Ximodo zanda gacanenu cani huaxiéʼ nanna guʼndaʼ
1. Xiñee nagana nga gusíʼdinu ca binni ni huaxiéʼ nanna guʼndaʼ cani dxandíʼ rusiidiʼ Biblia.
1 Nuu binni ni rinínenu ora maʼ canagucheechenu diidxaʼ riuuláʼdxicaʼ guiziidicaʼ de Dios, peru cumu raca nagana para laacabe gúʼndacabe la? ridxíbicabe gúʼndacabe Biblia ne xcaadxi libru. Nga runi, zándaca cadi jneza gusaananenu laacabe libru Xipeʼ ndiʼ cusiidiʼ Biblia primeca biaje chigánnanu laacabe. Ximodo zanda gacanenu ca binni ca guiziidicaʼ de Dios yaʼ. Gunabadiidxacabe ca publicador de jma de gande guidxi ni nanna gucheeche diidxaʼ, ne bidiicaʼ caadxi conseju ni chiguzéʼtenu.
2. Xi zanda iquiiñenu para gacanenu ca binni ni huaxiéʼ nanna guʼndaʼ.
2 Pa qué ruundaʼ chaahuiʼ binni ni cayuundaneluʼ Biblia ca o qué lica gánnabe gúʼndabe la? zanda guzulú gúʼndaneluʼ laabe folletu Bicaadiaga Dios o Bicaadiaga Dios ne qué ziuu dxi gátiluʼ. Ti precursor de Estados Unidos ruluíʼ binni guiropaʼ folletu ca ne rinabadiidxaʼ laacabe gunáʼ ni riuuláʼdxicabe. Betel ni nuu Kenia bicaa nabé riquiiñeʼ ca publicador ca folletu ca, purtiʼ ca binni de Africa jma riziidicaʼ né xiixa historia ne cadi ora guinabadiidxacabe laacaʼ ne guicábicaʼ. Para ti binni ni guzá scuela zándaca cadi nagana para guʼndaʼ ne guicabi xiixa guendarinabadiidxaʼ, peru para ca binni ni qué nizá scuela zándaca nagana ni para laacaʼ. Pa huaxiéʼ nanna binni ni cayuundaneluʼ ca, stale publicador naca jma galán iquiiñeluʼ folletu ni láʼ Ca diidxaʼ sicarú ni zeeda de Dios o Lii zanda gaca xhamíguluʼ Dios, o Libru stinneʼ de ca historia stiʼ Biblia.
3. Xi cadi naquiiñeʼ guiaandaʼ laanu para gusiidiʼ chaahuinu ti binni ni qué ganna guʼndaʼ.
3 Guluu gana. Cani qué ganna guʼndaʼ zándaca zatuí lucaʼ o zuni sentircaʼ qué zanda guiziidicaʼ. Nga runi, para guzulú gusíʼdinu laacabe de Dios la? primeca naquiiñeʼ gacanenu laacabe guni sentírcabe galán. Stale binni ni qué ganna guʼndaʼ nabé nuu xpiaanicaʼ ne nagueenda riziidicaʼ. Nga runi, gusisácanu laacabe ne guni respetarnu laacabe (1 Ped. 3:15). Jma ziuuláʼdxicabe guiziidicabe pa gúʼyacabe risaca stipa cayúnicabe ne ziziidicabe jma de Dios. Nga runi, gatigá guluu gana laacabe.
Cani qué ganna guʼndaʼ zándaca zatuí lucaʼ o zuni sentircaʼ qué zanda guiziidicaʼ. Para guzulú gusíʼdinu laacabe de Dios la? primeca naquiiñeʼ gacanenu laacabe guni sentírcabe galán
