Quixhedxinu ladxidóʼ cani guti ti binnilidxi
1. Xiñee caquiiñeʼ cani guti binnilidxi chuʼ tu quixhedxí ladxidoʼcaʼ.
1 Nabé naná riuu stale binni ora gati tuuxa binnilidxi, jmaruʼ si para cani qué ganna xi chiguni Reinu stiʼ Dios (1 Tes. 4:13). Stale tu rinabadiidxaʼ: «Xiñee gútibe. Paraa zebe. Ñee zuuyaʼ laabe sti biaje la?». Cani chiguizíʼdinu raríʼ zanda iquiiñenu cani ora maʼ zigucheechenu diidxaʼ para quixhedxinu ladxidóʼ cani guti tuuxa binnilidxi o xhamigu (Isa. 61:2).
2. Ñee zandaanu ra nuu ti binni ni gabi laanu guti ti binnilidxi la?
2 De yoo pur yoo. Guiníʼ íquesinu gabi tuuxa laanu guti ti binnilidxi ora maʼ zigucheechenu diidxaʼ. Ñee rihuinni nabé maʼ biinabe la? Ñee nuu ca xfamíliabe ra nuube pur guti binnilídxibe la? Ni jma galán gúninu nga cadi guindaapenu stale (Ecl. 3:1, 7). Bisihuinni rizaaláʼdxiluʼ laabe, ne zanda gusaananenu laabe ti tratadu, ti revista o ti folletu ni zanda quixhedxí ladxidoʼbe. Ne guibiguétanu sti dxi para güínenu laabe ximodo riguixhedxí Biblia ladxidóʼ binni.
3. Xi textu zanda guidúʼndanenu tuuxa ni guti binnilidxi, pa guidúʼyanu nápabe tiempu.
3 Nuu tiru zudiʼnu cuenta pora nga zanda guindaanu ra nuu binni primé ca biaje guinínenu laa. Pa guidúʼyanu cadi jneza modo riníʼ ique binni ca ne ni rusiidiʼ Biblia la? cadi óraque diʼ nga gábinu laabe cadi jneza modo riníʼ íquebe, jma galán guidúʼndanenu laabe ni na Biblia zuni Dios pur ca gueʼtuʼ ca (Juan 5:28, 29). Ne zándaca naquiiñeʼ gusiénenu laabe xiná Biblia de modo nuu ca gueʼtuʼ ca (Ecl. 9:5, 10). Pa guidúʼndanenu laabe xiixa historia de lu Biblia ni caníʼ de dxi biasa tobi ni maʼ guti la? zándaca uguʼnu gana laabe (Juan 11:39-44). Sti cosa zanda gúninu nga guidúʼndanenu laabe ca diidxaʼ gudxi Job Jiobá, ra guniʼbe zuni Jiobá xiixa pur laabe (Job 14:14, 15). Ante guireʼnu la? zanda gusaananenu laabe folletu ¿Qué nos sucede cuando morimos?, ne Cuando muere un ser querido o stobi ni nánnanu zacané laabe o ti tratadu. Laaca zanda gusaananenu laabe libru Xipeʼ ndiʼ cusiidiʼ Biblia, ne guluinu laabe capítulo 6 ne gábinu laabe zabiguétanu para guidúʼndanenu laabe jma de tema ca.
4. Ximódoruʼ zanda quixhedxinu ladxidóʼ cani guti binnilidxi.
4 Xcaadxi lugar. Pa chigutiidicabe ti libana ndaaniʼ Yoo stiʼ Reinu purtiʼ guti tuuxa, ne gúʼyanu nuu binni ni cadi testigu raqué la? zanda gudiʼnu laacabe xiixa revista, folletu o tratadu ni gacané laacabe gatadxí ladxidóʼcabe. Caadxi de ca funeraria ca rudiicaʼ xquíxepeʼ pur ca revista, folletu o tratadu ni huasaananécabe laacaʼ para gudiicaʼ ca binni ni guti binnilidxi. Laacaʼ zanda guidúʼyanu lu periódicu ra ricá lá cani guti tuuxa binnilidxi, ne gucaʼnu ti carta ra nuucabe ne gábinu laacabe diidxaʼ ni gacané laacabe. Ti gunaa testigu bicaa ti carta ra nuu ti hombre ni guti xheelaʼ ne ra nuu ti xiiñidxaapaʼ, biseendabe ni ne caadxi tratadu. Ti dxi hombre que ne xiiñiʼ guyecaʼ ralídxibe ne gúdxicaʼ laabe: «Ñee laatu biseendatu carta riʼ la? Purtiʼ racalaʼdxeʼ guiziideʼ jma de Biblia». Señor que ne xiiñiʼ bizulú biziidicaʼ de Biblia ne bizulú guyecaʼ guendaridagulisaa.
5. Xiñee naquiiñeʼ chuʼnu listu ti ganda quixhedxinu ladxidóʼ cani nuu triste purtiʼ guti binnilídxicaʼ.
5 Lu Eclesiastés 7:2 na: «Jma galán chuunu ra guti tuuxa que chuunu ti saa». Purtiʼ ni guti tuuxa binnilidxi la? zaná gucaadiaga ni chigüinenu laa de Stiidxaʼ Dios que tobi ni puru riuulaʼdxiʼ si chuʼ nayecheʼ. Nga runi, guiranu naquiiñeʼ chuʼnu listu ti ganda quixhedxinu ladxidóʼ cani nuu triste purtiʼ guti binnilídxicaʼ.