Ximodo zanda gusíʼdinu Stiidxaʼ Dios ca binni ni huaxiéʼ nanna guʼndaʼ
1. Tu binni ridxélanu ora maʼ zigucheechenu diidxaʼ.
1 Nuu biaje ora maʼ zigucheechenu diidxaʼ ridxélanu binni ni rapa gana guiziidiʼ de Biblia peru huaxiéʼ nanna guʼndaʼ. Ñee zanda gacanenu laacabe la? Zanda pue.
2. Xiñee naquiiñeʼ guni respetarnu tuuxa ni huaxiéʼ nanna guʼndaʼ, ne ximodo zanda gúninu ni.
2 Guni respetarnu binni. Ni jma rusisaca Jiobá nga ni nuu ndaaniʼ ladxidóʼ binni ne cadi pa guzá scuela roʼ (1 Sam. 16:7; Pro. 21:2). Cumu laaca rinándanu ejemplu stiʼ Jiobá la? qué rúninu menu nin ti binni purtiʼ si huaxiéʼ nanna guʼndaʼ. Ne rudiʼnu cuenta jma riná binni guiziidiʼ ora runi respetarnu laa ne ora qué rireʼnu gana laa (1 Ped. 3:15). Nga runi, ca primé biaje chuunu ra nuube cadi galán diʼ gucaʼnu laabe gúʼndabe ti textu o ti párrafo. Despué, ora jma maʼ ziziidibe de cani zeeda lu Biblia la? zándaca maʼ de laasibe ziale guiziidibe guʼndaʼ chaahuibe. Zacá jma ziuuláʼdxibe gúʼndabe Stiidxaʼ Dios «dxi ne gueelaʼ [...] chaahuidugá» (Sal. 1:2, 3).
3. Xi zanda gúninu para gacanenu tuuxa ni huaxiéʼ nanna guʼndaʼ.
3 Ximodo zanda gusíʼdinu laabe. Ca dibuju ca nabé galán cani para guiziidiʼ binni ne racanécani para guietenaláʼdxicabe ni biziidicabe. Ni zanda guʼnuʼ primé nga guluiʼluʼ laabe ti dibuju ni zeeda lu guiʼchiʼ cayuundatu ne gudxi laabe xi cayuuyabe luni. De racá gunabadiidxaʼ laabe xiixa de ni cayuundatu para guiénebe ni cusiidini. Últimu la? biindaʼ chupa chonna textu ni cusiene de tema ca. Ca dibuju ca laaca zacaneni laabe guietenaláʼdxibe ni biziidibe. Cadi galán diʼ gúʼndaneluʼ laabe stale párrafo. Guníʼ chupa chonna biaje cani jma naquiiñeʼ gánnabe de tema ca, ne cadi guzeeteluʼ sti cosa ni cadi zeeda lu guiʼchiʼ ni cayuundatu ca. Biindaʼ ca textu ca de lu Biblia ne gunabadiidxaʼ laabe xiixa para gánnaluʼ pa biénebe ni bíʼndaluʼ ca. Nga zucaa laabe guʼndaʼ chaahuibe ti maʼ de laasibe guyúbibe guiénebe xcaadxi cosa ni zeeda lu Biblia.
4. Ximodo zanda gacanenu tuuxa guiziidiʼ guʼndaʼ jma galán.
4 Ximodo zanda gúʼndabe jma galán. Cadi guiníʼ íquenu qué zanda guiene binni ne guiaanané ni caziidiʼ purtiʼ si huaxiéʼ nanna guʼndaʼ o pur qué nizá scuela. Nga runi, zanda gábiluʼ laabe gucaadiágabe ca libru ne ca folletu stinu ni maʼ guca grabar. Ne laaca zanda guiziidibe gúʼndabe jma galán pa chinándabe binni ni cayuundaʼ ca lu guiʼchiʼ stibe o dede guiniʼbe ca diidxaʼ ca chaahuidugá. Laaca zanda iquiiñeluʼ folletu Biʼniʼ stipa gúʼndaluʼ ne gucaaluʼ. Nuu lugar maʼ gudixhe ca binnigola ca ximodo guiziidiʼ ca binni ridagulisaa guʼndaʼ chaahuicaʼ. Ñee zanda iquiiñeluʼ cani maʼ bizéʼtenu ca la? Ribézadu gacanécani laanu para gusíʼdinu binni guʼndaʼ chaahuiʼ «ni cá lu Xquiʼchi Dios», ni zanda gacané laacaʼ para guilacaʼ (2 Tim. 3:15).