Nayecheʼ nuunu purtiʼ caquiiñenu guiráʼ stipa stinu para gúninu xhiiñaʼ Jiobá
1 Apóstol Pablu nabé guyuulaʼdxiʼ gucheeche diidxaʼ neca guniti guiráʼ ni napa (2 Cor. 12:15). Cásica bíʼnibe que, ca dxi stinu riʼ stale xpinni Cristu cayúnicaʼ stipa para gácacaʼ precursor. Xcaadxi, neca rúnicaʼ dxiiñaʼ para guyaanacaʼ binnilídxicaʼ ribeecaʼ tiempu guiráʼ semana para gucheechecaʼ diidxaʼ. Nuu xcaadxi xpinni Cristu neca maʼ huaracaʼ, peru rúnicaʼ stipa pur gucheecherucaʼ diidxaʼ. Ora guidúʼyanu ca binni riʼ cayúnicaʼ xhiiñaʼ Jiobá ne stale gana, neca maʼ huaniisicaʼ o raca nagana para laacaʼ gúnicaʼ ni la? nga racané laanu gúninu cásica cayúnicabe.
2 Nadxiinu binni. Pa gúninu stipa pur gúninu xhiiñaʼ Jiobá, gusihuínninu nadxiinu laabe ne gannaxhiinu binni la? ziuʼnu nayecheʼ purtiʼ cayúninu ni na Dios. Cumu qué nusaana Pablu de nucheeche diidxaʼ la? gunda guníʼ ca diidxaʼ riʼ: «Cayabeni laatu nagasi, ma cadi naa diaʼ napa donda pa initilú tu» (Hech. 20:24, 26; 1 Tes. 2:8). Pa gucheechenu diidxaʼ biaʼ ganda la? qué západinu donda pa gati ca binni ca (Eze. 3:18-21).
3 Riuʼnu nayecheʼ ora rúninu stipa pur gacanenu binni (Hech. 20:35). Ti xpinni Cristu guníʼ: «Ora maʼ biluxeʼ bicheecheʼ diidxaʼ neca maʼ bidxagaʼ ora chindayaʼ ra lidxeʼ, peru guizáʼ riuaa nayecheʼ. Guiráʼ ora rudiee xquíxepeʼ Jiobá purtiʼ guirutiʼ ne gastiʼ qué zanda gaxha naa guendanayecheʼ ni napaʼ riʼ».
4 Nadxiinu Dios. Tobi de ca razón jma risaca nápanu para cadi gusaana de gúninu xhiiñaʼ Jiobá nga purtiʼ laabe riuuláʼdxibe gúninu ni. Cumu nadxiinu Dios la? nga rucaa laanu guzúʼbanu stiidxabe, ne tobi de cani rinábabe laanu gúninu nga gucheechenu diidxaʼ ne gacanenu binni gaca xpinni Cristu (1 Juan 5:3). Neca stale binni qué riná gucaadiaga laanu, peru qué rusaananu de gúninu dxiiñaʼ riʼ ne rúninu ni ne stale guendanayecheʼ purtiʼ cayúninu ni para Jiobá.
5 Ca dxi nabáninu riʼ caquiiñeʼ gúninu jma lu xhiiñaʼ Jiobá, purtiʼ yanna cutópanu ni bidxiibanu (Mat. 9:37). Cásica ti binni ni runi dxiiñaʼ lu layú, ora maʼ candisa cosecha stiʼ dede maʼ huadxí maʼ cayuni dxiiñaʼ para gutopa cani bidxiibaʼ ti cadi guiuʼdxuʼ cani. Zacaca nga naquiiñeʼ gúninu ca dxi riʼ, laaca huaxiéʼ tiempu nápanu para gusíʼdinu binni de stiidxaʼ Dios. Cadi guiaandaʼ laanu xi tiempu ndiʼ nabáninu, ti tiempu ra cadi caquiiñeʼ gusaananu de gúninu stale stipa para gucheechenu stiidxaʼ Jiobá (Luc. 13:24; 1 Cor. 7:29-31).