Ximodo gunadiaga binni stiidxaʼ Dios
1. Xiñee nuu ora raca nagana para laanu gucheechenu diidxaʼ, ne xiñee qué rusaananu de gúninu ni.
1 Cumu jma maʼ gaxha nuu dxi stiʼ Jiobá la? nga runi jma caquiiñeʼ gacanenu binni gunibiáʼ chaahuiʼ Dios ne ganna xi naguixhe íquebe gúnibe (Juan 17:3; 2 Ped. 3:9, 10). Zándaca nuu ora rácani nagana purtiʼ nuu binni ni qué riná gucaadiaga ne nuu tu runi burla laanu ora maʼ cucheechenu diidxaʼ (2 Ped. 3:3, 4). Neca zacá, nápanu razón para guiníʼ íquenu nuuruʼ binni ni zaná gucaadiaga ca diidxaʼ nacubi ne galán ca. Peru ximodo «guna diaga cabe ni pa qué chuʼ tu güi né ni laacabe» yaʼ (Rom. 10:14, 15).
2. Ximodo racané ejemplu stiʼ apóstol Pablu laanu.
2 Ora gucaalúcabe laanu. Cumu nánnanu zacané stiidxaʼ Reinu ca binni ni gucaadiaga de laani la? nga runi qué ridxíbinu ora chuʼ tu gucaalú laanu. Guzéʼtenu ni bizaaca apóstol Pablu Filipos, primé guidxi stiʼ Europa ra bicheechebe ca diidxaʼ nacubi ne galán ca. Ora gundisaʼ caadxi binni falsu luguiáʼ Pablu ne Silas la? biasa guiráʼ binni guidxi que guluu palu laacabe ne biseguyoo laacabe (Hech. 16:16-24). Ñee bidxibi Pablu pur ni biʼniʼ ca binni que laacaʼ la? Coʼ, purtiʼ despué guyebe Tesalónica, guiropa guidxi ra gudíʼdibe casi misioneru. Raqué gucanebe para guyuu ti neza binni ridagulisaa purtiʼ gucané espíritu stiʼ Dios laabe para cadi guidxíbibe (1 Tes. 2:2). Ñee cadi dxandíʼ galán ejemplu stibe riʼ para cadi guireʼnu gana la? (Gál. 6:9.)
3. Xi rucaa stale binni gucaadiágacaʼ laanu yanna.
3 Stale binni ni qué niná nucaadiaga laanu dxiqué, yanna maʼ bichaa modo riníʼ íquecaʼ. Xi bicaa laacabe guchaacabe yaʼ. Nuucabe málasi biníticabe bueltu stícabe, guca huarácabe, guti tuuxa binnilídxicabe o binadiágacabe xiixa noticia ni cayuniná binni nuu guiráʼ ladu (1 Cor. 7:31). Laaca nuu caadxi hombrehuiiniʼ ne dxaapahuiiniʼ ni qué ñanda nucaadiágacaʼ stiidxaʼ Reinu dxiqué purtiʼ qué niná bixhózecaʼ, yanna cumu maʼ huaniisicaʼ la? maʼ randa rucaadiágacaʼ. Pa qué gusaananu de gucheechenu diidxaʼ la? zanda gacanenu ca binni riʼ gunibiaʼcaʼ Jiobá ante gueeda dxi stiʼ (Rom. 10:13).
4. Xiñee qué rusaananu de gucheechenu diidxaʼ.
4 Cadi guireʼnu gana. Cumu nadxiinu Dios ne nadxiinu binni la? nga runi qué rusaananu de gucheechenu diidxaʼ ne gacanenu binni gaca discípulo, cásica biʼniʼ ca apóstol lu primé siglu que (Hech. 5:42). Stale binni «cacaalaʼdxiʼ ne cayacaná pur ca guendaquéiquiiñeʼ ni cayaca» ca dxi riʼ (Eze. 9:4). Peru ora gunadiágacabe ca diidxaʼ nacubi ne galán ca guizáʼ ratadxí ladxidóʼcabe ne racaneni laacabe gánnacabe zaca chaahuiʼ ca guendanagana nuu yanna. Neca stale binni qué náʼ gucaadiaga laanu la? Stiidxaʼ Dios na riecheʼ Jiobá ora guʼyaʼ guiráʼ stipa cayúninu (Heb. 13:15, 16).