2 Iníʼ íquenu de Jesús, ne idúʼyanu xi bíʼnibe ora uyé binni ra nuube ne unábacaʼ laabe acanebe laacaʼ (Luc. 5:12, 13; 8:43-48). Cumu Jesús nanna cadi tobi si clase endananá napa ca binni que la? adxé adxé modo ucanebe laacaʼ (Mar. 7:31-35). Ne laaca gúnnabe xi biʼniʼ sentir ca binni que ne bizaaláʼdxibe acanebe laacaʼ. Ne laaca biiyabe ni nuu ndaaniʼ ladxidoʼcaʼ (Luc. 7:36-40). Ne ni bíʼnibe ca bisihuínnibe ximodo riuubalaʼdxiʼ Bixhózebe binni.
3 Biabe binni. Jesús cadi bicheeche diʼ diidxaʼ purtiʼ si naquiiñeʼ gúnini, sínuque bíʼnibe ni purtiʼ biabe ca binni que pur modo nuucaʼ (Mar. 6:34). Laanu laaca cadi rininésinu laacabe de Stiidxaʼ Dios sínuque ruyúbinu ximodo ganda ilácabe. Racaláʼdxinu guiénenu xiñee ricabi ca binni ca laanu modo rúnicani ora maʼ ziucheechenu diidxaʼ. Xi ruchiiñaʼ ne xi riguu xizaa laacabe yaʼ. Ñee qué rizaalaʼdxiʼ ca pastor stícabe gusiidicaʼ laacabe xipeʼ nga rusiidiʼ Biblia nga runi nuucabe lu gueelacahui la? Pa gúʼyacabe dxandíʼ racaláʼdxinu acanenu laacabe la? zándaca chuláʼdxicabe ucaadiágacabe ca diidxaʼ nacubi ne galán ca (2 Cor. 6:4, 6).
4 Ra usihuínninu dxandíʼ rianu binni zindanu de ndaaniʼ ladxidóʼcabe. Idúʼyanu ti ejemplu de ni caninu riʼ. Ti gunaa ni nanaruʼ nuu ladxidóʼ pur guti ti dxaapahuiiniʼ stiʼ de chonna beeu. Ora bixhidxináʼ chupa Testigu ra puertaʼ lídxibe, uluube laacaʼ ndaaniʼ lídxibe para si gábibe laacaʼ cadi jneza diʼ modo rusiénecaʼ xi pur rudii Dios lugar tiidiʼ binni lu endananá. Peru neca zaqué la? despué gunaa riʼ bicaa sicaríʼ: «Modo bicaadiágacabe naa que bisihuínnicabe dxandíʼ cayácabe naa ne ngue ucané chuaa galán. Ngue runi, ora maʼ chécabe que gudxeʼ laacabe zaa gueeda gánnacabe naa sti biaje». Yanna laanu, ñee rúninu stipa pur usihuínninu rianu tutiica binni idxélanu ora maʼ canaucheechenu diidxaʼ la?
5 Ra usihuínninu riubaláʼdxinu binni la? dxandipeʼ zacanenu laacabe gatadxí ladxidóʼcabe. Ne pa gúninu zacá, zusisácanu Jiobá purtiʼ «Bixhoze nu laa ne riá laanu» (2 Cor. 1:3).