Maʼ nuu ca layú ca listu para guiasa cosecha
1. Xi dxiiñaʼ risaca cayaca yanna.
1 Guniʼné si Jesús ti gunaa de Samaria, gúdxibe ca discípulo stibe ca diidxaʼ riʼ: «Laindisa lú, laguuya ca ñaa ca guʼya tu ma nuu cani para iree cani guela [o guiasa cosecha stícani]» (Juan 4:35, 36). Dxandíʼ, dede dxiqué nga maca bizulú cayacanécabe binni guiziidiʼ de Dios, dxiiñaʼ riʼ zeeda gácani casi ora candísacabe cosecha, ne Jesús nanna zaca dxiiñaʼ riʼ lu guidubi naca Guidxilayú. Ne de yanna cayuuyaʼ Jesús cayaca dxiiñaʼ riʼ dede guibáʼ (Mat. 28:19, 20). Xi cusihuinni nagueenda caroobaʼ dxiiñaʼ riʼ laga cadxiña dxi guiluxe ni yaʼ.
2. Xi cusihuinni caroobaʼ dxiiñaʼ ni cayúninu riʼ lu guidubi naca Guidxilayú.
2 Cayasa cosecha lu guidubi naca Guidxilayú. Lu iza dxiiñaʼ 2009 bidale cani rucheeche diidxaʼ lu guidubi naca Guidxilayú, guyuu 3.2% jma que udubiza. Ne ndaaniʼ ca guidxi ra qué riná gobiernu guireeche diidxaʼ, bidale ti 14% de cani rucheeche diidxaʼ. Laacabe biindanécabe jma de 7,619,000 binni de Biblia cada beeu. Jma stale binni nga bisiidicabe de lu Biblia que guiráʼ cani rucheeche diidxaʼ ni nuu lu guidubi naca Guidxilayú. Biindanécabe biaʼ gaayuʼ gayuaa mil binni jma que biaʼ biindanécabe udubiza. Cumu ziroobaʼ dxiiñaʼ riʼ ndaaniʼ stale lugar la? jma stale tu canabaʼ cheʼ ca misioneru ni guyé scuela stiʼ Galaad ca lugar ca para chigacanecaʼ. Ndaaniʼ stale guidxi cadxela jma binni ni riníʼ sti diidxaʼ ni riuulaʼdxiʼ guiziidiʼ de Dios. Rihuinni dxíchica nagueenda cusiroobaʼ Jiobá dxiiñaʼ riʼ lu tiempu ra mayaca guiluxe cosecha ca (Isa. 60:22). Ñee riníʼ íqueluʼ nuuruʼ binni ni riuulaʼdxiʼ guiziidiʼ de Dios neza ra rucheecheluʼ diidxaʼ la?
3. Xi zándaca guiníʼ ique caadxi xpinni Cristu de dxiiñaʼ ni rúnicaʼ neza ra rucheechecaʼ diidxaʼ.
3 Cayasa cosecha neza ra rucheechenu diidxaʼ. Zándaca chuʼ tu guiníʼ: «Huaxiéʼ binni riuulaʼdxiʼ guiziidiʼ de Dios neza ra rucheecheʼ diidxaʼ». Dxandíʼ, nuu caadxi lugar ruluíʼ maʼ qué riná binni guiziidiʼ de Dios o maʼ qué rinacaʼ guiziidicaʼ casi dxiqué. Nga runi, zándaca chuʼ xpinni Cristu guiníʼ ique maʼ guirutiʼ zaná guiziidiʼ de Dios neza ra rucheeche diidxaʼ, ruuyacabe ni casi ora maʼ biluxe cosecha ca ne ni zanda si gúnicabe nga gutopasícabe ni biaana. Peru, ñee dxandíʼ zacá ni la?
4. Ximodo naquiiñeʼ gúʼyanu dxiiñaʼ ni cayúninu de gucheechenu diidxaʼ, ne xiñee.
4 Nabé nadipaʼ nga dxiiñaʼ runi ti binni para gacané tuuxa guiziidiʼ de Dios. Rihuínnica pabiáʼ caquiiñeʼ tu guni dxiiñaʼ ca, pur ca diidxaʼ ni guníʼ Jesús riʼ: «Ma stale binni cabeza si ucaa diaga stiidxa Dios. Tu güi ni nga huaxiéʼ. Yanna lainaba lu Dios useenda stale tu guni dxiiña ca, ti laabe nga xpixuaana ni» (Mat. 9:37, 38). Casi maʼ bidúʼyanu ca, Jiobá nga xpixuaanaʼ dxiiñaʼ ca, nga runi laasibe nánnabe padxí ne paraa zanda guidxélanu ca binni ni riuulaʼdxiʼ guiziidiʼ (Juan 6:44; 1 Cor. 3:6-8). Yanna laanu, xi zanda gúninu yaʼ. Biblia rabi laanu: «Bidxiibaʼ biidxiʼ stiluʼ siadóʼ, ne cadi guiaanadxí naluʼ dede ora gaca huadxí; purtiʼ qué gánnadiluʼ paraa zandánini, pa raríʼ o pa raricaʼ, o guiropaʼ lugar ca» (Ecl. 11:4-6). Ora mayaca guiluxe ti cosecha la? cadi naquiiñeʼ diʼ gusaana binni de guni dxiiñaʼ.
