Gúninu stipa pur gúninu jma lu xhiiñaʼ Dios
1 Dxi gudxi apóstol Pablu ca xpinni Cristu sacaʼ lu neza stiʼ Dios, laaca gúdxibe laacaʼ ca diidxaʼ riʼ: «Rinaba du laatu jma rusi guni tu ni» (1 Tes. 4:1). Xi gucaláʼdxibe niniʼbe ne ca diidxaʼ riʼ yaʼ. Ni nabe nga naquiiñeʼ guyúbinu modo gúninu jma lu xhiiñaʼ Dios ne guicá íquenu «güi[nu] stiidxa Cristu» biaʼ gándatiʼ (2 Tim. 4:5).
2 Naquiiñeʼ guiáleni de ndaaniʼ ladxidoʼno. Cumu racaláʼdxinu chuulaʼdxiʼ Jiobá ni cayúninu la? ruyúbinu modo gúninu jma lu xhiiñabe. Laaca naquiiñeʼ guizíʼdinu jma de laabe ne guyúbinu modo gusíʼdinu binni jma jneza ora maʼ zigucheechenu diidxaʼ. Ni zanda gacané laanu nga quíxhenu ti dxi para guidúʼndanu Biblia ne para gúninu xhiiñaʼ Jiobá. Pa de guidubi ladxidoʼno gúninu ca cosa riʼ la? zanda ugaandanu cani naguixhe íquenu (Sal. 1:1, 2; Fili. 4:6; Heb. 10:24, 25).
3 Peru laaca caquiiñeʼ guiale de ndaaniʼ ladxidoʼno gacanenu ne gudiʼnu de laanu. Para ganda gúninu ni la? caquiiñeʼ guinábanu Dios gacané laanu guiníʼ íquenu guiráʼ ni biʼniʼ Jesús ti ganda gúninu cásica bíʼnibe (Mat. 20:28). Biaʼ dxi bíʼnibe xhiiñaʼ Dios gucanebe binni ne ni bíʼnibe ca bisiecheʼ ni laabe (Hech. 20:35). Zacaca zanda gúninu pa guyúbinu modo gacanenu binni ne guyúbinu modo gúninu jma lu xhiiñaʼ Dios (Isa. 6:8).
4 Ejemplu stiʼ cani napa xiiñiʼ. Dede ti baʼduhuiiniʼ zanda guiale ndaaniʼ ladxidóʼ guni ni na Dios ne guyubi modo guni jma lu xhiiñabe, peru caquiiñeʼ guiziidiʼ chaahuibe ni. Ruuyacabe stipa ni runi binnilídxicabe para gúnicaʼ jma lu xhiiñaʼ Dios. Zacá bizaaca ti Testigu, dede nahuiinibe nabé gucanebe bixhoze bídabe lu ca dxiiñaʼ ni gupa lade ca binni ridagulisaa. Biiyabe nabé gudixhe ique bixhoze bídabe lu ca dxiiñaʼ gupa lade ca binni ridagulisaa ne biʼniʼ cani ne stale guendanayecheʼ, ngue bicaa laabe guyúbibe modo gacanebe xcaadxi xpinni Cristu. Yanna maʼ siervu ministerial laabe.
5 Ca hombre ni naca xpinni Cristu. «Pa nuu tuuxa cá ique gaca xaíque sti ca xpinni Cristu la? jneza ni cá ique guni.» (1 Tim. 3:1.) Ca diidxaʼ riʼ cayabi cani ca hombre ni naca xpinni Cristu guchaca gana para ugaandacaʼ jma dxiiñaʼ ndaaniʼ xquidxi Dios. Cadi caquiiñeʼ diʼ gácacabe binni ni nanna stale; ni caquiiñeʼ si nga quixhe íquecabe gúnicabe xhiiñaʼ Reinu stiʼ Dios primé lu xquendanabánicabe ne gucheechecabe diidxaʼ ne stale gana (Mat. 6:33; 2 Tim. 4:5). Laaca caquiiñeʼ gácacabe ti ejemplu para xcaadxi.
6 Ni caquiiñeʼ gaca lu guidubi naca guidxilayú. Nagueenda cutale Jiobá ca binni ni cayuu ndaaniʼ xquidxi (Isa. 60:22). Nga runi, guiráʼ cani zinanda Cristu caquiiñeʼ quixhe íquecaʼ gúnicaʼ jma lu xhiiñaʼ Reinu. Lu iza dxiiñaʼ 2006 guyuunisa 248,327: ¡biaʼsi guyuunisa jma de xhoopaʼ gayuaa ochenta xpinni Cristu guiráʼ dxi! Nga runi, naquiiñeʼ guyubi cada tobi de laanu modo guni jma lu xhiiñaʼ Dios.