Riquiiñeʼ guidúʼndanu ante chigánnanu binni sti biaje, ti cueendunu ni galán
1. Dede pa idubi guníʼ Jesús zareeche diidxaʼ.
1 Jesús bisiidiʼ chaahuiʼ ca discípulo stiʼ para ganda gusiidicaʼ binni «ximodo runi mandar Dios» (Mat. 4:23; 9:35). Neca Palestina si nga bicheechebe diidxaʼ la? ante chebe guibáʼ gúdxibe ca discípulo stibe zareeche diidxaʼ lu guidubi naca Guidxilayú para guiziidiʼ «irá xixé binni sa nanda» laabe (Mat. 28:19, 20).
2. Xi caquiiñeʼ gúninu para ganda gaca dxiiñaʼ ni biʼniʼ mandar Jesús que.
2 Para ganda gúnicabe dxiiñaʼ que la? naquiiñeʼ chigánnacabe ca binni ni riuulaʼdxiʼ guiziidiʼ jma de Reinu stiʼ Dios sti biaje, para gacanécabe laacaʼ gúnicaʼ guiráʼ ni biʼniʼ mandar Cristu. Nga runi, naquiiñeʼ guidúʼndanu ante chigánnanu binni sti biaje para cueendunu ni galán.
3. Xi zanda gúninu dede primé biaje guinínenu binni ti ganda guibiguétanu ra nuube sti biaje.
3 Gudixhe xi guʼnuʼ. Caadxi de cani rucheeche diidxaʼ, ora maʼ caluxe caníʼnecaʼ binni primé biaje chigánnacaʼ laacabe la? rinabadiidxacaʼ laacabe xiixa ne riniʼcaʼ zabiguétacaʼ sti biaje para guicábicaʼ ni. Ora guibiguétabe sti biaje ca riquiiñecabe libru Xipeʼ ndiʼ cusiidiʼ Biblia para guicábicabe ni, ne zacá randa ruzulú ruundanécabe binni de Biblia.
4. Xiñee qué riquiiñeʼ cuézanu dede ora gueeda sti revista nacubi para chigánnanu binni sti biaje.
4 Yanna, cadi purtiʼ si riree ca revista ca cada beeu la? zabézanu tiidiʼ ti beeu para chigánnanu binni sti biaje. Zanda gucaʼnu binni chuulaʼdxiʼ guiziidiʼ jma ora guidúʼndanenu laa sti tema ni zeeda lu ti revista ni maca nápabe.
5. Xiñee riquiiñeʼ guiníʼ íquenu xi racaláʼdxinu gúninu.
5 Guníʼ ique xi zanda guʼnuʼ. Ante chigánnaluʼ tuuxa sti biaje la? gulee chupa chonna minutu para gúʼyaluʼ lu guiʼchiʼ ra cá labe ne biiyacaʼ xi racalaʼdxuʼ guʼnuʼ. Zanda gúʼndaneluʼ laabe xiixa ni zeeda lu guiʼchiʼ ni bisaaneluʼ laabe, o gusaananeluʼ laabe sti guiʼchiʼ ni caníʼ de tema ni maca guniʼtu. Pa biaana guicábiluʼ xiixa la? zanda guʼnuʼ ni óraca. Ora guzeeteluʼ ti textu ni caníʼ de ni cusiidiluʼ ca la? galán gúʼndaluʼ ni lu Biblia.
6. Xi riquiiñeʼ guicá íquenu ora chigánnanu binni sti biaje.
6 Ni racaláʼdxinu gúninu. Laanu racaláʼdxinu guzulú guidúʼndanenu binni de Biblia. Dxi gudxi ti Testigu ti señor pa zuundanebe laa de Biblia sti biaje yegánnabe laa que la? qué niná diʼ. Sti biaje yeganna Testigu que laabe yené ca revista ni jma nacubi ne gudxi laabe: «Yanna riʼ cacábidu xiixa ni racalaʼdxiʼ binni ganna de Biblia». Ne despué bidiibe lugar guiníʼ señor que, de raqué biindanebe laa ti textu zeeda lu Biblia ne ti párrafo stiʼ tobi de ca guiʼchiʼ ni riquiiñenu para gusíʼdinu binni. Zacá gunda bizulú biindanebe hombre que de Biblia.
7. Xi huabeenduluʼ purtiʼ ruundaluʼ ante chigánnaluʼ binni sti biaje.
7 Stale nga ni zabeendunu pa cueenu tiempu para guidúʼndanu ante chigánnanu binni sti biaje. Ziuʼnu jma nayecheʼ ora gucheechenu diidxaʼ ne zanda gacanenu ca binni ni maʼ nuu listu para «icaa enda nabani ni qué zaluxe» (Hech. 13:48).