«Cudiibe stipa cani maʼ bidxaga»
1 Guiráʼ xixenu ridxáganu, nuu tiru pur dxiiñaʼ ni rúninu o purtiʼ bíninu sti cosa ni bisidxaga laanu. Peru cadi laasi cani nga rusidxaga cani laanu, laaca rusidxaga ca guendanagana ni cadxagalunu lu ca últimu dxi riʼ laanu (2 Tim. 3:1). Xi racané laanu para cadi guidxáganu ne cadi gusaana de gucheechenu diidxaʼ yaʼ. Ni racané laanu nga gánnanu zudii náʼ Jiobá laanu purtiʼ «nápabe stale poder» (Isa. 40:26). Nánnabe xi caquiiñenu ne riuuláʼdxibe gacanebe laanu (1 Ped. 5:7).
2 Cani rudii Jiobá para gacané laanu. Jiobá racané laanu ne espíritu santu stiʼ, ne laaca stipa ca nga biquiiñebe para bizaʼbe guidubi naca guibáʼ ne Guidxilayú. Espíritu stiʼ Dios ca nga ni rudii stipa laanu ora maʼ bidxáganu (Isa. 40:31). Guinabadiidxanu laca laanu: «Padxí gunieniáʼ Jiobá últimu biaje para guinabaʼ laa gudii naa espíritu stiʼ ti ganda guneʼ Xhiiñabe yaʼ» (Luc. 11:11-13).
3 Pa guidúʼndanu Stiidxaʼ Dios guiráʼ dxi ne guiníʼ íquenu de laani ne gúʼndanu ca libru ne revista ni ricaanu la? zazíʼdinu stale de laabe. Pa gúninu ni la? zeeda gácanu casi ti yaga nagáʼ ni «zuhuaa ra cuxooñeʼ nisa, ni rudii cuananaxhi stiʼ xhi ne ca bandaga stiʼ qué riguunduʼ» (Sal. 1:2, 3).
4 Jiobá laaca riquiiñeʼ ca xpinni para quixhedxí ladxidoʼno (Col. 4:10, 11). Riguixhedxícabe ladxidoʼno ora riniʼnécabe laanu diidxaʼ lu ca guendaridagulisaa stinu, ora guicábicabe ne ora gudiicabe ti libana ni gacané laanu (Hech. 15:32). Cani jma zanda gacané ne uguu gana laanu nga ca binnigola ni cayuni xhiiñaʼ Dios (Isa. 32:1, 2).
5 Gucheechenu diidxaʼ. Cadi gusaana de gucheecheluʼ diidxaʼ pa cayuni sentirluʼ maʼ bidxágaluʼ, purtiʼ laani zudiini stipa lii ne qué rusidxágani binni casi sti dxiiñaʼ (Mat. 11:28-30). Ora gucheechenu diidxaʼ racaneni laanu guiníʼ íquenu ni chiguni Reinu stiʼ Dios, ne laaca racaneni laanu cadi gusiáʼndanu guendanabani ni qué zaluxe ne guiráʼ ndaayaʼ ni zacaanu.
6 Nuu stale ni caquiiñeʼ gúninu ante guinitilú guidxilayú stiʼ Binidxabaʼ riʼ. Nápanu stale razón para cadi gusaananu de gucheechenu diidxaʼ ne gúninu jma lu xhiiñaʼ Dios biaʼ stipa ni gudiibe laanu (1 Ped. 4:11). Jiobá si nga zanda gacané laanu gundúʼxenu dxiiñaʼ ni maʼ bisaanané laanu, purtiʼ laabe «cudiibe stipa cani maʼ bidxaga» (Isa. 40:29).