Naquiiñeʼ guni huantarnu ti cadi gusaananu de gucheechenu diidxaʼ
1 Cásica raca nagana para binni guni xiixa dxiiñaʼ ni risaca la? zacaca guca nagana para apóstol Pablu gucheeche diidxaʼ jma de treinta iza (2 Cor. 11:23-29). Neca zaqué, qué nireedibe gana (2 Cor. 4:1). Gúnnabe zudii Jiobá stipa laabe para gúnibe dxiiñaʼ ni bidii laabe que (Fili. 4:13). Cumu nánnabe ziuu tu zinanda ejemplu stibe pur modo cayuni huantarbe que la? ngue runi guniʼbe sicaríʼ: «Lachinanda ejemplu stinne casi zinanda ejemplu sti Cristu» (1 Cor. 11:1).
2 Guni huantarnu ca dxi riʼ. Guiráʼ dxi, stale de ca xpinni Cristu nabé runi huantarcaʼ ora guni burla binni laacaʼ, ora gucaalú ca binnilídxicaʼ laacaʼ ne cani runinecaʼ dxiiñaʼ o cani rinecaʼ scuela (Mat. 10:35; Juan 15:20). Zándaca cazaacaluʼ nga yanna. O zándaca cayuniná xiixa guendahuará lii o cayúniluʼ stipa para cueeluʼ de ndaaniʼ íqueluʼ xiixa ni cadi jneza, o laaca cayuʼnu stipa para cadi gúniluʼ xiixa ni gucaa lii gucheeneluʼ Dios, ne ndiʼ rusihuinni pa naguidxi nuu fe stiluʼ ne pa zuni huantarluʼ. Intiica ni cadíʼdiluʼ, zanda guni huantarluʼ pa guiníʼ íqueluʼ ca ejemplu stiʼ ca xpinni Dios ni bibani dxiqué, ne stiʼ cani nabani yanna ni maʼ bidxiilucaʼ guendanagana (1 Ped. 5:9).
3 Sti cosa ni zanda gacané laanu para cadi guireʼnu gana gucheechenu diidxaʼ nga iquiiñenu «irá ni ma bidii Dios» laanu (Efe. 6:10-13, 15). Laaca risaca nga guinábanu Dios gudii stipa laanu para guni huantarnu. Laabe nuube para gudiibe espíritu santu laanu para ganda gudxíʼlunu ca guendanagana ca (2 Cor. 6:4-7). Ne pa qué racaláʼdxinu gusaba Binidxabaʼ laanu ne guiráʼ cani runi la? riquiiñeʼ gúninu guiráʼ ni rusietenalaʼdxiʼ Dios laanu; laacani nga cani dxandíʼ zanda gacané laanu (Sal. 119:24, 85-88). Ne cásica riuulaʼdxiʼ ti hombrehuiiniʼ guʼndaʼ stale biaje carta ni biseendaʼ bixhoze ra nuu la? laanu laaca naquiiñeʼ chuuláʼdxinu gúʼndanu Biblia guiráʼ dxi purtiʼ zacaneni laanu chuʼnu jma gaxha de Jiobá. Ora guidúʼndanu Biblia gatigá la? rudiini laanu guendabiaaniʼ para gudxíʼlunu intiica guendanagana. Ne racaneni laanu para cadi guiaandaʼ laanu xi riníʼ ique Dios de xiixa ni chigúninu ne cadi gusaana de guzúʼbanu stiidxabe (Pro. 2:10, 11).
4 Ricaanu ndaayaʼ ora guni huantarnu. Cásica guca Pablu, pa qué gusaananu de gucheechenu diidxaʼ la? zusiéchenu ladxidóʼ Jiobá ne zabeendunu ni galán, cásica laanu zaqueca sti binni (Pro. 27:11). Nga runi, quixhe íquenu cadi gusaana de gucheechenu diidxaʼ. Zacá zusihuínninu qué ziuu dxi gusaana de gápanu fe ne «zasaca fe stitu jma que oro, purti oro rinitilú» (1 Ped. 1:6, 7).