5. Xiñee caquiiñeʼ gucheechenu diidxaʼ né stale gana neca huaxiéʼ riuulaʼdxiʼ binni guiziidiʼ de Dios neza ra rucheechenu diidxaʼ.
5 Caʼruʼ diʼ guiluxe guiasa cosecha ca. Nécapeʼ maʼ stale biaje nga guninenu ca binni ni nabeza neza ra rucheechenu diidxaʼ ne ruluíʼ qué riuuláʼdxicaʼ guiziidicaʼ de Dios la? nápanu razón para gúninu dxiiñaʼ ca né stale gana ne nagueendaca (2 Tim. 4:2). Guiráʼ cosa feu ni cayaca lu guidubi naca Guidxilayú, nabé ruchíbicani binni ne rucaacani laacaʼ guchaacaʼ modo laacaʼ ne ca cosa ca rucaacani binni guiníʼ ique xi gaca de laacaʼ despué. Cani nahuiiniʼ ca rudiicaʼ cuenta caquiiñecaʼ xiixa ni quixhedxí ladxidoʼcaʼ ne xiixa ni zanda gacané laacaʼ para cadi gacanacaʼ laga ziniisicaʼ. Zándaca dxiqué guyuu binni ni qué niná nucaadiaga laanu, peru ora ruuyacaʼ laanu qué rireʼnu gana de gucheechenu diidxaʼ la? nga rucaa laacaʼ chuuláʼdxicaʼ gánnacaʼ jma de dxiiñaʼ ni rúninu. Dede ca binni ni qué liica riná gucaadiaga laanu naquiiñeʼ gánnacaʼ de Dios (Eze. 2:4, 5; 3:19).
6. Xi zanda gúninu pa riníʼ íquenu maʼ qué zadxélarunu binni ni riuulaʼdxiʼ guiziidiʼ de Dios.
6 Zándaca qué riná binni gucaadiaga laanu ora maʼ zigucheechenu diidxaʼ de yoo pur yoo. Xi zanda gúninu para cadi guireʼnu gana yaʼ. Zanda gucheechenu diidxaʼ xcaadxi modo, casi ra nuu ca negocio ca o pur teléfono. Laaca zanda guyúbinu xcaadxi modo guinínenu binni ne guzéʼtenu xiixa ni chuuláʼdxibe gucaadiágabe. Sti cosa ni zanda gúninu nga guchaʼnu hora riucheechenu diidxaʼ, guireʼnu ca huadxí ca o sti hora riníʼ íquenu jma zanda guidxélanu binni ralidxi. Dede zanda guizíʼdinu sti diidxaʼ para ganda gacanenu jma binni guiziidiʼ de Dios. Pa gácanu precursor regular, zúninu jma lu xhiiñaʼ Jiobá. Sti cosa ni zanda gúninu nga chindézanu sti guidxi ra caquiiñeʼ tu gucheeche diidxaʼ. Pa guiníʼ íquenu zadxélarunu binni ni riuulaʼdxiʼ guiziidiʼ de Dios la? zúninu stipa pur gucheechenu diidxaʼ biaʼ gándatiʼ.
7. Dede padxí nga naquiiñeʼ gucheechenu diidxaʼ.
7 Ca binni ni runi dxiiñaʼ lu layú maca nánnacaʼ padxí nga maʼ zanda guindísacaʼ cosecha sticaʼ, nga runi qué rusaanacaʼ de gúnicaʼ dxiiñaʼ luni dede dxi maʼ guiluxe guiasa cosecha ca. Dxiiñaʼ ni nápanu de gucheechenu diidxaʼ ca laaca caquiiñeʼ gácani nagueendaca. Dede padxí nga naquiiñeʼ gúninu dxiiñaʼ riʼ yaʼ. «Dede dxi iluxe guidxilayú.» (Mat. 24:14; 28:20.) Cásica biʼniʼ Siervu stiʼ Jiobá, laanu laaca rúninu dxiiñaʼ ni maʼ gucuaanu riʼ ne nápanu gana gúninu ni dede ra guiluxe ni (Juan 4:34; 17:4). Nga runi, naquiiñeʼ gucheechenu diidxaʼ né stale gana, gúninu ni né guendanayecheʼ ne cadi guiníʼ íquenu maʼ qué zadxélanu binni ni riuulaʼdxiʼ guiziidiʼ de Dios. Zúninu dxiiñaʼ riʼ dede dxi guiluxe guidxilayú (Mat. 24:13). ¡Caʼruʼ diʼ guiluxe cosecha ca!
[Ni caníʼ yaza 2]
Nabé nadipaʼ nga dxiiñaʼ runi ti binni para gacané tuuxa guiziidiʼ de Dios