Riguidxi fe stinu ora rucheechenu diidxaʼ
1. Xi ndaayaʼ ricaanu ora rucheechenu diidxaʼ.
1 Laanu qué rusaananu de gucheechenu diidxaʼ purtiʼ racaláʼdxinu gusiéchenu Jiobá. Ne ora rininu de Stiidxaʼ Dios laaca ricaanu stale ndaayaʼ ne ribáninu jma nayecheʼ (2 Tim. 4:2; Isa. 48:17, 18). Yanna, ximódopeʼ nga ruquídxini fe stinu ne racaneni laanu chuʼnu nayecheʼ yaʼ.
2. Ximodo nga riguidxi fe stinu ora rucheechenu diidxaʼ.
2 Riguidxi fe stinu ne ricaanu ndaayaʼ. Ora rucheechenu diidxaʼ la? racaneni laanu guicá íquenu ca ndaayaʼ chigueedané Reinu stiʼ Dios, ne cadi chúʼpenu xizaa pur ca guendanagana rápanu guiráʼ dxi (2 Cor. 4:18). Ne ora gusíʼdinu binni cani zeeda lu Biblia, jma racaneni laanu guni crenu cani maʼ guníʼ Jiobá guni ne jma rusisácanu cani zeeda lu Stiidxabe (Isa. 65:13, 14). Ora racanenu xcaadxi binni para cadi guni ni runi binni guidxilayú ne guiniisi lu stiidxaʼ Dios la? jma riguixhe íquenu chuʼnu gaxha de Jiobá (Juan 17:14, 16; Rom. 12:2).
3. Xi guiráʼ guenda rápanu ora rucheechenu diidxaʼ.
3 Ora rucheechenu diidxaʼ laaca racaneni laanu gápanu ca guenda ni rusihuinni nácanu xpinni Cristu. Rizíʼdinu cadi gudxíʼbanu laca laanu ora guinínenu guiráʼ clase binni (1 Cor. 9:19-23). Ora rinínenu ca binni ni nuu «casi dendxu ni qué gapa pastor», nabé rianu laacaʼ ne riale de ndaaniʼ ladxidoʼno gacanenu laacaʼ (Mat. 9:36). Peru cadi ngasi, laaca rizíʼdinu guni huantarnu lu dxiiñaʼ cayúninu neca nuu binni qué riná gucaadiaga laanu o gucaalú laanu, ne riéchenu stale purtiʼ caquiiñenu xquendanabáninu para gacanenu xcaadxi binni (Hech. 20:35).
4. Xi riníʼ íqueluʼ de dxiiñaʼ ni bidii Jiobá lii.
4 ¡Nabé naroʼbaʼ ndaayaʼ nga nápanu! Purtiʼ ora rucheechenu diidxaʼ rusisácanu tobi lucha Dios ni caquiiñeʼ guni adorarnu. Dxandíʼ nga ruquídxini fe stinu. Ne cani maʼ gudixhe ique gusiidiʼ chaahuiʼ ca diidxaʼ nacubi ne galán stiʼ Dios la? ricaacaʼ stale ndaayaʼ (Hech. 20:24).