Ndaa ra rinabadiidxaʼ

◼ Xiñee naquiiñeʼ gápanu laanu ora guinínenu tuuxa ni qué runibiaʼnu lu Internet

Lu Internet nuu stale lugar ra zanda gunibiáʼ saa binni ne guiniʼcaʼ diidxaʼ. Stale de ca lugar riʼ zanda gucaa tobi tu láʼ, panda iza napa, xi correu stiʼ ne dede zanda uguu foto stiʼ luni. Xcaadxi binni ni chuʼ ca lugar ca zanda gúʼyacaʼ tu guiráʼ maʼ bicaa lá racá ne zanda guiníʼnecaʼ laacabe. Nabé riuu stale hombrehuiiniʼ ne dxaapahuiiniʼ ca lugar riʼ, dede ne cani nuu ndaaniʼ xquidxi Dios huayuucaʼ para guiníʼnecaʼ cani nacaʼ testigu stiʼ Jiobá laacaʼ.

Pa gunibiaʼnu tuuxa lu Internet, jma naguenda gucaachibe tu laabe, xi racaláʼdxibe ne qué zaniʼdibe pa nuube galán nezalú Dios (Sal. 26:4). Ti binni zanda guiníʼ testigu stiʼ Jiobá laa peru qué gánnanu pa dxandíʼ ni caniʼbe, ne zándaca dxiqué guyuube ndaaniʼ xquidxi Dios peru yanna maʼ bireebe o maʼ rucaalube Dios (Gál. 2:4). Ne nuu tu laa na stale hombre ni rilaa xoo cani nahuuiniʼ ca riquiiñecabe Internet para guidxélacabe cani nahuiiniʼ ne guila xoocabe laacaʼ.

Ne neca nanna dxíchinu canazá binni ni caninenu ca jneza ndaaniʼ xquidxi Dios, peru ora maʼ nuucaʼ lu Internet la? jma nagueenda raca para laacaʼ guiniʼcaʼ diidxaʼ ni qué zacané laacaʼ. Rizaaca ndiʼ purtiʼ qué ritui diʼ lú binni gucaa xiixa ora qué runibiaʼ binni ni caniʼné. Ne zándaca guiníʼ ique tuuxa, cumu guirutiʼ zanna xi caníʼcabe, nin bixhózecabe ne nin ca binnigola la? zanda guiníʼcabe ni gacaláʼdxicabe. Peru nabé triste ni huazaaca, purtiʼ stale hombrehuiiniʼ ne dxaapahuiiniʼ xiiñiʼ Testigu maʼ huaníʼ íquecaʼ zacá ne riquiiñecaʼ diidxaʼ guidxa ora maʼ nuucaʼ lu Internet (Efe. 5:3, 4; Col. 3:8). Nuu xcaadxi huacaacaʼ foto sticaʼ ne ora guʼyaʼ binni cani rucaani laacaʼ guiníʼ íquecaʼ xiixa ni cadi jneza, riguíxhecaʼ ti apodo ni laca rucaa binni guiníʼ ique ni cadi jneza ne riguucaʼ videu ra rixidxi canción ra cahuinni diidxaʼ guidxa.

Nga runi, cani napa xiiñiʼ naquiiñeʼ gúʼyacabe xi runi xiiñicabe lu computadora (Pro. 29:15). Ñee cadi dxandíʼ ziuʼnu ra naxoo pa guni invitarnu tuuxa ni qué runibiaʼnu ra lídxinu o gudiʼnu lugar guiaananebe ca xiiñinu stúbisibe la? Cásica cani nahuiiniʼ zaqueca cani huaniisi, ziuʼnu ra naxoo pa guidxaaganu tuuxa ni qué runibiaʼnu lu Internet, nécapeʼ guiníʼ testigu stiʼ Jiobá laa (Pro. 22:3).