Naquiiñeʼ chinándanu ejemplu stiʼ Jesús
1. Xi ejemplu bisaana Jesús para laanu.
1 Ora maʼ canagucheechenu diidxaʼ, naquiiñeʼ gánnanu zanda gacané ejemplu stinu ca binni ni guʼyaʼ laanu. Ca binni ni guyuu gaxha de Jesús biziidicaʼ de cani guniʼbe ne de cani bíʼnibe. Biiyacaʼ qué nusaanabe de nucheechebe diidxaʼ, nabé gunnaxhiibe binni, qué ñuu dxi nusaanabe de nusisácabe lá Bixhózebe ne gudixhe íquebe gúnibe ni na (1 Ped. 2:21).
2. Ximodo zanda gacané ejemplu stinu cani rigucheechenenu diidxaʼ.
2 Ora gucheechenenu stobi diidxaʼ. Cásica Jesús, ejemplu stinu zanda gacaneni cani rigucheechenenu diidxaʼ. Ora guʼyaʼ cani nacubi o cani qué gánnapeʼ gucheeche diidxaʼ rúninu xhiiñanu ne stale gana la? zaníʼ íquecaʼ pa rucheechecaʼ diidxaʼ jneza. Ora gúʼyacaʼ nuunu nayecheʼ ne dxandíʼ racaláʼdxinu gacanenu binni la? zucaani laacaʼ gacanecaʼ binni ora maʼ zigucheechecaʼ diidxaʼ. Ne pa gúʼyacaʼ nabé riquiiñenu Biblia ora gucheechenu diidxaʼ, ribiguétanu ra nuu cani guyuulaʼdxiʼ ganna jma ne rigúʼndanenu binni ra lidxi la? laaca zúnicaʼ zacaca.
3. Ximodo zanda gacané ejemplu stinu cani ruundanenu, ne xi zabeendúcabe.
3 Ora rigúʼndanenu binni ra lidxi. Cani ridúʼndanenu Biblia jma nga ruuyacaʼ ni rúninu. Laacaʼ zudiicaʼ cuenta pa rúninu ni cayábinu laacaʼ gúnicaʼ, casi gúʼndacaʼ libru sticaʼ ante chigúʼndanenu laacaʼ, guyúbicaʼ ca textu zeeda lu libru sticaʼ ne guzaacaʼ raya xaʼnaʼ ca diidxaʼ ni jma naquiiñeʼ gánnacaʼ (Rom. 2:21). Zaqueca, pa riuunu ra nuucaʼ ora biaananenu laacaʼ ne pa qué riáʼdxanu, nga zucaa laacaʼ cadi gudiicaʼ lugar chuʼ xiixa ni gucueeza de gúʼndacaʼ. Laaca zudiicaʼ cuenta naguidxi fe stinu ne cudiʼnu guiráʼ ni nápanu ti ganda gucheechenu diidxaʼ. Nga runi, ora ti Testigu ni zinanda ne stale cuidadu ejemplu stiʼ Jesús gúʼndané tuuxa la? cadi guendaridxagayaa diʼ nga gucheeche binni ca diidxaʼ ne stale gana.
4. Ximodo zanda gusíʼdinu ne ejemplu stinu ora guidagulisaanu.
4 Ora guidagulisaanu. Cada tobi de cani nuu ndaaniʼ xquidxi Dios rusiidicaʼ ne ejemplu sticaʼ ra ridagulisaacaʼ. Ca binni ni nacubi cayé riziidicaʼ stale de ca ejemplu galán ni ruuyacaʼ ra ridagulisaanu. Ruuyacaʼ nabé nadxiisaanu, cadi nuu díndenu, rácunu lari jneza ne rizuchaahuinu jneza (Sal. 133:1). Laaca rudiicaʼ cuenta ora qué riáʼdxanu ca guendaridagulisaa ca ne laaca rusihuininu fe stinu ora ricábinu lúcani. Ti binni ni guyé ti guendarigulisaa bidxagayaa ora biiyaʼ pabiáʼ nagueenda cadxelaʼ ti dxaapahuiiniʼ textu ndaaniʼ Biblia stiʼ ne zinanda ra cayuundaʼ ni cudii libana que. Ejemplu stiʼ dxaapahuiiniʼ que bicaa ni binni que guinabaʼ chiguundanécabe laa Biblia.
5. Xiñee cadi naquiiñeʼ guiníʼ íquenu qué zacané ejemplu stinu xcaadxi binni.
5 Stiidxaʼ Dios cayabi laanu galán chinándanu ejemplu stiʼ stobi ne zaqueca laa chinanda ejemplu stinu (Fili. 3:17; Heb. 13:7). Nga runi, naquiiñeʼ guietenaláʼdxinu, pa chinándanu ne stale cuidadu ejemplu bisaana Jesús la? zanda gusiidinu ne ejemplu stinu sti binni ni cayuuyaʼ laanu. Cumu nánnanu racanenu stobi la? galán gúninu ni na ca diidxaʼ ni zeeda lu 1 Timoteo 4:16: «Biiya ibani lu jneza ne zaqueca biiya usiidi lu ni jneza».