4. Ximodo zanda uguʼnu gana cani huaxiéʼ nanna guʼndaʼ para chuʼcaʼ listu ora guidúʼndanenu laacaʼ.
4 Nécapeʼ nagana para guʼndaʼ binni cusiidiluʼ ca, guluu gana laabe chuʼbe listu dede ante gúʼndaneluʼ laabe. Caadxi publicador de Sudáfrica rábicabe ca binni cayuundanécabe, guinábacaʼ tuuxa binnilídxicaʼ o ti xhamígucaʼ ni nanna guʼndaʼ gacané laacaʼ. Sicaríʼ runi ti publicador de Gran Bretaña para gacané cani cayuundané ti chuʼcaʼ listu dede ante gúʼndanebe laacaʼ, lu chupa chonna de ca párrafo ca rutiiñegabe libru stibe ni maca biʼniʼ subrayarbe ti guʼyaʼ binni ca jma nagueenda zadxela xi guicabi pa guni zaqueca lu libru stiʼ. Ti xpinni Cristu de guidxi la India rinabaʼ cani cayuundané gúʼyacaʼ ca dibuju ni zeeda lu ndaa chiguundacaʼ sti semana ne guiníʼ íquecaʼ de laacani ante ganda dxi gúʼndané laacabe.
5. Ximodo zusihuínninu nápanu paciencia binni ora cusíʼdinu laa.
5 Gupa paciencia. Biiyaʼ gunáʼ cani jma risaca zeeda lu ni cayuundaneluʼ laabe ne gucané laabe guiene chaahuibe cani. Ca primé biaje chigannuʼ laabe, jma galán guindaaluʼ biaʼ chii o quince minutu si. Cadi gacaláʼdxiluʼ gúʼndaneluʼ laabe stale, sínuque chupa chonna si párrafo cada biaje chigannuʼ laabe. Cadi guireeluʼ gana pa nanene ruundaʼ binni ca. Zándaca ra jma gannaxhiibe Jiobá jma zucaani laabe guʼndaʼ chaahuibe. Para jma gannaxhiibe Jiobá la? dede primé biaje chigánnaluʼ laabe biʼniʼ invitar laabe chebe guiráʼ reunión.
6. Ximodo zanda gusíʼdinu ti binni guʼndaʼ.
6 Jma nagueenda zaniisi binni ca lu stiidxaʼ Dios pa guiziidibe guʼndaʼ chaahuibe (Sal. 1:1-3). Stale publicador despué de gúʼndanecaʼ binni Biblia riquiiñecaʼ folletu Biʼniʼ stipa gúʼndaluʼ ne gucaaluʼ para gacanecaʼ laacabe gúʼndacabe. Pa guiree binni ni cayuundaneluʼ ca gana, zanda uguuluʼ gana laabe sti biaje ra gábiluʼ laabe xi guiráʼ cosa maʼ biziidibe gúnibe. Gudxi laabe zaguu Jiobá ndaayaʼ stipa cayúnibe ne guluu gana laabe guni orarbe Jiobá para gacané laabe (Prov. 16:3; 1 Juan 5:14, 15). Caadxi publicador de Gran Bretaña riguucaʼ gana cani ruundanecaʼ quixhe íquecaʼ xiixa ni zanda gúnicaʼ, casi guiziidicaʼ abecedariu, guyúbicaʼ ne gúʼndacaʼ ca textu zeeda lu Biblia ne gúʼndacaʼ ca libru ne ca revista ni cadi nagana para guiene binni. Stale biaje ora maʼ cusíʼdinu ti binni guʼndaʼ laaca naquiiñeʼ gacanenu laacabe chuuláʼdxicabe gúnicabe ni.
7. Xiñee cadi naquiiñeʼ gusaananu de gusíʼdinu stiidxaʼ Dios ca binni ni huaxiéʼ nanna guʼndaʼ.
7 Qué runi Jiobá menu ca binni ni qué nizapeʼ scuela (Job 34:19). Laabe ruuyabe xi nuu ndaaniʼ ladxidóʼ binni (1 Crón. 28:9). Nga runi, cadi gusaananu de gusíʼdinu ca binni ni qué ruundaʼ chaahuiʼ de stiidxaʼ Dios. Nápanu stale ni zanda iquiiñenu para gusíʼdinu binni. Despué maʼ zanda guidúʼndanenu laacabe libru Xipeʼ ndiʼ cusiidiʼ Biblia para ganda guiziidibe ca cosa jma nagana zeeda lu Stiidxaʼ Dios.