Xiñee qué rusaananu de chigánnanu binni
1. Xi guendarinabadiidxaʼ zacábinu lu guiʼchiʼ riʼ.
1 Nuu stale lugar gatigá rucheechenu diidxaʼ. Ribiguétanu yoo queca stale tiru, neca rabi binni laanu qué riuulaʼdxiʼ gucaadiaga. Xiñee qué rusaana de chigánnanu cani qué riná gucaadiaga laanu yaʼ.
2. Xi razón jma risaca nga nápanu para cadi gusaananu de gucheechenu diidxaʼ.
2 Purtiʼ nadxiinu Jiobá ne binni. Ti razón jma risaca ni nápanu para cadi gusaananu de gucheechenu diidxaʼ nga purtiʼ nadxiinu Jiobá. Dede ndaaniʼ ladxidoʼno riale guinínenu binni de Dios (Luc. 6:45). Ora nadxiinu Jiobá rucaani laanu guzúʼbanu stiidxabe ne gacanenu binni guni zaqueca (Pro. 27:11; 1 Juan 5:3). Qué rusaananu de gucheechenu diidxaʼ neca qué naʼ binni gucaadiaga laanu. Ca xpinni Cristu ni bibani lu primé siglu laaca qué nusaanacaʼ de nucheechecaʼ diidxaʼ neca guzanándacabe laacaʼ (Hech. 5:42). Lugar de guireʼnu gana purtiʼ qué naʼ tuuxa gucaadiaga laanu la? rucheechenu diidxaʼ ne stale gana ti zacá gusihuínninu nadxiinu Jiobá ne cayuni adorarnu laa.
3. Ora nadxiinu binni, ximodo racané ni laanu cadi gusaananu de gucheechenu diidxaʼ.
3 Laaca rucheechenu diidxaʼ purtiʼ nadxiinu binni (Luc. 10:27). Jiobá qué racalaʼdxiʼ diʼ guinitilú nin ti binni (2 Ped. 3:9). Neca gatigá ridídinu neza ra rucheechenu diidxaʼ, cadxélarunu binni ni racalaʼdxiʼ guni ni na Jiobá. Guidúʼyanu ni guca ti lugar ni láʼ Guadalupe. Lade 56 binni ni nabeza raqué nuu ti Testigu. Udubiza guyuunisa 214. Ne ra bietenaláʼdxinu guendaguti stiʼ Jesús guyé biaʼ gande mil binni. De cada 22 binni nabeza lugar que guyé tobi.
4. Ximodo ruchaa ca binni neza ra rucheechenu diidxaʼ.
4 Ruchaa modo nabani binni neza ra rucheechenu diidxaʼ. Stale binni rindeza sti lugar neza ra rucheechenu diidxaʼ. Ora guibiguétanu ti yoo ra qué nucaadiácabe laanu la? zándaca ora tiidinu sti biaje guiree sti binni raqué ne ngue gucaadiaga laanu. O zándaca chindeza sti binni ni riuulaʼdxiʼ gucaadiaga laanu neza que. Ne nuu tiru, bixhoze si binni nga qué riná gucaadiaga ca diidxaʼ stiʼ Reinu ni zinenu ra nuucaʼ. Peru ora maʼ huaniisi xiiñicabe ne guireecaʼ de ra lídxicaʼ la? zándaca laacaʼ chuuláʼdxicaʼ gucaadiágacaʼ.
5. Xi rucaa ca binni ni qué riná gucaadiaga laanu dxiqué gúnicaʼ ni yanna yaʼ.
5 Binni laaca ruchaa modo laa. Guyuu ti tiempu apóstol Pablu guzananda ca xpinni Jesús, gudindenebe ne guniʼbe mal de laacaʼ (1 Tim. 1:13). Stale de cani runi ni na Jiobá yanna riʼ, dxiqué qué ñuuláʼdxicaʼ nucaadiágacaʼ, dede bicaalucaʼ cani ziné ca diidxaʼ nacubi ne galán stiʼ Reinu ra nuucaʼ. Cumu zeʼ dxi jma maʼ nagana cayaca tiempu riʼ la? zándaca chuʼ binni gucaadiaga laanu neca dxiqué qué ninacaʼ. Ne nuu xcaadxi zándaca gucaadiágacaʼ laanu purtiʼ cadíʼdicaʼ ra nagana casi, pa guti ti binnilídxicaʼ, biníticaʼ xhiiñacaʼ, qué gápacaʼ bueltu o nápacaʼ xiixa guendahuará.
6. Xiñee naquiiñeʼ gucheechenu diidxaʼ ne guendanayecheʼ.
6 Maʼ cadxiña dxi guinitilú guiráʼ cosa malu nuu yanna riʼ, peru cadi pur nga diʼ gusaananu de gucheechenu diidxaʼ ne gusíʼdinu binni (Isa. 60:22). Nga runi gucheecherunu diidxaʼ ne stale guendanayecheʼ ne cadi guiníʼ íquenu guirutiʼ tu zucaadiaga laanu. Zándaca sti binni ni guinínenu ca gucaadiaga laanu. Modo tiica guicábicabe, cadi gusaananu de gucheechenu diidxaʼ. Pa gúninu zacá la? zalanu ne laaca zulanu cani gucaadiaga laanu (1 Tim. 4:16).