Cadi gusaananu de guizíʼdinu modo gucheechenu diidxaʼ jma jneza
1 Nabé riecheʼ Bixhózenu ni nuu guibáʼ ora guʼyaʼ tuuxa xpinni caniisi lu Stiidxaʼ ne gueeda gácacaʼ ti binni ni riníʼ ique jneza ne nanna gucheeche diidxaʼ. Apóstol Pablu guluu gana Timoteu, ti binnigola de dxiqué, para icá ique guʼndaʼ ne gusiidiʼ Stiidxaʼ Dios jneza, ti guʼyaʼ binni zeʼ dxi ziyene jma (1 Tim. 4:13-15). Nga runi, guiranu naquiiñeʼ gúninu stipa para ganda gucheechenu diidxaʼ jma jneza, neca maʼ xadxí de rúninu ni.
2 Ni naquiiñeʼ quixhe ique cada tobi de laanu. Para ganda guiniisinu lu Stiidxaʼ Dios la? naquiiñeʼ quixhe íquenu gúninu xiixa. Casi xi laa yaʼ. Zanda gúninu stipa pur guizíʼdinu iquiiñenu Stiidxaʼ Dios jma jneza (Efe. 6:17). Ne zándaca ora maʼ caninenu binni de Stiidxaʼ Dios nuu xiixa ni riaadxaʼ laanu gúninu jma jneza, casi ora gucheechenu diidxaʼ lu calle, pur teléfono o ra rutoo binni; o zándaca caquiiñeʼ ganna chaahuinu gusíʼdinu binni ora chigánnanu laacaʼ sti biaje. Sti cosa ni nabé jneza quixhe íquenu nga guizíʼdinu ximodo gúʼndanenu binni de Biblia.
3 Cani racané laanu gúninu ni. Ca guendaridagulisaa ni rápanu ndaaniʼ Yoo stiʼ Reinu, casi Scuela stiʼ cani Rucheeche Diidxaʼ ne Guendaridagulisaa stiʼ Dxiiñaʼ Stinu, bíʼnicabe cani para gacanécani laanu gucheechenu diidxaʼ jma jneza. Pa gúninu stipa pur guidúʼndanu dede ante cani chitiidiʼ lu ca guendaridagulisaa ca, chuunu cani ne gúninu ni guizíʼdinu raqué la? guizáʼ zacaneni laanu (2 Cor. 9:6).
4 Laaca zanda gacané saanu (Pro. 27:17). Pa gucaadiaga chaahuinu modo guiníʼ bíʼchinu o bizáʼnanu ni cucheechenenu diidxaʼ la? zanda guizíʼdinu gúninu ni jma jneza. Ne binnigola ni rusiidiʼ grupu ni ruundaʼ libru ca laaca zanda gábibe tuuxa gacané laanu. Riéchenu nga ora gacané ti precursor laanu o tuuxa ni napa stale tiempu de cucheeche diidxaʼ, purtiʼ zacá zabeendunu stale cosa sicarú ne zacanenu binni ora maʼ cucheechenu diidxaʼ. Ñee nuu tuuxa ni nacubi cucheeche diidxaʼ lu grupu ni ruundaʼ libru ra riuunu la? Zanda guni invitarnu laabe gucheechenebe laanu diidxaʼ.
5 Dxiiñaʼ ni jma risaca tiempu stinu riʼ nga gucheechenu diidxaʼ stiʼ Reinu. Ora «usisaca nu Dios» la? nuunu gusigáʼdenu laabe xiixa ni jma galán nápanu (Heb. 13:15). Pa gúninu stale stipa pur guizíʼdinu gucheechenu diidxaʼ jma jneza la? zácanu casi Timoteu que, ne zúninu «dxiiña modo chuʼlaʼdxi Dios» ti cadi guituí lunu, purtiʼ rusíʼdinu «stiidxa be jneza» (2 Tim. 2:15).