Guleendú ni galán ora cheluʼ ca guendaridagulisaa raca ante chigucheecheluʼ diidxaʼ
1. Ximodo racané ca guendaridagulisaa ni raca ante chigucheechenu diidxaʼ ca laanu yaʼ.
1 Ca guendaridagulisaa raca ante chigucheechenu diidxaʼ riguu cani gana laanu ne rusiidiʼ cani laanu para ganda guinínenu binni ora maʼ zigucheechenu diidxaʼ. Ne ora chuunu ca guendaridagulisaa ra riuu grupu ca o guiréʼnenu tobi de ca bíʼchinu o tobi de ca bizáʼnanu la? rizíʼdinu de laacabe ne racané saanu (Pro. 27:17; Ecl. 4:9, 10). Ximodo zanda cueendunu ni galán ora chuunu ca guendaridagulisaa riʼ yaʼ.
2. Bizeeteʼ chupa chonna de cani zanda guʼndaʼ binni ni chindee grupu ca.
2 Ni ribee grupu. Guendaridagulisaa riʼ gadxé ni de xcaadxi guendaridagulisaa rápanu, purtiʼ cadi maca diʼ nexheʼ xi chiguiuundaʼ luni. Nga runi, pa lii chindeeluʼ grupu ca la? naquiiñeʼ guiníʼ ique chaahuiluʼ xi zanda gusiidiluʼ lu guendaridagulisaa ca . Cadi guiráʼ diʼ biaje naquiiñeʼ gúʼndaluʼ textu biaba dxi ca lu guendaridagulisaa ca, peru zanda gúʼndaluʼ ni pa zacaneni laacabe para gucheechecabe diidxaʼ. Guníʼ ique xi zanda gacané cani chigucheeche diidxaʼ dxi chindeeluʼ grupu ca. Zanda gusiéneluʼ o gutiidiluʼ ti modo zanda gucheechetu diidxaʼ. Laaca zanda guzeeteluʼ xiixa ni zeeda lu libru Razonamiento, Benefíciese o xiixa ni nacubi biuundaʼ lu Guendaridagulisaa stiʼ Dxiiñaʼ Stinu. O guiniʼluʼ xi zanda gúnicabe pa guidxagalúcabe xiixa guendanagana neza ra rucheechecabe diidxaʼ. Laaca zanda guiniʼluʼ ximodo zanda guni cani rucheeche diidxaʼ para chuulaʼdxiʼ binni guiziidiʼ jma ti ganda guzulú guʼndanécabe laacaʼ Biblia, jmaruʼ si pa stale de cani rucheeche diidxaʼ ca chigánnacaʼ binni sti biaje. Yanna, intiica si ni guiniʼluʼ lu guendaridagulisaa ca, bicaa ique uguuluʼ gana laacabe.
3. Pabiáʼ naquiiñeʼ guindaa guendaridagulisaa riʼ, ne xii nga ni naquiiñeʼ gaca biaʼ tiempu ca.
3 Bizulú guendaridagulisaa ca hora maca nexheʼ gácani, neca nánnaluʼ nuu tu zedandá maʼ huadxí. Naquiiñeʼ guiníʼ ique chaahuiluʼ ora guseendaluʼ laacabe pur grupu, ne gudxi laacabe paneza zanda gúnicabe dxiiñaʼ. Guendaridagulisaa ni raca ante chigucheechenu diidxaʼ riʼ cadi naquiiñeʼ guindaa ni jma de chii o quince minutu, ne pa gácani despué de sti guendaridagulisaa la? naquiiñeʼ gácani jma nagueenda. Ante guilúxeluʼ, guiráʼ cani chigucheeche diidxaʼ ca naquiiñeʼ gánnacaʼ tu chinecaʼ ne paneza chigúnicaʼ dxiiñaʼ. Oracaruʼ binduuxeʼ guendaridagulisaa ca ne ti oración.
4. Xi zanda gúninu para cueendunu ni galán ora guidagulisaanu ante chigucheechenu diidxaʼ.
4 Lii zanda gacaneluʼ. Ora riuunu xcaadxi guendaridagulisaa raca la? rusihuínninu runi respetarnu Jiobá ne rizaaláʼdxinu guiráʼ cani rié racá ora rindanu tempranu. Gudixhe ique guicábiluʼ lu guendaridagulisaa raca ante chigucheechenu diidxaʼ. Zanda cuézaluʼ ni cabee grupu ca gabi lii tu chineluʼ o guyúbiluʼ dede ante tu chineluʼ. Pa lii maca guníʼneluʼ tuuxa gunineluʼ dxiiñaʼ la? zanda gúniluʼ ni, peru cadi cuiluʼ cani jma si xhamíguluʼ. Ne zacá zusihuínniluʼ laacaʼ nadxiiluʼ xcaadxi bíʼchinu ne bizáʼnanu (2 Cor. 6:11-13). Ora maʼ biluxe guendaridagulisaa riʼ, cadi guchaaluʼ cani maca nexheʼ chigaca ne guyeca ra gúdxicabe lii guʼnuʼ dxiiñaʼ.
5. Xiñee ridagulisaanu ante chigucheechenu diidxaʼ.
5 Ca guendaridagulisaa ni raca ante chigucheechenu diidxaʼ ca racané cani laanu gucaʼ íquenu gacané saanu, gannaxhiinu jma, ne gúninu ni nachaʼhuiʼ cásica racané xcaadxi guendaridagulisaa ni rápanu ca laanu (Heb. 10:24, 25). Pa gúninu stipa pur gucaadiaga chaahuinu ne guizíʼdinu ni rieeteʼ lu ca guendaridagulisaa riʼ la? zacané cani laanu gucheechenu diidxaʼ jma jneza. Ne dxiiñaʼ riʼ nabé risácani.