Gusihuínninu rianu binni
1. Xi caquiiñeʼ binni yanna.
1 Yanna riʼ nga jma stale binni canabaʼ chuʼ tu guiá laa. Cumu guizáʼ nagana modo nabani binni la? nga runi guiráʼ ladu nuu stale binni napa depresión, cadi nuucaʼ nayecheʼ ne cadi cabézacaʼ gaca chaahuiʼ guiráʼ ni cayaca yanna. Ca dxi riʼ nuu millón de binni ni caquiiñeʼ gacanécabe laa, ne laanu casi xpinni Cristu nuu lu nanu gusihuínninu dxandíʼ rizaaláʼdxinu laacaʼ (Mat. 22:39; Gál. 6:10). Yanna guidúʼyanu ximodo zanda gusihuínninu ni.
2. Gunáʼ nga ti modo jma galán gusihuínninu rianu binni.
2 Ti dxiiñaʼ ni rusihuinni rianu binni. Jiobá nga tobi lucha ni zanda quixhedxí ladxidóʼ binni (2 Cor. 1:3, 4). Laabe cayábibe laanu guianu binni cásica rúnibe ni, ne laaca canábabe laanu chinenu ca diidxaʼ nacubi ne galán stiʼ Reinu ra nuu ca xpecínunu (1 Ped. 3:8). Ra gúninu dxiiñaʼ riʼ sin guiaanadxinu zusihuínninu laani nga ti modo jma galán para quixhedxinu ladxidóʼ ca binni ni «cayuubaʼ ladxidóʼ», purtiʼ Reinu si stiʼ Dios nga dxandipeʼ zabee guiráʼ cani runiná laanu (Isa. 61:1). Maʼ cadi candaa zabee Jiobá guiráʼ cosa malu ne zedané ti guidxilayú cubi ra guibani binni nachaʼhuiʼ ne zúnibe ni purtiʼ riabe ca xpínnibe (2 Ped. 3:13).
3. Ximodo zanda guidúʼyanu binni cásica biiyaʼ Jesús laacaʼ.
3 Guidúʼyanu binni cásica biiyaʼ Jesús laacaʼ. Neca bicheeche Jesús diidxaʼ lade stale binni, bisisácabe cada tobi de laacaʼ. Nánnabe caquiiñeʼ cada tobi de ca binni que gacanécabe laacaʼ para chuʼcaʼ gaxha de Dios ne ngue bicaa laabe gápabe paciencia ora bisiidibe laacaʼ. Ne bíʼnibe zacá, purtiʼ biuubaʼ ladxidoʼbe ora biiyabe nuucaʼ casi dendxuʼ ni qué gapa pastor (Mar. 6:34). Pa guidúʼyanu binni cásica biiyaʼ Jesús laacabe la? ziale de ndaaniʼ ladxidoʼno guianu laacabe ne zahuinni zacá ni pur modo guihuinni lunu ne pur modo guininu. Ne jma zacá íquenu gucheechenu diidxaʼ ne zanínenu binni de ca cosa ni naguu xizaa cada tobi de laacaʼ (1 Cor. 9:19-23).
4. Xiñee naquiiñeʼ gusihuínninu rianu binni.
4 Stale mil binni de guiráʼ guidxi roʼ racaláʼdxicaʼ guiziidicaʼ de Reinu stiʼ Dios ne riuuláʼdxicaʼ ora ruuyacaʼ dxandíʼ rizaaláʼdxinu laacaʼ. Ora gusihuínninu rianu binni rusisácanu Jiobá, Dios ni riá binni, ne rusiéchenu ladxidoʼbe (Col. 3:12).